خۆپیشاندەرانی سودان: هەوڵدەدرێت مانگرتنەكانی خەرتوم كۆتایی پێبهێنرێـت

- 4/15/2019 12:44:00 PM 956 جار خوێندراوەتەوە

خەندان-

ئەو چالاكوانانەی خۆپیشاندانەكانی سودان بەرێوەدەبەن رایانگەیاند، هەوڵێك هەیە بۆ كۆتاییهێنان بە مانگرتنی خەڵك لەبەردەم سەرۆكایەتی گشتی سوپای سودان لە خەرتوم-ی پایتەختی ئەو وڵاتە.

هێزێكی سوپای سودان كە لە نزیكەی 20 ئۆتۆمبێلی سەربازی و زرێپۆش پێكهاتوە دەستیانكردوە بە لابردنی ئەو بەربەستانەی كە خۆپیشاندەرانی شەقامی زانكۆ، بە مەبەستی پاراستنی گیانیان لە بنكەی وەزارەتی بەرگری خەرتوم دایانناوە.

بەپێی وتەی شایەتحاڵێك دەیان سەرباز دەستیانكردوە بە لابردنی ئەو بەرد و بەربەستە كۆنكرێتیانەی خۆپیشاندەران دایانناوە و داوایان لە لیژنەكانی پشكنین كردوە پاشەكشە بكەن، بەڵام خۆپیشاندەران رەتیانكردوەتەوە پاشكشەبكەن و لەبەردەم هێزە سەربازیەكەدا پشتێنێكی سەلامەتیان بەرامبەر دەرگای رۆژهەڵاتی زانكۆكەدا دروستكردوە.

هاوكات خۆپیشاندەرانی بەردەم  سەرۆكایەتی گشتی سوپای سودان دروشمەكانی "ئازادی و ئاشتی و دادپەروەری" و "شۆڕش هەڵبژاردەی گەلە" دوپاتكردوەتەوە.

هاوكات شەمسەدین كوباشی، وتەبێژی ئەنجومەنی سەربازی سودان لە كۆنگرەیەكی رۆژنامەوانیدا داوایكرد ئەو بەربەستانە لاببرێن تا ژیان بۆ دۆخی ئاسایی بگەڕێتەوە و ئاماژەی بەوەشكرد، سوپا لە رێگەی بەكارهێنانی هێزەوە بڵاوە بە خۆپیشاندەران ناكات، بەڵام كار بۆ پاراستنی خۆپیشاندەران و مانگرتوان دەكات.

ئەوە لەكاتێكدایە تەنانەت دوای لەكارلابردنی عومەر بەشیر، سەرۆكی پێشوی سودان و دورخستنەوەی عەوز بن عەوف، وەزیری پێشوی بەرگری سودان لە پۆستەكەی، بە مەبەستی رادەستكردنی حكومەت بە دەسەڵاتێكی مەدەنی مانگرتنی خەڵكی سودان لە بەردەم بەڕێوەبەرایەتی گشتی سوپای سەربازی سودان ماوەی 10 رۆژە بەردەوامە.


Copyright © 2016 Xendan.org all rights reserved

designed and developed by AVESTA GROUP