بەشیر حەداد: بەڵێن دەدەین كاری جدی بۆ قەرەبوكردنەوەی كەسوكاری ئەنفالكراوان بكەین

- 4/14/2019 10:03:00 PM 1529 جار خوێندراوەتەوە

خەندان-

جێگری سەرۆکی ئەنجومەنی نوێنەرانی عێراق، لە وتاری یادی ئەنفالدا لە گەرمیان ڕایگەیاند: میکانیزمی زامنکردنی ئازادی و مانەوەمان، یەکڕیزی نەتەوەیی و پارێزگاریکردنی بەرژەوەندییە نیشتیمانییەکانی کوردستانە نەك شتی دیکە، وتیشی، داوا لە لایەنە سیاسییەکانی کوردستان دەکەم ئەو یەکڕیزییە بپارێزن بۆ ئەوەی پارێزەری خوێنی قوربانیانی کوردستانیان بین.

ئەمڕۆ 14ی4ی2019 شاندێکی پەرلەمانی عێراق بەسەرۆکایەتی د.بەشیر خەلیل حەداد جێگری سەرۆکی ئەنجومەنی نوێنەرانی عێراق، بەشداری یادی ئەنفالیان لە گەرمیان کرد. 
كەیسی ئەنفال دەبەینە نەتەوە یەکگرتووەکان و وەک جینۆسایدی کورد دەیناسێنین

 

بەپێی راگەیەندراوی نوسینگەی رۆژنامەوانی بەشیر حەداد كە گەیشتۆتە خەندان، لەو یادەدا حەداد وتارێکی پێشکەشکردوە بە ناوی سەرۆکایەتی پەرلەمانی عێراقەوە، لە وتارەکەیدا چەندین پەیامی لە خۆ گرتوە، کە ئاماژەدان بوە بە پاراستنی یەکڕیزی ماڵی کورد و سوربون لەسەر سازش نەکردنی مافەکانی گەلی کورد لە بەغدا. ھەروەھا لەبەردەم کەسوکاری ئەنفالکراواندا بەڵێنیدا کاری جدی لەسەر قەرەبوکردنەوەی کەسوکاری قوربانیانی ئەنفال بکەن و ئەم کەیسە بەرنە بەردەم دەرگای نەتەوە یەکگرتووەکان و وەک جینۆسایدی کورد بیناسێنن. 

لەبەشێکی دیکەی قسەکانیدا حەداد، ئاماژەی بەو کردەوە دڕندانەی ڕژێمی بەعس کرد کە دەرحەق بە گەلی کورد ئەنجامدراوە و ئەو بێدەنگییەی جیھانی ئازاد و دەوڵەتانی ئیسلامی نشین لە ئاست ئەم تاوانە مرۆییەدا. 


نیشانەکردن :

#ئه‌نفال

Copyright © 2016 Xendan.org all rights reserved

designed and developed by AVESTA GROUP