پادشای تایلاند لەگەڵ بەرپرسی پاسەوانەكانیدا هاوسەرگیری کرد

- 5/2/2019 7:25:00 PM 35067 جار خوێندراوەتەوە

خەندان-

كۆشكی پادشایەتی وڵاتی تایلاند رایگەیاند، ڤاجیرالۆنگكۆرن پادشای وڵاتەكە لەگەڵ بەرپرسی پاسەوانە  تایبەتەكانیدا هاوسەرگیری كردوە و نازناوی "شاژن"ی پێبەخشیوە.

دوێنێ چوارشەممە، كۆشكی پادشایەتی تایلاند رایگەیاند، پادشای وڵات لەگەڵ سوتیدا تیدجای، بەرپرسی پاسەوانە تایبەتەكانیدا هاوسەرگیری ئەنجامداوە و دواتر تەلەفزیۆنەكانی وڵاتیش پەخشی ئاهەنگی هاوسەرگیریەكەیان گواستەوە.

هەواڵی هاوسەرگیری پادشای تایلاند لەگەڵ بەرپرسی پاسەوانە تایبەتەكانی، پێش مەراسیمی تاجلەسەرنانی راگەیەندرا كە شەممەی رابردو 27ی نیسان لە ئاهەنگێكی فراواندا مەراسیمەكە ئەنجامدرا.

لە راگەیندراوێكی كۆشكی پادشایەتیدا هاتوە "، ماوەی چەند ساڵێكی زۆرە پادشا و هاوژینەكەی ئێستای  بە ئاشكرا پەیوەندیان هەیە، بەڵام تا ئێستا پەیوەندیەكەیان بەشێوەیەكی فەرمی نەبوە.

هاوكات دوێنێ چوارشەممە بەشێك لە ئاهەنگی هاوسەرگیریەكە لە تەلەفزیۆنە ناوخۆییەكانی تایلاند پەخشكرا و هەریەك لە ئەندامانی خێزانی شاهانە و راوێژكارانی كۆشك لە ئاهەنگەكەدا ئامادەبون.

ڤاجیرالۆنگكۆرن تەمەنی 66 ساڵە و  پێشتر سێ جار هاوسەرگیری ئەنجامداوە، هاوكات لە ماوەی سێ هاوسەرگیریەكەی پێشویدا بوە بە خاوەنی حەوت منداڵ.

سوتیدا تیدجای پێشتر كارمەندی فڕۆكەخانەی هێڵی ئاسمانی تایلاند بوە و ساڵی 2014 ، ڤاجیرالۆنگكۆرن-ی پادشای تایلاند پۆستی جێگری بەرپرسی پاسەوانە تایبەتەكانی پێبەخشی و دواتر لە كانونی یەكەمی ساڵی 2016 دا بە فەرمانی پادشا، تیدجای بو بە فەرماندە لە هێزەكانی سوپادا.

پێشتر بومیبول ئادولیادێژ بۆ ماوەی 70 ساڵ لەسەر تەختی پادشایەتی تایلاند مایەوە و حكومڕانیەكەی بە ماوەدرێژترین حكومرانی لە جیهاندا تۆماركرا، دواتر لە ساڵی 2016 كۆچی دوایی كرد و ماها ڤاجیرالۆنگكۆرن-ی كوڕی نازناوی پادشای یاسایی وڵاتەكەی پێبەخشرا.


Copyright © 2016 Xendan.org all rights reserved

designed and developed by AVESTA GROUP