پۆلیسی سلێمانی: نۆ ملیۆن دینار بۆ كەسوكاری كۆچكردویەك گەڕێنرایەوە

- 4/14/2019 1:37:00 PM 2510 جار خوێندراوەتەوە

خەندان-

پۆلیسی سلێمانی رایگەیاند، هێزەكانی بنكەی پۆلیسی ڕزگاری بڕی نۆ ملیۆن دیناریان گەڕاندەوە بۆ كەسوكاری هاوڵاتییەك كە چەند ڕۆژێك لەمەو پێش لەلایەن كوڕەكەیەوە كوژرا.

راگەیاندنی پۆلیسی سلێمانی بڵاویکردەوە، دوای ئەوەی هێزەكانی بنكەی پۆلیسی ڕزگاری بەمەبەستی پشكنین چونە ماڵی ئەو هاوڵاتییەی كە لەلایەن كوڕەكەیە كوژرابو، لەكاتی پشكنینی ماڵی كۆچكردو بڕی نۆ ملیۆن دینار لەلایەن هێزەكانی پۆلیس دۆزرایەوە كە كەسوكاری كوژراوەكە هیچ ئاگاداری ئەو بڕەپارەیە نەبون و بەئامانەتەوە پارەكە ڕادەستی كەسوكاری كوژراوەكە كرایەوە.

ئاماژە بەوەشکراوە، لەبەرامبەردا عەمیدی مافپەروەر ئاسۆ شێخ تەها بەڕێوەبەری پۆلیسی پارێزگای سلێمانی سوپاس و دەستخۆشی خۆی گەیاندە ئەفسەرو كارمەندنی بنكەی پۆلیسی رزگاری.

چوارشەمەی رابردو 10ی ئەم مانگە، پۆلیسی سلێمانی بڵاویکردەوە، لەگەڕەكی چوارباخی شاری سلێمانی باوكێک لەلایەن کوڕەکەیەوە ،بەچەقۆ کوژراوە و دواتر هەڵهاتوە.

بەپێی راگەیەندراوەکەی پۆلیسی سلێمانی، "كوژراوەكە لە دایکبوی ساڵی 1968 ەو كێشەی خێزانی هەبوە و ماوەی دو مانگ دەبێت لە هاوسەرەكەی جیابوەتەوە، لەگەڵ كوڕەكەیدا بوە بەدەمەقاڵێیان و لەئەنجامدا كوڕەكە چەند چەقۆیەكی لەباوكی داوەو بەو هۆیەوە گیانی لەدەستداوە".


Copyright © 2016 Xendan.org all rights reserved

designed and developed by AVESTA GROUP