بەپەلە

"بڕێکی زۆری پاره‌ی نه‌وتی فرۆشراوی هه‌رێمی کوردستان نادیاره‌"
وەزارەتی سامانە سروشتیەكان لە70 دۆلار تەنها 23 دۆلار دەداتە وەزارەتی دارایی

- 4/18/2019 8:09:00 PM 41382 جار خوێندراوەتەوە

خەندان-بەشی راپۆرت و شیكاری

حکومەتی هەرێمی کوردستان سەرەڕای رێککەوتنی لەگەڵ بەغدا بەردەوامە لە بە سەربەخۆ فرۆشتنی نەوتی کوردستان، پەرلەمانتارانی کوردستانیش دەڵێن، وەزارەتی سامانە سروشتیەكان، تەنها 23 دۆلار دەداتە وەزارەتی دارایی بۆ دابەشکردنی موچەی فەرمانبەران لەکاتێکدا حکومەت هەربەرمیلێک نەوت بە زیاتر لە 70 دۆلار دەفرۆشێت.

ئەو داهاتەی حکومەتی هەرێمی کوردستان مانگانە لە نەوتی فرۆشراو دەستی دەکەوێت لە نێوان 350 بۆ 400 ملیۆن دۆلاردایە

 

حکومەتی هەرێمی کوردستان رۆژانە زیاتر لە 420 هەزار بەرمیل نەوت دەفرۆشێت، کۆی ئەو داهاتەش حکومەتی هەرێمی کوردستان مانگانە لە نەوتی فرۆشراو دەستی دەکەوێت لە نێوان 350 بۆ 400 ملیۆن دۆلاردایە، ئەوەش بەپێی وتەی پەرلەمانتارانی کوردستان.

عەلی حەمەساڵح: بڕێکی زۆری پاره‌ی نه‌وتی فرۆشراوی هه‌رێمی کوردستان نادیاره‌و نازاندرێت پارەکەی لە کوێیە

 

عەلی حەمە ساڵح، سەرۆکی فراکسیۆنی گۆڕان دو رۆژ بەر لە ئێستادا هۆشداریدایە خەڵکی کوردستان لەبارەی فرۆشتنی نەوتی هەرێمی کوردستانەوە و رایگەیاند، "بڕێکی زۆری پاره‌ی نه‌وتی فرۆشراوی هه‌رێمی کوردستان نادیاره‌و نازاندرێت پارەکەی لە کوێیە".

ئێستا هه‌رێمی کوردستان رۆژانه‌ 420 هه‌زار به‌رمیل نه‌وت ده‌فرۆشێت

 

هۆشداریەکە دوای ئەوە هات کە دابەشکردنی موچەی مانگی یەکی ئەمساڵی فەرمانبەرانی هەرێمی کوردستان دواکەوت و تا ئێستاش زۆربەی وەزارەتەکان موچەیان وەرنەگرتوە، لەکاتێکدا بەپێی وتەی عەلی حەمەساڵح "ئێستا هه‌رێمی کوردستان رۆژانه‌ 420 هه‌زار به‌رمیل نه‌وت ده‌فرۆشێت و کۆی داهاتی مانگانه‌ی نه‌وتیش 350 ملیار دینار زیاترە".

حکومەت له‌ بەرامبەر هەر به‌رمیلێک نەوتی فرۆشراوی هه‌رێمی کوردستان ته‌نیا 23 دۆلار دەداتە وەزارەتی دارایی

 

عەلی حەمەساڵح وتوشیەتی:"حکومەت له‌ بەرامبەر هەر به‌رمیلێک نەوتی فرۆشراوی هه‌رێمی کوردستان ته‌نیا 23 دۆلار دەداتە وەزارەتی دارایی بۆ دابەشکردنی موچە، له‌ کاتێکدا نرخی به‌رمیلێک نه‌وت بە زیاتر لە 70 دۆلار دەفرۆشێت، کە ئەوەش گەندەڵییەکی ئاشکرای دۆسیەی نەوتە". 

