لە زیمبابۆی و موزەمبیق ژمارەیەکی زۆر خەڵک گیانیانلەدەستدا

- 3/18/2019 8:42:00 PM 779 جار خوێندراوەتەوە

خەندان-

گێژەڵوکەو بارانێکی بەهێز ئەفریقای باشوری گرتەوە و بەهۆیەوە لانیکەم 157 کەس لەهەردو وڵاتی موزەمبیق و زیمبابۆی گیانیانلەدەستدا.

بەپێی هەواڵێکی ئاژانسی رۆیتەرز، ئەمرۆ دوشەممە گێژەڵوکەو بارانێکی بەهێز بەشێک لەوڵاتانی ئەفریقای باشوری گرتەوە و بەهۆیەوە لانیکەم 157 کەس لەهەردو وڵاتی موزەمبیق و زیمبابۆی گیانیانلەدەستداوە.

رێگەکان داپۆشراون و هێڵەکانی پەیوەندیکردنیش پچڕاون

 

بەپێی زانیارییە میدیاییەکان بەهۆی زریان و گێژەلوکەوە ناوچەکە روبەروی چەندین لافاوی بەهێزبوەتەوە و رێگەکان داپۆشراون و هێڵەکانی پەیوەندیکردنیش پچڕاون.

لەمبارەیەوە رێکخراوی خاچی سوری نێودەوڵەتی رایگەیاند زریان و تۆفانەکەی ئەفریقای باشور وڵاتی مالاویشی گرتۆتەوە لەموزەمبیقیش شاری بیریا زیانی زۆری بەرکەوتوە.

لەزیمبابۆیش ناوچەی (چیمەنیمانی) بەر تۆفان و زریانەکە کەوتوە و لەناوچەکانی دیکەی ئەو وڵاتەی دابڕیوە و لەگەڵیشیدا رەشەبایەکی بەهێز بەخێرایی 170 کیلۆمەتر لەکاتژمێرێکدا ناوچەکەی گرتوەتەوە و لافاو رێگا سەرەکییەکان و پرد و ژمارەیەکی زۆر لەمالەکانی راماڵیوە.
84 کەس لەبیریا گیانیانلەدەستداوە

ئاژانسی هەوالی موزەمبیق بڵاویکردۆتەوە 84 کەس لەبیریا گیانیانلەدەستداوە و وەزیری زانیاری زیمبابۆیش رایگەیاندوە، تا ئێستا ژمارەی قوربانیەکان کە تۆمارکراون 89 کەسن، بەڵام پێدەچێت ژمارەیەکی زیاتری قوربانی تۆماربکرێن.


Copyright © 2016 Xendan.org all rights reserved

designed and developed by AVESTA GROUP