یەکێتی لیژنەی دانوستانکاری گۆڕی
خەندان دوایین پاکێجی یەکێتی بۆ بەشداریکردن لە حکومەت ئاشکرادەکات

- 3/18/2019 6:49:00 PM 66030 جار خوێندراوەتەوە

خەندان-
یەکێتی پاکێجێکی نوێی بۆ بەشداریکردن لە حکومەتی هەرێمی کوردستان ئامادەکردوە و تێیدا وەرگرتنی سەرۆکی پەرلەمانی رەتکردوەتەوە و داوا دەکات سێ وەزارەتی سیادی پێبدرێت، هاوکات شاندی دانوستانکاری بۆ کۆبونەوە لەگەڵ پارتی گۆڕی.

شەممەی رابردو 16ی ئازار، مەکتەبی سیاسی یەکێتی بۆ ئامادەکردنی دوایین پاکێجی داواکاری لە پارتی بۆ وتوێژ لەگەڵ پارتی کۆبوەوە، دواتریش وتەبێژی ئەو حزبە رایگەیاند، دەیانەوێت "هاوبەشێکی راستەقینەی حکومەت بن".

مەکتەبی سیاسی یەکێتی بڕیاری گۆڕینی شاندی دانوستانکاری داوە بۆ گفتوگۆکردن لەگەڵ پارتی

 

سەرچاوەیەک لە مەکتەبی سیاسی یەکێتی تایبەت بەخەندان-ی راگەیاند، لە کۆبونەوەی مەکتەبی سیاسی یەکێتیدا بڕیاری گۆڕینی شاندی دانوستانکاری دراوە بۆ گفتوگۆکردن لەگەڵ پارتی، هاوکات بڕیاریداوە لەکۆبونەوەیان لەگەڵ پارتی رایبگەیەنن، پێیان باش نیە سەرۆکی پەرلەمانی کوردستان وەربگرن، بەڵکو لە بەرامبەردا داوای چەند وەزارەتێکی سیادی دەکەن.

عیماد ئەحمەد سەرۆكایەتی شاندی نوێی یەكێتی دەكات

 

یەکێتی شاندی نوێی بە سەرۆکایەتی عیماد ئەحمەد، ئەندامی مەکتەبی سیاسی و بە ئەندامێتی، رەفعەت عەبدوڵا، عەدنان حەمەی مینا و لاهور شێخ جەنگی و شاڵاو کۆسرەت رەسوڵ و بافڵ تاڵەبانی پێکهێناوە، بۆ کۆبونەوە لەگەڵ پارتی، هاوکات دەستکراوەی کردون بۆ واژۆکردنی داوایین رێککەوتن لەگەڵ پارتی.

سەرچاوەکەی خەندان راشیگەیاند، شاندی یەکێتی لەکۆبونەوەیدا لەگەڵ شاندی پارتی، وەرگرتنی پۆستی سەرۆکی پەرلەمانی کوردستان رەتدەکاتەوە و لە بەرامبەردا داوا دەکات هەریەکە لە پۆستەکانی وەزارەتی سامانە سروشتییەکان و ناوخۆ و دارایی پێبدرێت.

یەکێتی داوا دەکات سەرۆکی هەرێمی کوردستان دو جێگری بۆ دابنرێت

 

خەندان زانیویەتی، یەکێتی داوا دەکات سەرۆکی هەرێمی کوردستان دو جێگری بۆ دابنرێت و یەکێک لە جێگرەکان تایبەت بکرێت بە کاروباری پێشمەرگە و بدرێت بە یەکێتی.

لەبارەی داواکاریەکانی یەکێتی سەرچاوەیەکی باڵای پارتی بە خەندان-ی وت، "پارتی پێناچێت رازیی ببێت بە پێدانی سێ وەزارەتی سیادی بە یەکێتی، بەڵام ئامادەیە لە ئاستی جێگردا سەرجەم جومگەکانی بەڕێوەبردنی لەگەڵدا دابەش بکات".

