بەپەلە

بە تۆمەتی سیخوڕی داڵێكی بولگاریا لە یەمەن دەستگیركرا

- 4/18/2019 11:03:00 PM 45143 جار خوێندراوەتەوە

خەندان-

یەكینە سەربازیەكانی حكومەتی یەمەن كە شاری تەعز-یان لەژێردەستدایە، گومانیان لە داڵێكی گەورە بوە كە سیخوری بۆ حوسییەكانی وڵاتەكەیان بكات و بەو هۆیەوە دەستگیریانكردوە.

داڵێكی گەورەی سپی كە ناوی "نیڵسن"ە و لە جۆری گریفۆن-ە، یەكێكە لەو 14 داڵەی لە لایەن گروپی ژینگە پارێزی FWFF "سندوقی چاودێریكردنی ئاژەڵ و روەكی كێوی"ەوە ئامێری چاودێریكردنی شوێن (GPS) یان لێبەستراوە و لە بولگاریاوە بەرەو باشور و عەرەبستانی سعودیە دەستیانكردوە بە فڕین.

 

بەهۆی ئەوەی داڵە نێرەكانی جۆری گریفۆن پێش ئەوەی بگەڕێنەوە ماڵەوە مەودایەكی دورودرێژ دەبڕن، ئەندامانی گروپەكە سەرەتا لەبارەی گەشتە دورەكەی نیڵسن-ەوە نیگەران نەبون، بەڵام لە مانگی تشرینی دوەمی ساڵی 2018 دوای ئەوەی سنوری یەمەن-ی تێپەراند، پەیوەندیان بە نیڵسن-ەوە نەما.

نێڵسن سیخوڕ نەبو، بەڵكو میوانێكی بولگاری بو كە لەكاتێكدا بە چواردەوری ئەو ناوچەیەدا دەفڕی لەگەڵ خەلكی یەمەن و شاری تەعز بەتایبەتی تۆڕێكی پەیوەندی لە سۆز و خۆشەویستی دروستكردبو. 



ژمارەی پەیوەندی تەلەفۆنی و ئیمەیڵی ئەندامانی گروپەكە بە قاچی نێڵسن-ەوە بوە و ئەندامانی گروپی FWFF دەڵێن "لە 5ی مانگی نیسان كاتێك كۆلێرا لە یەمەن بڵاوبوەوە سەدان نامە و ئیمەیڵیان لە لایەن خەڵكی یەمەنەوە بەدەستگەیشتوە تا لەبارەی رەوشی ئەو داڵەوە نیگەران نەبن".

دوای ئەوەی هێزە چەكدارەكانی سەر بە حكومەتی یەمەن ئامێری دیاریكردنی شوێن بە قاچ و باڵی ئەو داڵەوە دەبینن، دەستبەجێ دەستگیری دەكەن و وا گوماندەبەن ئەو داڵە بە مەبەستی سیخوڕیكردن و گواستنەوەی زانیاری سەربازی لە لایەن چەكدارە حوسیەكانی ئەو وڵاتەوە نێردراوە.



دواتر دەنگۆی هەواڵەكەی نێڵسن گەیشتە رێكخراوی جیهانی رزگاركردنی ئاژەڵان و لەوڕێگەیەوە دوای ئەوەی دڵنیاییاندا كە سیخور نیە، داوایان لەو هێزانەی یەمەن كرد كە نێڵسن-یان دەستگیركردوە رادەستی گروپی FWFF بكەنەوە وهێزەكانی حكومەتی یەمەن پاش ئەوەی دڵنیابونەوە نێڵسن سیخوڕ نیە، رەوانەی ناوچەكەی خۆیان كردەوە.


نیشانەکردن :

#یه‌مه‌ن

Copyright © 2016 Xendan.org all rights reserved

designed and developed by AVESTA GROUP