بەڤیدیۆ.. پیاوێك لە دەمی تیمساحێكدایە

- 4/23/2019 2:56:00 PM 18887 جار خوێندراوەتەوە


خەندان-

لە یەكێك لە روبارەكانی دورگەی سلاویسی سەر بە ئیندۆنیزیا، لە رێگەی گرتە ڤیدیۆیەكەوە دیمەنێكی ترسناك تۆماركراوە، كە تێیدا تیمساحێكی گەورە لە دەمیدا جەستەی پیاوێكی هەڵگرتوە.

وەك لە ڤیدیۆكەدا دەردەكەوێت، تیمساحەکە جەستەی پیاوەکەی هەڵگرتوە لەرێگای رانەکانیەوە و پاشان بەناو روبارەكەدا رایدەكێشێت.

بەپێی رۆژنامەی دەیلی مەیلی بریتانی، دارلین ئۆتی تەمەن 30 ساڵ ناوی ئەو قوربانیەیە كە لە جەستەی لە دەمی تیمساحەكەدایە و بە مەبەستی چاككردنەوەی بۆریەكی ئاو چوەتە ژێر روباری مالاوجی لە نزیك ماڵەكەی خۆیدا، دواتر لە لایەن ئەو تیمساحەوە هێرشیركراوەتە سەر.

دوای هێرشی تیمساحەكە، خوشكی قوربانیەكە هەوڵیداوە لە رێگەی راكێشانی بۆری تایبەت بە هەناسەدانەكەی دارلین هاوكاری براكەی بكات، بەڵام لە رزگاركردنی براكەی سەركەوتو نەبوە.

تیمساحەكە دوای هێرشكردنە سەر دارلین، بەرەو قوڵایی روبارەكە رۆشتوە تا ئەوكاتەی لە چاوەكان ونبوە و لە رۆژی داهاتودا بەشێوەیەكی ترسناك دەركەوتوەتەوە كە جەستەی قوربانیەكە لە دەمیدا بوە.

دوای روداوەكە دەستبەجێ لایەنە پەیوەندیدارەكانی ئیندۆنیسیا لە چالاكیەكی فراواندا دەستیانكرد بە گەڕان بەدوای جەستە ونبوەكەدا و دواتر توانیویانە تەرمەكەی رادەستی بنەماڵەكی بكەنەوە تا بینێژن.

هاوكات لایەنە پەیوەندیدارەكان ئاماژەیان بەوەكردوە "لە ئەنجامی روداوەكە برینی زۆر قوڵ لە قاچ و رانی قوربانیەكەدا هەبوە، بەڵام بەشەكانی دیكەی جەستەی زیانی بەرنەكەوتوە.

ئەوە لەكاتێكدایە، لە ماوەی رابردودا بەرپرسان دانیشتوانی ئەو ناوچەیەیان ئاگاداركردوەتەوە كە ژمارەیەكی زۆر تیمساح لە روبارەكانی دەوروبەردا هەیە داوای لێكردون خۆیان لەو مەترسیە بپارێزن.  


Copyright © 2016 Xendan.org all rights reserved

designed and developed by AVESTA GROUP