سەرۆک بەرهەم: تاوانەکانی رژێمی پێشو تاوانی گەورەبون بۆ ریشەکێشکردنی بونی نەتەوایەتی و ناسنامەی خەڵکی کوردستان

- 4/14/2019 11:45:00 AM 2844 جار خوێندراوەتەوە

خەندان-

د. بەرهەم ساڵح، سەرۆک کۆماری عێراق رایگەیاند، تاوانەکانی رژێمی پێشو دەرحەق خەڵکی کوردستان تاوان لە یاد نەچون، تاوانی گەورە بون دژ بە مرۆڤایەتی بۆ ریشەکێشکردنی بوونی نەتەوایەتی و ناسنامەی خەڵکی کوردستان.

ئەمڕۆ  سەرۆک کۆماری عێراق سەردانی سەماوەی کرد و لەمیانی وتارێکیشیدا بۆ گەلی عێراق و ژمارەیەک لە کەسوکاری ئەنفالکراوان رایگەیاند، "تاوانەکانی رژێمی پێشو دەرحەق خەڵکی کوردستان تاوان لە یاد نەچون، تاوانی گەورە بون دژ بە مرۆڤایەتی بۆ ریشەکێشکردنی بوونی نەتەوایەتی و ناسنامەی خەڵکی کوردستان، سەدام بەجێگەی حەقی خۆی گەیشت، بەسزای خۆی گەیشت".

 

دەقی وتاری سەرۆک کۆماری عێراق

لە ساڵیادی ئەنفالدا لەگەڵ کەسوکاری خۆم لە ئەنفالکراوەکان هاتومەتە خزمەتان، هاتوینەتە بیابانی سەماوە، لەکاتێکدا لە دوای 31 ساڵ گۆڕێکی تری بەکۆمەڵی خەڵکی لێقەوما و مەزڵومی کوردستان دەدۆزینەوە. سوپاسی و پێزانینم بۆ خەڵکی سەماوە بۆ پارێزگا و هێزە ئەمنیەکانی سەماوە.

تاوانەکانی رژێمی پێشو دەرحەق خەڵکی کوردستان تاوان لە یاد نەچون، تاوانی گەورە بون دژ بە مرۆڤایەتی بۆ ریشەکێشکردنی بوونی نەتەوایەتی و ناسنامەی خەڵکی کوردستان، سەدام بەجێگەی حەقی خۆی گەیشت، بەسزای خۆی گەیشت، کەسوکاری ئەنفال ئەمڕۆ هاتون بۆ بەسەرکردنەوەی ئازیز و نازدارەکانیان کە هیوادارین زو بەزوو بگەڕێنەوە زێدی باو و باپیرانی خۆیان و شادبنەوە بەنیشتمانەکەی خۆیان لە کوردستان، بەڵام پەندێکی گەورەشە زوڵم بۆ کەس ناچێتەسەر، ئەو رۆژگارەی پشتیوانی هەموو دونیای هەبو، خەڵکی کوردستان و خەڵکی عێراقیش تەنیا روبەڕوی داپڵۆسین و راگواستن و کیمیاباران و ئەنفال دەبونەوە.

 بە خەبات و تێکۆشان و پێداگری ئەو خەڵکە، بەجوامێری کەسوکاری سەربەزی ئەنفال و شەهیدەکانمان سەدام کۆتایی هات و وەزعێکی تازە هاتوەتە کایەوە لە عێراقدا، دەمانەوێت جارێکی تر ببڕای ببڕ نەهامەتیەکانی ئەنفال و دیکتاتۆریەتی تیادوبارە نەبێتەوە، پێمان وابو بە تەواوی بنبڕکراوە، بەڵام بە سەرهەڵدانی و داعش و کۆمەڵکوژیەکانی داعش دەرحەق بە پێکهاتەکانی عێراق و کوردستان و ئێزیدیەکان و خەڵکی تر وەبیرهێنانەوەیەکی گەورەبو بۆ هەمومان کە ئەو رەوتە ئەو بیرکردنەوەیە هێشتا ئاسەواری ماوە، بۆیە پێویستە هەم خەڵکی کوردستان هەم پێکهاتەکانی تری عێراق خەڵکە پەرۆش و دیموکرات خوازەکان پێکەوەبین، هەماهەنگ بین، هاوکاربین، نەهێڵێین جارێکی تر دیکتاتۆریەت روبکاتەوە ئەم وڵاتە، نەهێڵین جارێکی تر خێر و بێری ئەم وڵاتە بۆ داپڵۆسین و کوشتن و لەناوبردن بێت.

