خامنەیی: ئێران دەتوانێت بەپێی خواستی خۆی نەوت هەناردە بكات

- 4/24/2019 1:12:00 PM 1421 جار خوێندراوەتەوە

خەندان-

رێبەری باڵای شۆڕشی کۆماری ئیسلامی ئێران لە پێگەی فەرمی خۆی رایگەیاند، ئێران دەتوانێت چەندی پێویستبێت نەوت بفرۆشێت و سزاكانی ویلایەتە یەكگرتوەكانی ئەمریكا بە هیچ جێگەیەك ناگات.

ئایەتوڵڵا عەلی خامنەیی، رابەری باڵای شۆرشی کۆماری ئیسلامی ئێران، ئەمڕۆ چوارشەممە لە پێگەی فەرمی خۆی سەبارەت بە بڕیاری یاساغكردنی كڕینی نەوت لە ئێران رایگەیاند، "دەتوانین تا چەند پێویستمان بێت و بمانەوێت نەوت هەناردەبكەین".
سزاكانی ویلایەتە یەكگرتوەكانی ئەمریكا بۆ سەر ئێران ناگەن بە هیچ شوێنێك

 

خامنەیی لەبارەی توندتركردنی سزاكانی ئێران لە لایەن ویلایەتە یەكگرتوەكانەوە ئاماژەی بەوەشكردوە، "سزاكانی ویلایەتە یەكگرتوەكانی ئەمریكا بۆ سەر ئێران ناگەن بە هیچ شوێنێك".
دوشەممەی رابردو كۆشكی سپی رایگەیاند چیتر مۆڵەت نادات بە هیچ وڵاتێك نادات نەوت لە ئێران بكڕێت

 

ئەو راگەیەندراوەی خامنەیی لەكاتێكدایە دوشەممەی رابردو 22ی مانگ كۆشكی سپی ویلایەتە یەكگرتوەكانی ئەمریكا لە راگەیەندراوێکدا رایگەیاند، بە بڕیاری دۆناڵد ترەمپ، سەرۆكی ئەو وڵاتە چیتر واشنتن مۆڵەت نادات بە هیچ وڵاتێك نەوت لە ئێران بكڕێت و ئاماژەی بەوەکرد، رێککەوتی دوی ئایاری ئەمساڵ دوایین مۆڵەتە بۆ ئەو وڵاتانەی كە لە ئێستادا لە كڕینی نەوتی ئێران بەردەوامن.
حەوتی مانگی تەمموزی ساڵی رابردو ترەمپ بە مەبەستی سەپاندنەوەی سزاكانی وڵاتەكەی بەسەر ئێراندا بڕیارێكی واژۆكرد
حەوتی مانگی تەمموزی ساڵی 2018 دۆناڵد ترەمپ، بە مەبەستی سەپاندنەوەی سزاكانی وڵاتەكەی بەسەر ئێراندا بڕیارێكی واژۆكرد و بەپێی بڕیارەكە سزاكەی ئەمەریكا بە دو قۆناغ بەسەر ئێراندا جێبەجێکرا.
سزاکان بە دو قۆناغ چونە بواری جێبەجێکرنەوە

 

بەپـێی بڕیارەكەی ترەمپ، قۆناغی یەكەمی سزاكانی ئەمریكا لە مانگی تەمموزی هەمان ساڵەوە دەستیپێكرد، كە سزا خرایە سەر بازاڕی دراوی ئێران و قەدەغەش خرایە سەر بازرگانیكردن بە ئاڵتون و كانزاكانی دیكە لەگەڵ ئێراندا، لەوکاتەوە رێگە نادرێت هیچ تەكنەلۆژیایەكی پەیوەست بە كەرتی پـیشەسازی و دروستكردنی ئۆتۆمبیل بە ئێران بدرێت.
5ی تشرینی دوەمی 2018 هەناردەی نەوتی ئێران و ئاڵوگۆڕی بازرگانی لە ڕێگەی بەندەرەكانی ئێرانەوە یاساغ كرا

 

هاوكات قۆناغی دووەمی سزاكان لە 5ی تشرینی دوەمی 2018 وە دەستیپێکرد كە هەناردەی نەوتی ئێران و ئاڵوگۆڕی بازرگانی لە ڕێگەی بەندەرەكانی ئێرانەوە یاساغ كرا، هاوکات ژمارەیەکی زۆر لە کۆمپانیاکانی بازرگانی لە ئێران کشانەوە.

سەبارەت بە سزاكانی ئێران لە رێكەوتی 5ی تشرینی دوەمی ساڵی 2018دا، مایك پۆمپیۆ، وەزیری دەرەوەی ویلایەتە یەكگرتوەكان ناوی ئەو هەشت وڵاتەی ئاشکراکرد کە لە سزاکانی وڵاتەكەی بۆ سەر ئێران بەخشراون و ئەو وڵاتانەش پێكهاتبون لە وڵاتانی چین، ژاپۆن، هیندستان، تورکیا، ئیتاڵیا،  کۆریای باشور، یۆنان و تایوان.

نیشانەکردن :

#ئێران #ئه‌مه‌ریكا

Copyright © 2016 Xendan.org all rights reserved

designed and developed by AVESTA GROUP