حكومەت وەڵامی پەرلەمانتارانی نەداوەتەوە كاتێك پرسیاریان كردوە بۆچی لە فرۆشتنی هەر بەرمیلێک نەوت بە 70 دۆلار، تەنھا 23 دۆلار دەداتە وەزارەتی دارایی

 

شێرکۆ جەودەت، سەرۆکی فراکسیۆنی یەکگرتوی ئیسلامی لە پەرلەمانی کوردستان بە خەندان-ی وت:"پرسیاریان ئاڕاستەی حکومەتی هەرێمی کوردستان کردوە، بۆچی لە فرۆشتنی هەر بەرمیلێک نەوت کە حکومەت  بە 70 دۆلار دەیفرۆشێت، بەڵام تەنھا 23 دۆلار دەداتە وەزارەتی دارایی بۆئەوەی تەواوکاری موچەی فەرمانبەرانی پێ بکات، بەڵام وەڵامیان نەدراوەتەوە".

تەنانەت وەزیری داراییش دەڵێت ئاگادار نییە، ئەو پارەیەی دیکەی فرۆشتنی نەوت چی لێدێت و چۆن خەرجدەکرێت

 

ئاماژەی بەوەشکرد، "تەنها ئەوە دەزانین کە وەزارەتی سامانە سروشتییەکان، ئەو بڕە پارەیە دەداتە وەزیری دارایی و لەگەڵ داهاتی ناوخۆدا، موچەی پێ دابەش دەکرێت، تەنانەت وەزیری داراییش دەڵێت ئاگادار نییە، ئایا ئەو پارەیەی دیکەی فرۆشتنی نەوت چی لێدێت و چۆن خەرجدەکرێت".

خەندان بە زیاد لە هۆکارێکی پەیوەندیکردن چەندینجار پەیوەندیکرد بە قوباد تاڵەبانی، و سەفین دزەیی، و بەرپرسانی دیکەی حکومەت، بەڵام وەڵامی پەیوەندیەکانیان نەدایەوە

 

بۆ وەڵامدانەوەی پرسیاری ئەوەی بۆچی حکومەتی هەرێمی کوردستان تەنها 23 دۆلار دەداتە وەزارەتی دارایی بۆ دابەشکردنی موچە، خەندان بە زیاد لە هۆکارێکی پەیوەندیکردن چەندینجار پەیوەندی کرد بە هەریەکە لە قوباد تاڵەبانی، جێگری سەرۆکی حکومەت و سەفین دزەیی، وتەبێژی حکومەت و بەرپرسانی دیکەی حکومەت، بەڵام وەڵامی پەیوەندیەکانیان نەدایەوە. 
لە خولی رابردوشدا هەرچەندە بانگهێشتی ئاشتی هەورامی، وەزیری سامانە سروشتیەکان کرا بۆ پەرلەمان، بەڵام ئەوکات پەرلەمانتاران رایانگەیاند، کەنەتوانراوە لەوبارەیەوە وەڵامی پێویستی لێوەربگیرێت

 

چیرۆکی پرسیاری پەرلەمانتاران و خەڵکی کوردستان لەبارەی چۆنێتی فرۆشتنی نەوت و خەرجکردنی پارەکەی دەگەڕێتەوە بۆ دوای بڕیاری بەسەربەخۆ فرۆشتنی نەوتی هەرێمی کوردستان کە لە ساڵی 2014 دا دەستیپێکرد، لە خولی رابردوشدا هەرچەندە بانگهێشتی ئاشتی هەورامی، وەزیری سامانە سروشتیەکان کرا بۆ پەرلەمان، بەڵام ئەوکات پەرلەمانتاران رایانگەیاند، کەنەتوانراوە لەوبارەیەوە وەڵامی پێویستی لێوەربگیرێت.

