دوای زیاتر لە هەشت كاتژمێر ئاگره‌كه‌ی نۆتردام کوژێندرایەوە
ئیمانوێل ماكرۆن: پێكەوە کڵێسای نۆتردام بنیاتیدەنێینەوە​

- 4/16/2019 11:49:00 AM 1603 جار خوێندراوەتەوە


خەندان-

ئاژانسی فرانس پرێس بڵاویکردەوە، ئه‌و ئاگره‌ی كه‌ له‌ کڵێسای نۆتردام لە پاریس پایته‌ختی فه‌ڕه‌نسا كه‌وته‌وه‌، دوای نزیكه‌ی هه‌شت كاتژمێر و نیو كوژێندرایه‌وه‌.

کەناڵی فرانس پرێس-ی فەڕەنسی راگەیاند، بەیانی ئەمڕۆ دوای هەشت کاتژمێر و نیو ئاگره‌كه‌ی کڵێسای نۆتردام کوژێندرایەوە.

کەنیسەی نۆتردام لەسەدەی 13 دروستکراوە و جگە لەوەی نمونەیەکی پێشکەوتوی هونەری ئەندازیاری بوە، هاوکات سیمبولێکی گەورەی ئاینیش بوە لەفەرەنساو ئەوروپادا.
 
 نۆتردام یەکێک بوە لە بەناوبانگترین شوێنە سەرنجڕاکێشەکان بۆ گەشتیاران و ساڵانە 13 ملیۆن گەشتیار سەردانی کردوە، له‌ ئه‌نجامی ئاگره‌كه‌شدا یه‌كێك له‌ تاوه‌ره‌ 93  مه‌ترییه‌كان و بنمیچی کڵێساکە به‌ ته‌واوه‌تی داڕما.

به‌پێی ئه‌و هه‌واڵانه‌ی كه‌ له‌ میدیای فه‌ڕه‌نسادا بڵاوكراونه‌ته‌وه‌، له‌ تۆڕی كۆمه‌ڵایه‌تی تویته‌ر له‌ ماوه‌ی چه‌ند كاتژمێرێكدا، نزیكه‌ی یەک ملیۆن و 600 هه‌زار تویت سه‌باره‌ت به‌ ئاگره‌كه‌ كراون.

هەرچەندە هێشتا هۆكاری ئاگركەوتنەوەكە نەزاندراوە، بەڵام بەرپرسان پێیانوایە لە ئەنجامی كارەكانی نۆژەنكردنەوەدا ئاگرەكە كەوتبێتەوە.

ئەو بینا 856 ساڵەی فەڕەنسا كە لە جیهاندا ناسراوە و سەرباری سەرجەم جەنگەكان بەپێوە ماوە و وەك سیمبولێك نیشاندەدرا، بەڕێژەیەكی زۆر زیانی پێگەیشت و ئەمەش ئەوروپییەكان و بەتایبەت فەڕەنسییەكانی نیگەران كرد.

ئیمانوێل ماكرۆن، سەرۆک كۆماری فەڕەنسا ئاگرەكەی بە تراژیدیایەك ناوبرد و وتی، "دەبێت شانازی بكەین، چونكە ئەم کڵێسایە بەرلە 800 ساڵ ئێمە دروستمانكردوە و گەورەمان كردوە و بەرەوپێشمان بردوە، ئەمشەو بە شێوەیەكی رەها دەیڵێم، پێكەوە بنیاتی دەنێینەوە".



Copyright © 2016 Xendan.org all rights reserved

designed and developed by AVESTA GROUP