هەرێمی کوردستان پشتگیری دەکات
پەرلەمانی عێراق "مۆتەکەی رۆژانەی گەنجان" قەدەغە دەکات

- 4/20/2019 4:54:00 PM 6906 جار خوێندراوەتەوە

خەندان-کۆچەر عەزیز

پەرلەمانی عێراق بڕیاریداوە یاری پەبجی و سەرجەم یاریە ئەلیکترۆنیەکانی دیکەی هاوشێوەی لە سەرتاسەری عێراق قەدەغە بکات، بۆ ئەو مەبەستەش پڕۆژەیەک پەسەندکرا و ئاڕاستەی حکومەتی ناوەند کراوە، هەرێمی کوردستانیش پێشوازی لەو بڕیارە دەکات و بەهەنگاوێکی ئەرێنی دەبینێت.

17ی ئەم مانگە، پەرلەمانی عێراق بە پڕۆژە یاسایەک داوای لە حکومەتی عێراق کرد یاری پەبجی قەدەغە بکات، دوای ئەو بڕیارەش بەشێک لە گەنجان لە رێگەی تۆڕە کۆمەڵایەتییەکانەوە ناڕەزاییان دەربڕی و دژی بڕیارەکە وەستانەوە.

وەزارەتی گواستنەوە و گەیاندنی هەرێمی کوردستان پشتگیری لە بڕیارەکەی پەرلەمانی عێراق دەکات و دەڵێت، "پێشوازی لە بڕیاری قەدەغەکردنی یاری پەبجی دەکەین".
هەر بڕیارێک لە بەرژەوەندی گشتیدا بێت بە دڵنیاییەوە پێشوازی لێدەکەین

 

ئومێد محەمەد، وتەبێژی وەزارەتی گواستنەوە و گەیاندنی هەرێمی کوردستان بە خەندان-ی راگەیاند، "هەر بڕیارێک لە بەرژەوەندی گشتی بێت بە دڵنیاییەوە وەک وەزارەت پێشوازی لێدەکەین، هەر بڕیارێکیش لە  بەغداوە دەربچێت دەبێت ئەنجومەنی وەزیرانی هەرێم فەرمان بکات بە جێبەجێکردنی".

ئاماژەی بەوەشکرد، ئەو بڕیارە بە نوسراوی فەرمی بۆ هەرێم نەهاتوە، بەڵام هەر بڕیارێک لە بەرژەوەندی گشتی بێت، بە دڵنیاییەوە ئەوان وەک وەزارەت پێشوازی لێدەکەن.

لە بڕیارەکەی پەرلەمانی عێراقدا کە تایبەتە بە یارییە ئەلیکترۆنییەکان، لە بڕگەی یەکەمدا هاتوە، "داوا لە حکومەت دەکەین رێگری لە بەکارهێنان و هەمو جۆرە مامەڵەیەک بگرێت کە پەیوەندیدارن بە یارییە ئەلیکترۆنییەکانی پەبجی، فۆرتنایت، حوت و ئەزرەق و تەواوی ئەو یارییە ئەلیکترۆنیانەی کە ئاسایشی کۆمەڵایەتی و توانای گەنجان و لاوان دەخەنە مەترسییەوە".
لە داهاتودا پرۆژەیەک لەبارەی قەدەغەکردنی یاری پەبجی و یاریە ئەلیکترۆنییەکانی دیکەوە ئامادە دەکەین

 

سەرۆکی لیژنەی گواستنەوە و گەیاندنی پەرلەمانی کوردستانیش دەڵێت، "لە داهاتودا پرۆژەیەک لەبارەی قەدەغەکردنی یاری پەبجی و یاریە ئەلیکترۆنییەکانی دیکەوە ئامادە دەکەین و دەیبەنە پەرلەمان".
ئەو یاسایانەی رەهەندی کۆمەڵایەتی و نیشتمانیان هەیە بۆ کوردستان و عێراق دەبێت پەرلەمانی کوردستان و  حکومەتی هەرێم پابەندبن پێوەی

