بەڕێوەبەرایەتى رۆشنبیری هونەری راپەڕین کرایەوە
لەمەودوا بۆ دەرهێنانی مۆڵەتی پیشەیی پێویست ناکات هاوڵاتیان سەردانى سلێمانى بکەن

- 4/30/2019 8:52:00 PM 5500 جار خوێندراوەتەوە

خەندان-
لە مەودوا خاوەن پیشەکانى سنوری ئیدارەی راپەڕین بۆ دەرهێنانى مۆڵەت پێویست ناکات سەردانی سلێمانی بکەن، لە راپەڕین مۆڵەتەکانیان بۆ دەردەهێندرێت.
 بەبێ گەڕانەوە بۆ سلێمانی هەمو رێکارە یاساییەکانیان بە کەمترین ماوە بۆ جێبەجێدەکرێت

 

دوای ئەوەی بە بڕیاری حکومەتى هەرێمی کوردستان بەڕێوەبەرایەتى رۆشنبیری هونەری راپەڕین کرایەوە، لە مەودوا خاوەن پیشەکانى سنوری ئیدارەی راپەڕین وەک (وێنەگرو کۆپی و چاپخانەکان و دوکانى سیدی فرۆشتن، زیاتر لە 70 جۆر پیشەی دیکە) بۆ دەرهێنانى مۆڵەت دەتوانن سەردانی بەڕێوەبەرایەتى رۆشنبیری و هونەری راپەڕین بکەن، بەبێ گەڕانەوە بۆ سلێمانی هەمو رێکارە یاساییەکانیان بە کەمترین ماوە بۆ جێبەجێدەکرێت.

بەشی مۆڵەتە پیشییەکان یەکێکە لەو بەشانەی کە پێشتر لە رانیە نەبوە و خاوەن پیشەکانى وێنەگر و کۆپی و چاپخانەکان و دوکانى سیدی و کۆمپانیا هونەریەکان و چەند بەشێکی دیکە بە مەبەستى دەرهێنانی مۆڵەتی پیشەیی دەبو سەردانى سلێمانی بکەن.
 لە هەوڵداین بۆ کردنەوەی بەشی نوێ بۆ ئەوەی بتوانین خزمەت بە دانیشتوانى سنورەکەمان بکەین

 

لەو بارەیەوە ئەکرەم محمد ئەمین، بەڕێوەبەری بەڕێوەبەرایەتی رۆشنبیری هونەری راپەڕین لە لێدوانێکدا بە خەندان-ی رایگەیاند: "کردنەوەی بەڕێوەبەرایەتى رۆشنبیری و هونەری راپەڕین دەستکەوتێکی گرنگ بو بۆ سنوری ئیدارەی راپەڕین، بۆئەوەی بتوانێت خزمەتێکی زۆر بە ناوچەکەمان بکات، بۆ ئەو مەبەستەش هەمیشە لە هەوڵداین بۆ کردنەوەی بەشی نوێ بۆ ئەوەی بتوانین خزمەت بە دانیشتوانى سنورەکەمان بکەین". 

هەر لەو بارەیەوە رابەر عومەر، لێپرسراوی مۆڵەتە پیشەییەکان لە بەڕێوەبەرایەتى رۆشنبیری و هونەری راپەڕین لە لێدوانێکدا بۆ خەندان وتى: "لە مەودوا خاوەن پیشەکانى سنوری ئیدارەی راپەڕین لەوانە (وێنەگرو کۆپی و چاپخانەکان و دوکانى سیدی فرۆشتن ، زیاتر لە 70 جۆر پیشەی دیکە)دەتوانن بۆ دەرهێنانى مۆڵەت سەردانى راپەڕین  بکەن بەبێ گەڕانەوە بۆ سلێمانی هەمو رێکارە یاساییەکانیان بە کەمترین ماوە بۆ جێبەجێ بکەین".

نیشانەکردن :

#رانیە

Copyright © 2016 Xendan.org all rights reserved

designed and developed by AVESTA GROUP