شێركۆ جەودەت:چونکە ئەم کابینەیە کار بەڕێکەرە ناتوانین لێپرسینەوەی لەگەڵدا بکەین

 

شێرکۆ جەودەت وتیشی:"لە کابینەی پێشودا دۆسیەی داهاتی نەوت یەکێک بو لەو پرسانەی کە پەرلەمانی لەسەر داخرا، چەندینجار داوامانکرد دەبێت وەزیری سامانە سروشتییەکان متمانەی لێوەربگیرێتەوە، سەبارەت بەئێستاش چونکە  ئەم کابینەیە کار بەڕێکەرە ناتوانین لێپرسینەوەی لەگەڵدا بکەین، بۆیە دەبێت چاوەڕوانی پێکهێنانی کابینەی نۆیەمی حکومەتی هەرێمی کوردستان بکەین".

عیزەت سابیر:حکومەت پارەی پێشوەختی لە کۆمپانیاکان وەرگرتوە، بەشێکی زۆری ئەو قەرزانەی کە پێشوەخت وەریگرتوە ئێستا دەیانداتەوە

 

سەرۆکی لیژنەی دارایی و ئابوری لە خولی پێشوی پەرلەمان دەڵێت:"حکومەتی هەرێم پێشتر نەوتی پێشوەختی فرۆشتوە، لەو کاتەدا کە بەغدا پارەی نەدەنارد، پارەی پێشوەختی لە کۆمپانیاکان وەرگرتوە، بەشێکی زۆری ئەو قەرزانەی کە پێشوەخت وەریگرتوە ئێستا دەیانداتەوە".

هەمو بیرە نەوتێک کە کۆمپانیایەکی بیانی بەڕێوەی دەبات لەسەدا 40ی داهاتەكەی دەدرێتەوە پێیان

 

عیزەت سابیر بۆ خەندان وتی:"هەمو بیرە نەوتێک کە کۆمپانیایەکی بیانی بەڕێوەی دەبات لەسەدا 40ی داهاتەكەی دەدرێتەوە پێیان، وەک قەرەبوی بە دەستهێنانەوەی تێچون، ئەو پارەیە لە بانکەکاندا دادەنرێت، دوای ئەوەی دەگوازرێتەوە بۆ کوردستان دەبێت کرێی ئەو بانکانەشی لێبدرێت، ئەو بۆریە نەوتەشی دەڕوات بۆ کوردستان دەبێت کرێی ئەوەشی لێبدرێت".

رونیشیکردەوە، "ئەو پارەیەی کە وەزارەتی سامانە سروشتییەکان دەیدات بە وەزارەتی دارایی 350 بۆ 450 ملیۆن دۆلارە لە مانگێکدا، ئەگەر حکومەتی هەرێم بە بڕی 700 ملیۆن دۆلاریش نەوت بفرۆشێت، بە نزیکەی نیوەی دەدرێتە وەزارەتی دارایی و نیوەکەی دیکەشی دەدرێت بە خەرجی پڕۆسەی نەوت و قەرزە دەرەکییەکانی حکومەتی هەرێمی کوردستان". 

هیچ زانیارییەکی ورد نییە سەبارەت بەو قەرزانەی کە حکومەت کردویەتی، ئەو قەرزانەش لای پەرلەمان پەسەند نەکراون و وەزارەتی سامانە سروشتییەکان خۆی بەتەنیا ئەو قەرزانەی کردوە

 

پەرلەمانتارەکەی خولی پێشوی پەرلەمان وتیشی، "حکومەتی هەرێم بەردەوام دەبێت لە دانەوەی ئەو قەرزانە تا کەمدەبنەوە، بەڵام لەبەرئەوەی هیچ زانیارییەکی ورد نییە سەبارەت بەو قەرزانەی کە حکومەت کردویەتی،  ئەو قەرزانەش لای پەرلەمان پەسەند نەکراون و وەزارەتی سامانە سروشتییەکان خۆی بەتەنیا ئەو قەرزانەی کردوە، بۆیە رون نییە، ئەو قەرزانە کەی تەواوبن".

