"هەڕەشەی بڵاوکردنەوەی ڤیدیۆیی سێکسی دەستکاری کراومان لێدەکرێت"
پەرلەمانتارێکی نەوەی نوێ: سکاڵا لەسەر شاسوار عەبدولواحید تۆماردەکەم

- 4/24/2019 1:57:00 PM 34646 جار خوێندراوەتەوە

خەندان-

ئەندامێکی فراکسیۆنی نەوەی نوێ لە پەرلەمانی کوردستان رایگەیاند، پێش ئەوەی بەیاننامە لەسەر شاسوار عەبدولواحید بڵاوبکەنەوە لە رێگەی نامەیەکەوە هەڕه‌شەی بڵاوکردنەوەی گرتەی سێکسی و دەستکاریکراویان لێکراوە.
دەیانەوێت جوڵانەوەی نەوەی نوێ بەرەو ئاقارێکی دیکەدا بەرن و بەرەو بنەماڵەیی بیبەن

 

شادی نەوزاد، ئەندامی فراکسیۆنی نەوەی نوێ لە پەرلەمانی کوردستان ئەمڕۆ لە کۆنگرەیەکی رۆژنامەوانیدا رایگەیاند، "پێش ئەوەی بەیاننامەیە لەسەر شاسوار عەبدولواحید و باندەکەی بڵاوبکەینەوە کە دەیانەوێت جوڵانەوەی نەوەی نوێ بەرەو ئاقارێکی دیکەدا بەرن و بەرەو بنەماڵەیی بیبەن، هەڕەشەمان لێکرا، بەشێوەیەک کە توشی شۆک بوین".
کامێرای شاراوەیان لەو کابینانە بۆ دانراون و ژیانی تاکەکەسیان روبەڕوی هەڕەشە دەکرێتەوە

 

 

ئاماژەی بەوەشکرد، "لەماوەی رابردودا و لە ئەزمونی کارکردنماندا کۆمەڵێک کەس لە دەرەوەی وڵات و لە شارەکانی دیکەدا هاتونەتە سلێمانی بۆ بەشداریکردن لە ۆرک شۆپ و کۆبونەوە حزبی و سیاسیەکانی جوڵانەوەکەدا، ئەو کەسانەی کە هاتون لە شوقەکانی گوندی ئەڵمانی و کابینەکانی چاڤی لاند ماونەتەوە، بەڵام ئێستا هەڕه‌شەی ئەوە لە ئەندامە بەرێزەکان دەکرێت لەگەڵ ئەو کەسانەی بەیاننامەیان دەرکردوە، کە کامێرای شاراوەیان لەو کابینانە بۆ دانراون و ژیانی تاکەکەسیان روبەڕوی هەڕەشە دەکرێتەوە".

21ی ئەم مانگە، فراکسیۆنی نەوەی نوێ لە پەرلەمانی کوردستان و ئەنجومەنی باڵای نەوەی نوێ بەیاننامەیەکی ناڕەزاییان بڵاوکردەوە و رایانگەیاند، "نەوەی نوێ لە جوڵانەوەیەکی سیاسی جیاواز لە مۆدێلی سیاسی زاڵ، بەرەو باندێکی سیاسی تەنگەبەری ئەوتۆ براوە، کە ھەمو دەزگا و ئۆرگانە گرنگەکانی بڕیاردان تێیدا پەراوێز خراوە و بڕیاری دەستە جەمعی تێدا نەماوە".

شادی نەوزاد وتیشی، "پێش بڵاوکردنەوەی بەیاننامە ناڕازییەکە دژی شاسوار عەبدولواحید هەڕەشەی بڵاوکردنەوەی گرتەی ڤیدیۆیی سێکسی دەستکاری کراوی بە دەنگ و دانانی هەندێک وێنەم بۆ من و پەرلەمانتارانی دیکەش هاتوە و تێیدا نوسراوە، چاوەڕوانی بڵاوکردنەوەی فیلمی روتی خۆشت بە".
ئەگەر باندێکی سیاسی بەوجۆرە مامەڵە لەگەڵ سەرکردە ژنەکانی خۆی بکات، ئایا چۆن مامەڵە لەگەڵ ئەو کچە تازە پێگەیشتوانە دەکات

 

پەرلەمانتارەکەی نەوەی نوێ ئەوەشی وت، "ئەگەر باندێکی سیاسی بەوجۆرە مامەڵە لەگەڵ سەرکردە ژنەکانی خۆی بکات، ئایا چۆن مامەڵە لەگەڵ ئەو کچە تازە پێگەیشتوانە دەکات کە رودەکەنە ئۆفیسەکانی باندەکەی شاسوار عەبدولواحید بۆ بەشداریکردن لە کایەی سیاسیدا".

شەوی رابردو خەندان لەزاری سەرچاوەیەكی باڵای ناو ئەنجومەنی باڵای نەوەی نوێ بڵاویکردەوە، ئاراستە ناڕازیەكەی جوڵانەوەی نەوەی نوێ كە خۆی لە زۆرینەی پەرلەمانتارانی جوڵانەوەكە لە پەرلەمانی عێراق و كوردستان و ئەنجومەنی باڵای جوڵانەوەكە دەبینێتەوە ئەگەری زۆرە لە دو رۆژی داهاتودا، لە بەیاننامەیەكی دەستەجەمعی نوێدا لە دژی سەرۆكی جوڵانەوەكە بوەستنەوە.
ئەو بەرپرسیارێتیە دەکەوێت ئەستۆی دەسەڵاتی پارتی و یەکێتی، چونکە لە ژێر دەسەڵاتی ئەواندا کەسانێکی لەو شێوەیە پەروەردە بون

 

شادی نەوزاد رونیشیکردەوە، "ئەو بەرپرسیارێتیە دەکەوێت ئەستۆی دەسەڵاتی پارتی و یەکێتی، چونکە لە ژێر دەسەڵاتی ئەواندا کەسانێکی لەو شێوەیە پەروەردە بون، کە بەم شێوەیە مامەڵە بکەن و تەهدیدی سەرکردەکانی خۆیان دەکەن و ڤیدیۆیی دەستکاریکراوی ژیانی تایبەتیان بڵاودەکرێتەوە".
بێدەنگ نابم و لە نزیکترین کاتدا سکاڵا لەسەر شاسوار عەبدولواحید تۆماردەکەم

 

شادی نەوزاد وتیشی، "بێدەنگ نابم و لە نزیکترین کاتدا سکاڵا لەسەر شاسوار عەبدولواحید تۆماردەکەم، چونکە گومانم نیە ئەو دەسەڵاتەی بتوانێت بەمشێوەیە مامەڵە بکات و هەڕه‌شە لەگەڵ سەرکردەکانی جوڵانەوەکەی بکات خراپتر مامەڵە لەگەڵ ئەندامانی دیکەی جوڵانەوەکەی دەکات".


Copyright © 2016 Xendan.org all rights reserved

designed and developed by AVESTA GROUP