وەزارەتی دارایی بڕیاریدا بە خەرجكردنی جیاوازی موچە و دەرماڵەی موچە خۆران

- 4/1/2019 7:42:00 PM 127845 جار خوێندراوەتەوە

خەندان-

ئەمڕۆ ١ی نیسان وەزارەتی دارایی و ئابوری حکومەتى هەرێم بڕیاریدا بە خەرجکردنەوەى جیاوازیی موچە و دەرماڵەى موچەخۆران.

بەپێی نوسراوێك كە وێنەیەكی دەست خەندان كەوتوە، وەزارەتى دارایی حكومەتی هەرێم بڕیاریدا موچەى ئەوانەى کە بە هەڵە کەمتر یان زیاتر (لە موچە و دەرماڵەكان)ى شایستەیان بۆ خەرجکراوە، بەهۆى نەمانى پاشەکەوتکردنى موچە لە مانگى کانونى یەکەمى 2018 و بە مەبەستى چارەسەرکردنى ئەو هەڵانە بڕیاردرا بە بەردەوامبون و کارکردن بە ناوەڕۆکى ڕێنماییەکان.

پێویستە بەپێی مانگەکانى شایستەبوون لە خەرجکردنەوەى جیاوازیی موچە و دەرماڵە ڕەچاوى ڕێژەى پاشەکەوتى موچە بکرێت

 

ئەوەشخراوەتەرو كە پێویستە بەپێی مانگەکانى شایستەبوون لە خەرجکردنەوەى جیاوازیی موچە و دەرماڵە ڕەچاوى ڕێژەى پاشەکەوتى موچە بکرێت.

هەر بەپێی نوسراوەكە لە حاڵەتێکدا ئەگەر کەمتر لە شایستەى موچە و دەرماڵە بۆ موچەخۆران خەرجکرابێت، ئەوا مانگانە تاوەکو بڕى یەک ملیۆن دینار خەرج بکرێتەوە،و ئەگەر گوژمەى جیاوازى موچە و دەرماڵەى موچە خۆرەکە زیاتر بێت لە 10 ملیۆن دینار، پێویستە ڕەزامەندیی بەڕێوەبەرایەتی گشتی خەرجییەکانى بۆ وەربگیرێت.

وەزارەتی دارایی بڕیاریشی داوە لە سەرەتای ئەمساڵەوە تاكو كۆتایی ساڵی 2019 كار بە نوسراوەكە بكرێت

 



Copyright © 2016 Xendan.org all rights reserved

designed and developed by AVESTA GROUP