 

هاورێ مەلا ستار بۆ خەندان وتی، "ئەو یاسایانەی رەهەندی کۆمەڵایەتی و نیشتمانیان هەیە بۆ کوردستان و عێراق دەبێت پەرلەمانی کوردستان و حکومەتی هەرێم پابەندبن پێوەی، بەڵام ئەو یاسایانەی کە تاڕادەیەک شکڵین، هەرێم دەتوانێت پابەند نەبێت، پێوەی و خۆی یاسای بۆ دەربکات".

ئاماژەی بەوەشکرد، "قەدەغەکردنی ئەو یارییەم پێباشە، چونکە بوەتە هۆی لێکدابڕانی پەیوەندییەکان و تێکچونی شیرازەی خێزان".
ئەو یارییە ئەلکترۆنیانە زیان بە پەیوەندیە کۆمەڵایەتییەکان دەگەیەنن

 

توێژەرانی کۆمەڵایەتی لە هەرێمی کوردستان بڕیارەکەی پەرلەمانی عێراق بۆ قەدەغەکردنی یاریی پەبجی و یاریە ئەلیکترۆنیەکانی دیکە بە دروست دەزانن و دەڵێن، "ئەو یارییە ئەلکترۆنیانە زیان بە پەیوەندیە کۆمەڵایەتییەکان دەگەیەنن و زیان بە بەرهەمی تاکی کۆمەڵگاش دەگەیەنن".
بڕیارەکەی پەرلەمانی عێراقم پێباشە، چونکە خوگرتن بەو یارییە ئەلیکترۆنیانە زیان بە مرۆڤ دەگەیەنێت

 

سالار فەتاح، توێژەری کۆمەڵایەتی بە خەندان-ی وت، "بڕیارەکەی پەرلەمانی عێراقم پێباشە، چونکە خوگرتن بەو یارییە ئەلیکترۆنیانە زیان بە مرۆڤ دەگەیەنێت و پەیوەندییە کۆمەڵایەتییەکان لاواز دەکات و کاتیشی بە فیڕۆدەدات".

رونیشیکردەوە، "نەک بەتەنها یارییە ئەلکترۆنییەکان، بەڵکو بەشێک لە تۆڕەکانی پەیوەندیکردنیش کە شەوانە دوای کاتژمێر 12:00 ئۆفەری بێبەرامبەر پێشکەش دەکەن وا لە تاکی کورد و بە تایبەتیش گەنجان دەکات تا بەیانی نەخەون و بەرۆژ بخەون، لە کاتێکدا وزەی ئەم کۆمەڵگایەی ئێمە وەزەیەکی رۆژانەیە، نەک شەوانە".
یاری پەبجی ژمارەیەک گەنجی دورخستوەتەوە لە هەندێک دیاردە و کاری نەشیاو

 

لەبارەی ئەوەی هەندێک لە گەنجان یاخود هاوڵاتیان دەڵێن، یاری پەبجی ژمارەیەک گەنجی دورخستوەتەوە لە هەندێک دیاردە و کاری نەشیاو ئەو توێژەرە وتی، "ئەوە هیچ راست نییە، ئەو گەنجانە خۆیان نایەنەوێت، ئەگەرنا دەتوانن بچن کارێکی مەیدانی بکەن خزمەت بە کۆمەڵگە بکات".
لەگەڵ هاتنی یاریەکەدا هۆشداریمان دایە هاوڵاتیان

 

لیژنەی فەتوای هەرێمی کوردستانیش پشتگیری بڕیارەکەی پەرلەمانی عێراق دەکات و دەڵێت، ئەوان لەگەڵ هاتنی یاریەکەدا هۆشداریان داوەتە هاوڵاتیان.
وەک لیژنەی فەتوا هەر لەسەرەتای یاریەکەوە لەگەڵیدا نەبوین