پارتی رازییە بە پێدانی جێگرێکی سەرۆکی هەرێمی کوردستان بە یەکێتی

 

خەندان ئەوەشی زانیوە، پارتی رازییە بە پێدانی جێگرێکی سەرۆکی هەرێمی کوردستان بە یەکێتی، بەڵام تا هێشتا یەکلایی نەبوەتەوە ئایا دیاریکردنی جێگرەکان بە "دامەزراندن"دەبێت لەلایەن سەرۆکی هەرێمی کوردستانەوە یاخود لە پەرلەمانی کوردستان هاوکات لەگەڵ سەرۆکی هەرێم دەنگیان لەسەر دەدرێت.

کاندیدی پارتی بۆ سەرۆکی هەرێمی کوردستان دەیەوێت جێگرەکانی لە پەرلەمانی کوردستان هاوشێوەی خۆی سوێندی یاسایی بخۆن

 

سەرچاوەیەکی باڵای پارتی دیموکراتی کوردستان بە خەندان-ی وت، نێچیرڤان بارزانی، کاندیدی پارتی بۆ سەرۆکی هەرێمی کوردستان دەیەوێت جێگرەکانی لە پەرلەمانی کوردستان هاوشێوەی خۆی سوێندی یاسایی بخۆن.

پێشتر خەندان لە راپۆرتێکدا بڵاویکردبوەوە، پارتی داوای لە یەکێتی کردوە کۆبونەوەیەک لەبارەی پشک و بەرکەوتەکانی یەکێتی ئەنجامبدەن و لەوبارەیەوە بگەنە رێکەوتنی کۆتایی، پارتی دەیەوێت پێش ناوەڕاستی مانگی نیسانی داهاتو یاسای سەرۆکایەتی هەرێم هەمواربکرێتەوە و سەرۆکی هەرێم هەڵبژێردرێت و سەرۆکی کابینەکە رابسپێردرێت بۆ پێکهێنانی حکومەت.

دەبێت رێککەوتنە سیاسیەکەمان جێبەجێ بکەین

 

لەتیف شێخ عومەر، وتەبێژی یەکێتی دوای کۆبونەوەی شەممەی رابردوی مەکتەبی سیاسی حزبەکەی بە رۆژنامەوانوسانی راگەیاند، "پارتی ئەگەر دەیەوێت حکومەت پێکبێت ئێمەش حازرین، بەڵام دەبێت رێککەوتنە سیاسیەکەمان جێبەجێ بکەین، کە یەکەم خاڵی دەڵێت، هاوبەشی راستەقینەی یەکترین، ئێمە مانایەکمان بۆ دۆزیوەتەوە پارتیش لەوە تێدەگات و شاندەکەمان دەیخاتە بەردەمیان".

ئامادەکردنی پاکێجی نوێی داواکاری لەلایەن یەکێتییەوە لەکاتێکدایە پێشتر پارتی رەزامەندی دەربڕیبو بۆ پێدانی هەریەکە لە پۆستەکانی سەرۆکی پەرلەمانی کوردستان و جێگری سەرۆکی وەزیرانی هەرێم و وەزارەتێکی سیادی و شەش وەزارەتی خزمەتگوزاری بە یەکێتی نیشتیمانی کوردستان لە کابینەکەی مەسرور بارزانی.

یەكێتی وەزارەتی پێشمەرگە بە سیادی نازانێت

 

پارتی داوای لە یەکێتی کردبو، "لە نێوان هەریەکە لە وەزارەتەکانی پێشمەرگە، پلاندانان، داد، کارەبا، خوێندنی باڵاو توێژینەوەی زانستی، پەروەردە، شەهیدان و ئەنفالکراوان، کشتوکاڵ و سەرچاوەکانی ئاو، رۆشنبیری و لاوان و ئەوقاف و کاروباری ئاینی" پاکێجەکەی خۆی هەڵبژێرێت.

سەعدی پیرە، ئەندامی مەكتەبی سیاسی یەکێتی لەبارەی پێدانی وەزارەتی وەزارەتی پێشمەرگە وەک وەزارەتێکی سیادی بە خەندان-ی وت، حزبەکەی ئەو وەزارەتە بە سیادی نازانێت، چونکە تا ئێستا هێزی 70ی یەکێتی و 80ی پارتی هەیە و ئەو کەسەی دەبێتە وەزیری ئەو وەزارەتە رەنگە دەسەڵاتی بەسەر یەکێک لەو دوو هێزەدا نەبێت.



Copyright © 2016 Xendan.org all rights reserved

designed and developed by AVESTA GROUP