هانا بۆ مەرجەعی باڵای شیعەكان دەبات
پارێزگای موسڵ بۆ سیستانی: گەر رەزامەندبن یەك خولەكیش بیری لێناكەمەوە و دەستلەكاردەكێشمەوە

- 3/23/2019 6:51:00 PM 7414 جار خوێندراوەتەوە

خەندان-

وەك بەهاناوە چونێك، پارێزگاری موسڵ نامەیەك بۆ مەرجەعی باڵای شیعەكان لە نەجەف دەنێرێت و پێی دەڵێت گەر رەزامەندبن یەك خولەكیش بیری لێناكەمەوە و دەستلەكاردەكێشمەوە.

پێشتر پارێزگاری موسڵ رایگەیاندبو كە عەلی سیستانی گەورە مەرجەعی شیعەكانی عێراق بە نوێنەری خۆی نازانێت.
مەرجەعیەت رۆڵی باڵای هەبوە لە چارەسەركردنی كێشەكان

 

لە نامەیەكدا نۆفەل حەمادی ئەلسوڵتان  پارێزگاری موسڵ رونكردنەوە لەسەر ئەو لێدوانەی پێشوی بۆ مەرجەعی باڵای شیعەكان ناردوە.

لە نامەكەدا دەڵێت:"لێتان ناشارمەوە بەهۆی ئەو بارودۆخەی كەبەسەر حكومەتی خۆجێی پارێزگاكەمان هات هەر لە فشارو تۆمەتباركردنی ناڕەوا و ئەو كۆستەی بەسەر شارەكەمان هات، نەمتوانی بەشێوەیەكی راست و دروست و بەشێوەیەكی شیاو ئەو پەیوەندییەی نێوان حكومەتی خۆجێیی و مەرجەعیەتی باڵا دەرببڕم كە رۆڵێكی زۆری هەبو لەرزگاركردنی شارەكەمان لەدەستی داعش".

پارێزگاری موسڵ ئەوەشی نوسیوە:"لێرەوە رایدەگەیەنم لەكاتی رەزامەندی بەڕێز مەرجەعیەتی باڵا بۆ دەستلەكاركێشانەوەم بۆ یەك خولەكیش بیری لێناكەمەوە و دەستلەكاركێشانەوەی خۆم پێشكەشدەكەم". 

مەرجەعیەت لە دڕندەیی داعش ڕزگاریی كردین

 

لە درێژەی نامەكەیدا پارێزگاری موسڵ وێڕای دەربڕینی رێزی خۆی بۆ مەرجەعی باڵای شیعەكان دەشڵێت:"مەرجەعی باڵا هەمیشە رۆڵی گەورەی خۆیان دەبینن لە چارەسەركردنی كێشەكان، وەك ئەو بڕیارەی دژی داعش و جەنگی داعش دەریانكرد بۆ كۆتایی پێهێنانیان و لەدڕەندەیی داعش رزگاریی كردین.

لە كۆتاییشدا نوسیویەتی:"ئەم داواكارییەم دەخەمە بەردەستی بەڕێز مەرجەعیەتی باڵاو چاوەڕوانی وەڵامی بەڕێزیانم پاش پاراستنی ئەو ئەمانەتەی لەماوەی رابردودا لەسەر شانم بوە".

ناردنی ئەو نامەیە بۆ مەرجەعیەتی باڵای شیعەكان دوای دروستبونی فشار دێت لەسەر پارێزگاری موسڵ بۆ دەستلەكاركێشانەوەی لە پۆستەكەی بەهۆی روداوی نقومبونی بەلەمێك لە جەزیرەی دیجلە كە بوە هۆی گیانلەدەستدانی زیاتر لە 105 كەس كە زۆربەیان ژن و منداڵ بون.

 

نیشانەکردن :

#موسڵ #شیعە #داعش

Copyright © 2016 Xendan.org all rights reserved

designed and developed by AVESTA GROUP