کەنیسە مێژوییەکەی پاریس داڕماو کاردانەوەی ناوخۆیی و جیهانی بەدواداهات

- 4/15/2019 10:33:00 PM 16755 جار خوێندراوەتەوە

خەندان- 
ئێوارەی ئەمڕۆ کەنیسەی نۆتردام لەناوەڕاستی پاریس گری گرت و بەهۆیەوە بورجی کەنیسەکە و نهۆمەکانی سەرەوەی داڕمان.

کەنیسەی نۆتردام لەسەدەی 13 دروستکراوە و جگەلەوەی نمونەیەکی پێشکەوتوی هونەری ئەندازیاری بوە، هاوکات سیمبولێکی گەورەی ئاینیش بوە لەفەرەنساو ئەوروپادا. 
 نۆتردام یەکێک بوە لە بەناوبانگترین شوێنە سەرنجڕاکێشەکان بۆ گەشتیاران و ساڵانە 13 ملیۆن گەشتیار سەردانی کردوە.

بەردەوامی ئاگرەکە و داڕمانی بەشێکی زۆری کەنیسەکە ئیمانیۆل ماکرۆنی سەرۆکی ئەو وڵاتە و سەرۆک وەزیران و سەرۆکی شارەوانی پاریسی پەلکێشی شوێنی روداوەکە کرد.
وەزیری ناوخۆش پاش داڕمانی بورجی کەنیسەکە وتی 400 تیمی ئاگرکوژێنەوە رەوانەی شوێنی ئاگرەکە کراون.

لەکاردانەوەیەکیشدا، دۆناڵدترەمپی سەرۆکی ئەمریکا رایگەیاند ئاگرەکە زۆر مەترسیدارە و کەنیسەکەی بەبەشێک لەکولتوری جیهان لەقەڵمداو رایگەیاند نۆتردام لەدەرەوەی سنورەکانی وڵاتێکی دیاریکراوەوەیە و لەسەروی هەمو جیاوازییەکانەوەیە.

هاوکات داڕمانی کەنیسەیەک کە ڕەگوڕیشەیەکی مێژویی هەیە و بەرهەمی بیرو ئەندازەی چەند سەدەیەک بەرلەئێستای پاریس و ئەوروپییەکانە، فەرەنسییەکانی شۆک کردوە و بەدەم ئازارو گریانەوە نوسیویانە " پاریس بەبێ نۆتردام پاریس نیە" 

هاوڵاتییەکی دیکە نوسیویەتی "فەرەنسا بەبێ نۆتردام مەملەکەتی شێتییە".

لەئێستاشدا ژمارەیەکی زۆر لەهاوڵاتیانی پاریس لەنزیکی ئاگرەکە کۆبونەتەوە ودروشمی ئاینی دەڵێنەوە.
 

نیشانەکردن :

#فه‌ڕه‌نسا

Copyright © 2016 Xendan.org all rights reserved

designed and developed by AVESTA GROUP