بەپەلە

"هەوڵیداوە بچێتە سلێمانی"
ئاسایشی گەرمیان: تیرۆرستێکی داعشمان دەستگیرکردوە

- 4/11/2019 12:42:00 PM 4089 جار خوێندراوەتەوە

خەندان-

ئاسایشی گەرمیان رایگەیاند، "تیرۆرستێکی داعشیان" دەستگریکردوە کە چەندین تاوانی جۆراوجۆری ئەنجامداوە، هەوڵیداوە لە کەلارەوە بچێتە شاری سلێمانی.
بەرپرسی گواستنەوەی چەکدارەکانی داعش بوە لە نێوان کەرکووک و سنووری پەڵکانە

 

بەڕێوەبەرایەتی ئاسایشی گەرمیان لە راگەیەندراوێکدا بڵاویکردوەتەوە، "دوای ئەوەی رۆژی 2/4/2019 لەلایەن هێزەکانی بەڕێوەبەرایەتی ئاسایشی گەرمیانەوە لە شاری کەلار کەسێکی گومانلێکراو بەناوی(س،ن،ا) بە ناسنامەی ساختەوە دەستگیرکرا و لە کاتی لێکۆڵینەوەدا لە بەردەم دادوەری لێکۆڵینەوە دانی بەوەدا ناوە کە چەکداری رێکخراوی تیرۆریستی داعش و سەر بە ولایەتی کەرکوک بوە بەرپرسی گواستنەوەی چەکدارەکانی داعش بوە لە نێوان کەرکووک و سنووری پەڵکانە".
 بە مەبەستی خۆحەشاردان بە ناسنامەی ساختەوە هاتوەتە سنوری هەرێمی کوردستان

 

ئاسایش دەشڵێت، "ئەو چەکدارە لە سنورەکانی حەویجە و کەرکوک و سلێمان بەگ بەشداری چەندین شەڕ و کاری تیرۆریستی کردوە، هەروەها لە بەشی ئەمنی لە سنوری حەویجە و پەلکانە کاری کردوە و دوای لە ناوچونی داعش لە سنورەکە بە مەبەستی خۆحەشاردان بە ناسنامەی ساختەوە هاتوەتە سنوری هەرێمی کوردستان و هەوڵیدابو لە شاری کەلارەوە بڕوات بۆ شاری سلێمانی، بەڵام لەلایەن هێزەکانی ئاسایشەوە دەستگیرکراوە و روبەڕوی یاسا کراوەتەوە".

تۆمەتبارەکە بەڕەگەز عەرەبە و لە دایکبوی 1997 و دانیشتوی شارۆچکەی قەرەتەپە بوە و خێزاندارە و لە لایەن دادوەری لێکۆڵینەوەوە بەپێی ماددەی(2)ی تیرۆر راگیراوە و لێکۆڵینەوەش لەگەڵیدا بەردەوامە.

نیشانەکردن :

#ئاسایش #گەرمیان #داعش

Copyright © 2016 Xendan.org all rights reserved

designed and developed by AVESTA GROUP