لە سلێمانی کەمپەینێک بۆ لە سێدارەدانی بکوژانی تاریق و مەریوان راگەیەندرا

- 4/21/2019 1:08:00 PM 6317 جار خوێندراوەتەوە

خەندان-

لە شاری سلێمانی کەمپەینێکی واژۆ کۆکردنەوە بۆ داواکردنی سەپاندنی سزای لە سێدارەدان بەسەر باندی بکوژەکانی تاریقی بەقاڵ و مەریوان دارا راگەیەنرا.

کەمپەینەکە لەلایەن خانەوادەی تاریق-ی بەقال و مەریوان دارا-وە رێکخراوە، داوا لە هاوڵاتیان دەکەن، واژۆی کەمپەینەکەیان بکەن بە مەبەستی سەپاندنی سزا بەسەر ئەندامانی ئەو باندەدا.
دەبێت سزای ئەوکەسانە بدرێت و لە سێدارە بدرێن

 

بنەماڵەی تاریق-ی بەقاڵ دەڵێن، "دەبێت سزای ئەوکەسانە بدرێت و لە سێدارە بدرێن و نابێت بۆ چەند ساڵێک سزابدرێن و دواتر بهێندرێنە دەرەوە و تاوانی دیکە ئەنجام بدەن".

کەمپەینەکە لە بەردەم دوکانەکەی تاریق-ی بەقاڵ، بەردەرکی سەرا، بەردەم باخی گشتی و کەمپی کۆنی زانکۆی سلێمانی بەڕیوەدەچێت و ئەمڕۆ یەکشەممە و سبەی دوشەممە بەردەوام دەبێت.
لە کاتی دەستبەکاربونمەوە تا ئێستا باندی دیکەی هاوشێوەی ئەوەم نەبینیوە

 

حەوتی ئەم مانگە، ئاسایشی سلێمانی لە کۆنگرەیەکی رۆژنامەوانیدا دەستگیرکردنی باندێکی کوشتن و دزی و رفاندنی راگەیاند، بەڕێوەبەری ئاسایشی سلێمانی "بە مەترسیدارترین باند" وەسفیکرد و وتی، "لە کاتی دەستبەکاربونی لەو بەڕێوەبەرایەتییەوە تا ئێستا باندی دیکەی هاوشێوەی ئەوەم نەبینیوە".

یەکێک لە تاوانەکانی ئەو باندە، کوشتنی تاریقی بەقاڵ بو، باوکی چوار منداڵ و تاقانەی 10 خوشک بو، دوای چوار مانگ لە بێسەروشوێنبونی، رۆژی حەوتی ئەم مانگە  تەرمەکەی لەژێر دیواری خانویەکدا دۆزرایەوە.

نیشانەکردن :

#ئاسایش #سلێمانی

Copyright © 2016 Xendan.org all rights reserved

designed and developed by AVESTA GROUP