هەواڵی ئەمڕۆ

منداڵێك لە جەنگی سوریا هەڵهات و لە كەنەدا "خۆی كوشت"

- 4/15/2019 3:10:00 PM 9377 جار خوێندراوەتەوە

خەندان-

سەرچاوەی هەواڵە جیهانیەكان رایانگەیاند، منداڵێكی سوری كە تەمەنی تەنها نۆ ساڵە لە كەنەدا لە ماڵی خۆیاندا "خۆی هەڵواسیوە" و تا ئێستاش هۆكارەكەی نەزانراوە.

ئاژانسی هەواڵی گڵۆباڵ نیوز-ی كەنەدی بڵاویکردەوە، منداڵێكی تەمەن نۆ ساڵ بە ناوی ئەمەل، كە ماوەی سێ ساڵە بەهۆی جەنگی سوریاوە لەگەڵ خانەوادەكەی رویانكردوەتە كەنەدا، شەممەی رابردو 13ی نیسان لە ماڵی خۆیان خۆی هەڵواسیوە و "كۆتایی بە ژیانی خۆیهێناوە". 
 سێ ساڵ لەمەوبەر بەهۆی گرژیی و ئاڵۆزیەكانی سوریا خانوەكەیان خاپوربوە و بەوهۆیەوە لەگەڵ خانەوادەكەی رویانكردوەتە كەنەدا

 

ئەو منداڵە ناوی ئەمەل شتیوی-ەو پێش سێ ساڵ بەهۆی گرژیی و ئاڵۆزیەكانی سوریا خانوەكەیان خاپوربوە و بەوهۆیەوە لەگەڵ خانەوادەكەی رویانكردوەتە كەنەدا و لەوێ مافی پەنابەریان وەرگرتوە.

ئاژانسی گلۆباڵ نیوز-ی كەنەدی لەوبارەیەوە رایگەیاندوە، بەپێی وتەكانی خێزانەكەی، ئەمەل ماوەی مانگێكە لە لایەن هاوڕێكانی قوتابخانەیەوە روبەڕوی توانج دەبوەوە و بوەتە هۆی ئەوەی پەنا بۆ خۆكوشتن ببات.
 بڕیاریانداوە كچەكەیان بۆ خوێندنگەیەكی تر بگوازنەوە، بەڵام منداڵانی خوێندنگەكەی پێیان وتوە منداڵانی ئەو خوێندنگەیەی دیكەش خۆشیان ناوێیت

 

نوسرە عەبدولرەحمان، دایكی ئەمەل بە سەرچاوە هەواڵیەكانی راگەیاندوە، بڕیاریانداوە كچەكەیان بۆ خوێندنگەیەكی تر بگوازنەوە، بەڵام منداڵانی خوێندنگەكەی پێیان وتوە "منداڵانی ئەو خوێندنگەیەی دیكەش خۆشیان ناوێیت، ئەوە هۆکاربوە بۆ ئەوەی خۆی بکوژێت".

ئاماژەی بەوەشكردوە، لەگەڵ هاوسەرەكەیدا سەردانی خوێندنگەكەی ئەمەل-یان كردوە و بابەتەكەیان گەیاندوەتە ئیدارەی خوێندنگەكە.
 پۆلیسی كەنەدا لەبارەی روبەڕوبونەوەی ئەمەل بە توندوتیژی جەستەیی یاخود دەرونی لە خوێندنگەكەیدا هیچ بەڵگەیەكیان دەستنەكەوتوە

 

لە بەرامبەردا پۆلیسی كەنەدا رایگەیاندوە، لەبارەی روبەڕوبونەوەی ئەمەل بە توندوتیژی جەستەیی یاخود دەرونی لە خوێندنگەكەیدا هیچ بەڵگەیەكیان دەستنەكەوتوە، تا ئێستاش بە مەبەستی دۆزینەوەی هۆكاری خۆكوشتنی ئەمەل لە لێكۆڵینەوە بەردەوامن.

هەر لەو چوارچێوەیەدا، ئەنجومەنی پەروەردە و فێركردن لە شاری كالگاری بە گڵۆباڵ نیوز-ی راگەیاندوە، "لەبارەی توندوتیژی دژ بە منداڵەكە هیچ بەڵگەیەك نیە و بە مەبەستی دڵنیابونەوە لە نەبونی توندوتیژی و توانج لە نزیكەوە زانیاریمان لە بەڕێوەبەر و مامۆستا و خوێندكارانی خوێندنگەكەی وەرگرتوە".

ئەنجومەنەكە رونیشیكردوەتەوە، سەرەڕای ئەوەی ژمارەیەكی زۆر لە رێكخراوی تایبەت بە كاروباری پەنابەران لە ناوچەكەدا هەیە، دایك و باوكی ئەمەل لە سەرەتای گەیشتنیان بە كەنەدا تا ئێستا سەردانی رێكخراوەكانی تایبەت بە پرسی پەنابەرانیان نەكردوە.


Copyright © 2016 Xendan.org all rights reserved

designed and developed by AVESTA GROUP