وەزارەتی بەرگری عێراق موچەی پێشمەرگە دەنێرێت یاخود نا

- 3/24/2019 10:07:00 PM 36721 جار خوێندراوەتەوە

خەندان-

هەرچەندە لە پرۆژە یاسای بودجەی 2019 دا پشکی پێشمەرگە بەبڕی 68 ملیار دینار بۆ موچەی مانگانە لەسەر وەزارەتی بەرگری عێراق دیاریکرا، بەڵام تا ئێستا ئەو بڕە پارەیە بۆ هەرێم نەنێردراوە و کاتی ناردنەکەشی دیار نییە.

جەبار یاوەر ئەمینداری گشتی وەزارەتی پێشمەرگە بە خەندان-ی راگەیاند، تا ئێستا هیچ بڕیارێکی فەرمی نەهاتوە بۆ ناردنی بڕە پارەکە و دواکەوتنەکەشی هیچ پەیوەندی بە وەزارەتی پێشمەرگەوە نییە، بەڵکو پەیوەندی بە چۆنێتی خەرجکردنیەوە هەیە لەلایەن وەزارەتی بەرگری و وەزارەتی دارایی عێراقەوە.

لەماوەی رابردودا لیژنەیەکی وەزارەتی پێشمەرگە سەردانی بەغدای کرد، بەمەبەستی ناردنی ئەو بڕە پارەیە بۆ وەزارەتی پێشمەرگە، بەڵام هیچ ئەنجامێکی نەبو.

ئەمینداری گشتی وەزارەتی پێشمەرگە دەشڵێت، ئەوان بە نوسراوی فەرمی داوایانکردوە کە وەزارەتی بەرگری عێراق ئەو بڕە پارەیە بنێرێت، چونکە لە یاسای بودجەدا هەیە و پێشیانڕاگەیاندون و هەر پێویستیەک هەیە لە لایەن وەزارەتی پێشمەرگەوە جێبەجێبکرێت و ئەوان جێبەجێیدەکەن".

جەبار یاوەر ئاماژەی بەوەشدا، وەزارەتی بەرگری عێراق نوسراویکردوە بۆ وەزارەتی دارایی بۆ خەرجکردنی ئەو بڕە پارەیە، بەڵام وەزارەتی دارایی وەڵامی نوسراوەکەی نەداونەتەوە.

لای خۆشیەوە ناسر هەرکی ئەندامی لیژنەی ئاسایش و بەرگری پەرلەمانی عێراق بە خەندان-ی راگەیاند، ناردنی ئەو بڕە پارەیە پەیوەندی بە وەزارەتی داراییەوە نییە، بەڵکو دەبێت وەزارەتی بەرگری عێراق بینێرێت، چونکە ئەو بڕە پارەیە لە سەر وەزارەتی بەرگری عێراقە، لەلایەن وەزارەتی داراییەوە بڕیاری لەسەردراوە بۆ ناردنی و ئەوانیش وەک لیژنەی ئاسایش و بەرگری بەدواداچونی بۆ دەکەن.



Copyright © 2016 Xendan.org all rights reserved

designed and developed by AVESTA GROUP