ئەنجلینا جولی داوای بەشداری ژنان لەکۆبونەوەی ئاشتی ئەفغانستان دەکات

- 3/30/2019 12:29:00 PM 2724 جار خوێندراوەتەوە

خەندان-

ئەنجلینا جولی، نێردەی تایبەتی نەتەوە یەکگرتوەکان بۆ پەنابەران داوایکرد ژنان لەکۆبونەوەی ئاشتی ئەفغانستان و ئەمریکا بەشدارییان پێبکرێت.

بەپێی ئاژانسی رۆیتەرز، ئەنجلینا جولی،نێردەی تایبەتی نەتەوە یەکگرتوەکان بۆ پەنابەران لەمیانی کۆبونەوەیەکی لەگەڵ وەزیرو دپلۆماتکاران لە نەتەوە یەکگرتوەکان رایگەیاند، پێویستە ژنانی ئەفغانستان بەشدارییان پێبکرێت لە کۆبونەوەکانی ئاشتی نێوان ئەفغانستان و ئەمریکا.

 

ژنانی ئەفغانستان ترسیان لە دەستپێکردنەوەی گفتوگۆکانی ئاشتی نێوان ئەمریکا و رێکخراوی تاڵیبان هەیە

 

ژنانی ئەفغانستان ترسیان لە دەستپێکردنەوەی گفتوگۆکانی ئاشتی نێوان ئەمریکا و رێکخراوی تاڵیبان هەیە، کە ساڵی رابردو دەستیان پێکردوەتەوە و پێیانوایە لە ئەگەری سەرکەوتنی جارێکی دیکە مافەکانیان دەکەوێتە مەترسییەوە.


هەزاران ژنی ئەفغانی ژیانی خۆیان خستوەتە مەترسییەوە بۆ داواکردنی مافەکانی خۆیان و مناڵەکانیان

 
لەوبارەیەوە ئەنجلینا جولی رایگەیاندوە، "هەزاران ژنی ئەفغانی ژیانی خۆیان خستوەتە مەترسییەوە بۆ داواکردنی مافەکانی خۆیان و مناڵەکانیان، بەڵام لە کۆبونەوەکان پشتگوێ خراون، ئەوە کارێکی خراپە و ترس و نیگەرانی زیاتر دروستدەکات".

هەرچەندە تاڵیبان بەفەرمی رایگەیاندوە، سیاسەتێکی باشتر بۆ مافی ژنان و ئازادی زیاتر پەیڕەو دەکەن، بەڵام نێردەی تایبەتی ئەمریکا بۆ بنیاتنانەوەی ئەفغانستان دەڵێت، دەستورەکەیان رێگری لە هەندێک مافی ژنان دەکات.



Copyright © 2016 Xendan.org all rights reserved

designed and developed by AVESTA GROUP