دەیان چەکداری بیانی داعش خۆیان رادەستی شەڕڤانان دەکەن

- 3/17/2019 8:25:00 AM 3637 جار خوێندراوەتەوە

خەندان-

ناوەندی راگەیاندنی هێزەکانی سوریای دیموکرات (هەسەدە) رایگەیاند، دەیان چەکداری سوری و بیانی داعش لە باغۆز خۆیان رادەستی هێزەکانیان کردوە.

ناوەندی راگەیاندنی هێزەکانی سوریای دیموکرات (هەسەدە) لە راگەیەندراوێکدا ئاماژەی بەوەکردوە، دوێنێ شەممە دەیان چەکداری سوری و بیانی داعش لە ناوچەی باغۆز چەکەکانیان داناوە و خۆیان رادەستی شەڕڤانان کردوە.

هەروەها دەڵێت، "هەڵمەتی هێزەکانمان لەهاوکاری هاوپەیمانان لە دژی چەکدارانی داعش لە باغۆز بەردەوامە، چەکدارانی داعش گورزی سەختیان بەرکەوتوە، دوێنێش بەدەیان چەکداری داعش لەگەڵ خێزانەکانیان خۆیان ڕادەست کردوین".

هێزەکانی سوریای دیموکرات (هەسەدە) چاوەڕوانن سەرکەوتنیان بەسەر خەلافەتەکەی ڕێکخراوی دەوڵەتی ئیسلامی داعشدا رابگەیەنن، بەڵام واپێدەچێت مۆڵگەیەکی بچوکی گەمارۆدراو کە کەوتوەتە نێو ناوچەیەکی چۆڵەوە لە کەناراوەکانی ڕوباری فورات تا ئێستاکە کۆتایی نەهاتبێت. 

سەرەڕای ئەوەی باغۆز دوایین ناوچەی نیشتەجێبونە كە تا ئێستا لەژێر دەسەڵاتی چەكدارانی داعشدا ماوە، بەڵام جێگەی هەڕەشەیەكی گەورەیە بۆ ناوچەكانی دەوروبەری كە چالاكی توندڕەویان تێدا ئەنجامدەدات.

نیشانەکردن :

#شەڕڤانان

Copyright © 2016 Xendan.org all rights reserved

designed and developed by AVESTA GROUP