خولی پێشو پڕۆژە یاسای سندوقی داهاتە نەوتییەکان پەسەندکراوە، بەڵام کاری پێنەکراوە

 

عیزەت سابیر ئەوەشی وت، "خولی پێشو پڕۆژە یاسای سندوقی داهاتە نەوتییەکانیان پەسەندکردوە، بەڵام کاری پێنەکراوە، ئەگەر ئەو یاسایە کاری پێبکرێت و وردودرشتی داهاتی نەوت دەچێتە ئەو سندوقەوە، ئەوکاتە هەمو پەرلەمانی کوردستان ئاگاداری خەرجکردنی داهاتی نەوت دەبێت".

هێڤیدار ئەحمەد:نەوتی خاو لە بازاڕەکانی جیهان بە چەند بێت نەوتی هەرێمی کوردستان بە 10 دۆلار کەمتر دەفرۆشرێت

 

بەڵام هێڤیدار ئەحمەد، جێگری سەرۆکی لیژنەی دارایی پەرلەمانی کوردستان لە فراکسیۆنی پارتی بە خەندان-ی وت، "نەوتی خاو لە بازاڕەکانی جیهان بە چەند بێت نەوتی هەرێمی کوردستان بە 10 دۆلار کەمتر دەفرۆشرێت، هۆکارەکەشی ئەوەیە کە نەوتی هەرێمی کوردستان لە ئاستی برێنت-دا نیە و هەروەها پێنج دۆلاریشی بۆ کرێی گواستنەوەی نەوتەکەیە بۆ بازاڕەکانی جیهان".

ئاماژەی بەوەشکرد، "لەوکاتەوەی حکومەتی عێراق نەوتی کوردستانی بڕیوە، حکومەتی هەرێم قەرزی کردوە، بۆیە ئێستا کە نەوت دەفرۆشێت قەرزەکانی دەداتەوە".

چیرۆکی داھاتی فرۆشتنی نەوتی کوردستان ھێشتا لەجانتای وەزارەتێک دەرنەچوە 

 

چیرۆکی داھاتی فرۆشتنی نەوتی کوردستان ھێشتا لەجانتای وەزارەتێک دەرنەچوە کە کۆدەکەی بەتەنھا لای وەزیرەکەیەتی، لەخولی ڕابردودا ھەوڵدرا لەڕێگای پەسندکردنی پڕۆژە یاسای سندوقی داهاتە نەوتییەکان کۆدەکە بکەوێتە دەستی پەرلەمان و ئەنجومەنێکی باڵا، بەڵام چونکە کاری پێنەکرا، بۆیە دواجار وەک چاوەڕێدەکرا وردودرشتی داھاتی نەوت ھەر لەبازنەیەکی بچوک و لەتاریکیدا هێڵدرایەوە.

هەرچەندە ئێستا پەرلەمانتاران هاواریان لێهەڵساوە، بەڵام بەبڕوای چاودێران بۆ فەرمانبەرانی ھەرێمێک کەتاڵاوی پاشەکەوتی موچەیان چەشتبێت، ھەرگیز ئەوەندە بەس نیە

 

ئێستاش جارێکی دیکە بەشێک لە پەرلەمانتاران ھاواریان  لێھەڵساوە و دەڵێن کەمتر لە یەک لەسەر سێی ئەوداھاتە دەگەڕێتەوە خەزێنەی حكومەت و وەزارەتی دارایی ھەرێمیش ھەر ئەوەندەی لێ دەزانێت كە بەدەستیدەگات، بەڵام بەبڕوای چاودێران بۆ فەرمانبەرانی ھەرێمێک کەتاڵاوی پاشەکەوتی موچەیان چەشتبێت، ھەرگیز ئەوەندە بەس نیە، چونکە خەڵک چاوەڕێی پەرلەمانێکی بەجوڵەتر و حکومەتێکی باشترن تاوەکو ژیانێکی شایستەتریان بۆ دابین بکات ، بەڵام ئایا خواستێکی ئاوا لەناو واقعی پشک پشکێن و حزب حزبێنی ئێستادا بەدی دێت؟



Copyright © 2016 Xendan.org all rights reserved

designed and developed by AVESTA GROUP