ئەو رۆژگارەی سەدام بە کیمیاباران و ئەنفال لە گەرمیان لە چەمچەماڵ لە دۆڵی جافایەتی لە دەشتی کۆیە لە بارزان لە بادینان خەڵکی کوردستانی قەڵاچۆ ئەکرد تەنیا بوین، بەس شاخەکانی کوردستانمان پشت و پەنابون، بۆ ویژادن و بۆ مێژوش ئەو سەردەمانە خەڵکی سەماوە باوەشیان بۆ زۆر لە رزگاربوانی ئەنفال کردەوە و هەماهەنگ و هاوسۆز بون لەگەڵمان، ئەوانیش وەکو ئێمە دوچار زوڵم و نەهامەتی وە داپڵۆسینی سەدام بون.

گۆڕە بەکۆمەڵەکانی محاویل و ئەهوار و ناوچەکانی تری خواروی عێراق شایەتی ئەوەن، بۆیە پەنگی مێژو زوڵم ناچێتە سەر، پەنگی مێژو ماف و راستی و ئازادی هەرسەردەکەوێت، پەنگی مێژوش خەڵکە خێرخوازەکەی کوردستان و خواروی عێراق هەمیشە هەماهەنگ و هاوکارن، بۆ روبەڕوبونەوەی دیکتاتۆریەت و کۆمەڵکوژی، من ناڵێم کۆتایی خەممان بێت، خەمەکەمان قوڵە، برینەکەمان هەرگیزا و هەرگیز ساڕێژنابێت، بەڵام بەڵکە بتوانین خزمەتی کەسوکاری ئەنفال بکەین، بەڵکە بتوانین ئەرکی سەرشانی خۆمان بەرامبەر بە ئەم خەڵکە میهرەبان و جوامێرە بەجێبێنین.

من ئەمڕۆ شانازی ئەکەم لەگەڵ ئەم کەسوکارەم، شانازی ئەکەم لەگەڵ کۆمەڵێک کوڕ و کچی تری ئەنفالیشم، کە لە گۆڕە بەکۆمەڵەکانی ئەنفالەوە گەڕاونەتەوە و ئێستا پێگەیشتون، مامۆستای زانکۆن، خەڵکی پسپۆڕ و لێهاتوون، خزمەتی کەسوکاری خۆشیان و نیشتیمانەکەی خۆشیان دەکەن، ئەوانەن رابردوی پڕبەسەرهات و کارەساتباری وڵاتەکەی خۆمان، بەڵام ئەوانەشن بەپێداگیری و خۆشەویستی خۆیان بۆ نیشتیمان و گەلەکەیان ئایندەیەکی گەشیش بۆ ئەم وڵاتە ئەنەخشێنن.

هیوادارم ئەم بۆنەیە هەمیشە یادکردنەوەکەی بۆ ئەوە بێت ئەو کارەساتانەمان لە بیرنەچێتەوە، لە بیرشمان نەچێتەوە کە ئێمە قەرزارباری کەسوکاری شەهید و ئەنفالکراوانین، چیمان پێبکرێت بۆیان کەمتەرخەمی ناکەین، من دڵنیایان دەکەم چۆن لە کوردستان لە خزمەتیانا بوم وەهەوڵمداوە ئەوەی پێمبکرێت بۆیان دابینبکەین، لە بەغداشەوە بەهاوکاری و هەماهەنگی لەگەڵ حکومەتی عێراق و دەزگاکانی و لەگەڵ خەڵکە خێرخواو دڵسۆزەکان بۆ ئەوانیش و کەسوکاری گۆڕە بەکۆمەڵەکانی خواروی ناوچەکانی تری عێراق هەماهەنگ بین بۆ ئەوەی ژیانێکی شایستە و بەڕێز بۆ ئەو کەسوکارانەی خۆمان دابین بکەین.

دوبارە زۆر زۆر بەشداربونتان دەکەم لەم بۆنەیەدا.



Copyright © 2016 Xendan.org all rights reserved

designed and developed by AVESTA GROUP