 

عیرفان رەشید، ئەندامی ئەنجومەنی لیژنەی فەتوای باڵای هەرێمی کوردستان بە خەندان-ی وت، "وەک لیژنەی فەتوا هەر لەسەرەتای یاریەکەوە لەگەڵیدا نەبوین، بڕیارەکەی پەرلەمان لەگەڵ بڕیارەکەی رابردوی ئێمە هیچ جیاوازیەکی ئەوتۆی نییە، هەر یارییەک زیانی هەبێت بۆ تاک لەکۆمەڵگادا و کات بەفیڕۆ بدات پێویستە قەدەغە بکرێت".

ئاماژە بەوەش دەکات، هەرشتێک زیانی هەبێت لە کۆمەڵگادا پێویستە پەرلەمانی عێراق و پەرلەمانی کورستان قەدەغەی بکەن و ئەوانیش وەک لیژنەی فەتوا پشتیگری دەکەن.
لە ماوەکانی رابردوشدا لە هەریەک لە شێخی ئەزهەر و وڵاتانی کوەیت و ئوردن و چەند وڵاتێکی دیکە یاریەکەیان قەدەغەکرد

 

عێراق یەکەم وڵات نیە کە یاری پەبجی قەدەغە دەکات، لە ماوەکانی رابردوشدا لە هەریەک لە شێخی ئەزهەر و وڵاتانی کوەیت و ئوردن و چەند وڵاتێکی دیکە یاریەکەیان قەدەغەکرد.
بەشێوەیەکی رەها ناتوانین بڵێین یاری پەبجی حەرامە

 

لەبارەی حەرامی و حەڵاڵی یاریەکەوە لەروی شەریعەتی ئیسلامیەوە، ئەندامەکەی ئەنجومەنی لیژنەی فەتوای باڵای هەرێم وتی، "بەشێوەیەکی رەها ناتوانین بڵێین حەرامە، بەڵام ئەگەر کەسێک پێوەی ئالودە بێت و نەتوانێت کارەکانی بکات، ئەو کاتە بۆ ئەو کەسە حەرامە".

زیاتر وتیشی، "خوێندکارێک کە نەتوانێت خوێندنەکەی بە باشی بخوێنێت و نەچێتە خوێندنگا، یاخود کرێکار هەبوە بەهۆی ئەو یارییەوە نەچوەتە سەر کارەکەی، یان ئەگەر کەسێکی لە کارەکەی دور خستەوە یاخود شڵەژانێکی بۆ دروستکرد ئەوا بۆ ئەو کەسانە حەرامە".

بڕیارەکەی پەرلەمانی عێراق ناڕەزایی توندی لای هەندێک لە گەنجان و بەکارهێنەرانی یاریە ئەلیکترۆنییەکان لێکەوتەوە و داوا دەکەن، پەرلەمانی عێراق ئاوڕ لە کێشەکانی دیکە بداتەوە. 
 حکومەتی عێراق لە بری ئەوەی سەرقاڵی چاککردنەوەی شارە کاولبوەکان و چاکردنەوەی رێگاوبانەکان و چاکسازی بێت یاری پەبجی قەدەخە دەکات

 

پەڵە جەوهەر، یەکێک لەو کەسانەی کە یاری پەبجی دەکات بۆ خەندان وتی، "من بڕیارەکەی حکومەتی عێراق هیچ بە باش نازانم، حکومەتی عێراق لە بری ئەوەی پڕۆژە پێشکەش بکات، سەرقاڵی چاککردنەوەی شارە کاولبوەکان و چاکردنەوەی رێگاوبانەکان و چاکسازی بێت یاری پەبجی قەدەخە دەدات".

پەڵە بە تەنزەوە دەڵێت، "ناشێت پەرلەمانی عیراق دانیشتنێکی لەسەری کردبێت، لە جیاتی ئەوەی بڕیاری راگرتنی ئەو یاریانە دەدەن بچن سەرقاڵی چاککردنی وڵات بدەن".

یاری پەبجی و یاریە ئەلیکترۆنییەکانی دیکە تەنها گەنجانی سەرقاڵ نەکردوە، بەڵکو هەندێک لەو کەسانەشی سەرقاڵکردوە کە خێزاندارن و ئەرکی کۆمەڵایەتی زیاتر و دابینکردنی بژێوی ژیانیان بۆ خۆیان و خێزانەکانیان لەسەرە.
یاری پەبجی گەنجی لەکاری هەڵە دورخستوەتەوە 

 

جیهاد عەلی، کە خێزاندارە و شەوانە دو کاتژمێر یاری پەبجی دەکات، بە خەندان-ی وت، "یاری پەبجی گەنجی لە چونە دەرەوەی شەوانەو لەکاری هەڵە دورخستوەتەوە بۆیە بڕیاری راگرتنەکەی خراپە و دەبێت کاری پێنەکرێت".

بەڵام هەندێک لە گەنجان پشتگیری بڕیارەکەی پەرلەمانی عێراق دەکەن و دەڵێن، پێویستە پەرلەمان پەلە بکات لە راگرتنی یارییەکە لە عێراقدا.
پەبجی وەک ماددەی بێ ھۆشکەر وایە ھۆگری دەبیت و ناتوانیت دەستبەرداری ببیت

 

دلێر باشوری، هاوڵاتییەکی دیکەیە و لەبارەی بڕیارەکەی پەرلەمانی عێراقەوە بۆ خەندان وتی، "باشترین بڕیاری پەرلەمانی عێراقە تا ئێستا، پەبجی وەک ماددەی بێ ھۆشکەر وایە ھۆگری دەبیت و ناتوانیت دەست بەرداری ببیت، گەنجەکانمان لە بری ئەوەی سەرقاڵی زانست و زانیاری و قورئان و ڕێبازی پێغەمبەربن یاری پەبجی دەکەن".

دلێر باشوری یاری پەبجی بەهۆکاری رودانی زۆربەی کێشە کۆمەڵایەتیەکان دەزانێت لە عێراق و کوردستاندا و دەڵێت، بەشێکی زۆری ئەو کەسانەی یاری پەبجی و یاریەکانی دیکە دەکەن کاتێکی زۆر بە ئەنجامدانی ئەو یاریانەوە بەسەردەبەن و ئەرک و کەسە نزیکەکانیان فەرامۆش دەکەن، ئەوەش وادەکات کێشەی خێزانی لێبکەوێتەوە.
بەکارهێنانی پەبجی بەکارهێنانی بەرنامەی VPN بە رێگەی دەربازبون دەزانن لە بڕیارەکەی پەرلەمانی حکومەتی عێراق

 

بڕیاری راگرتنی یاری پەبجی لەکاتێکدایە بەکارهێنانی ئەو یاریە ئەلیکترۆنیانە بەکارهێنانی بەرنامەی VPN بە رێگەی دەربازبون دەزانن، چونکە لەو بەرنامەیەوە دەتوانن بە ئازادی یاریەکانیان ئەنجامبدەن.

بەڵام هێشتا دیارنیە بڕیاری پەرلەمانی عێراق بۆ راگرتنی یاری پەبجی و یاریە ئەلیکترۆنیەکانی دیکە کەی و چۆن دەچێتە بواری جێبەجێکردنەوە؟ ئاخۆ دەتوانرێت رێگری لە بەکارهێنانی بەرنامەی VPN بکرێت بۆ ئەوەی نەبێتە دەروازەیەک تا جارێکی دیکە بەکارهێنەرانی یاریە ئەلیکترۆنییەکان پەنای بۆ نەبەن؟.


Copyright © 2016 Xendan.org all rights reserved

designed and developed by AVESTA GROUP