هەواڵی ئەمڕۆ

ئەمریکا ئیدانەی هێرشەكەی نیوزلەندا دەكات

- 3/15/2019 8:18:00 PM 2264 جار خوێندراوەتەوە

خەندان-

بەرەبەیانی ئەمڕۆ، لە ناوەڕاستی شاری كریست چێرچ لە نیوزلەندا دو هێرشی چەكداری كرایە سەر دو مزگەوت و بەو هۆیەوە 49 كەس كوژران و 48ی دیكەش برینداربون و سەرۆكی ویلایەتە یەكگرتوەكانی ئەمریكاش ئەو كوشتارەی نیوزلەندا-ی ئیدانەكرد و سەرەخۆشی خۆی بە گەلی نیوزلەندا راگەیاند.

ئەمڕۆ هەینی، دوای ئەو كوشتارەی بەهۆی هێرشێكی چەكداریەوە لە دوو مزگەوت لە نیوزلەندا ئەنجامدرا، دۆناڵد ترەمپ-ی سەرۆكی ویلایەتە یەكگرتوەكان لە هەژماری تایبەتی خۆی لە تۆڕی كۆمەڵایەتی تویتەر رایگەیاند،"گەرمترین هاوخەمی خۆم ئاراستەی گەلی نیوزلەندا دەكەم و هیوای باشترینیان بۆ دەخوازم، ویلایەتە یەكگرتوەكان پشتگیری نیوزلەندایە و هەرشتێكمان پێبكرێت پێشكەشیدەكەین."

لەكاردانەوەیەكیشدا سەرۆك وەزیرانی نیوزلەدا رایگەیاند، ئەو هێرشەی ئەمڕۆ جگەلە كردەوەیەكی تیرۆرستی هیچ پێناسەیەكی دیكەی نیە. 

بەپێی سەرچاوە هەواڵیەكانی ئەو وڵاتە، لە ناوەڕاستی شاری كریست چەرچ لە نیوزلەندا دو هێرشی چەكداری جیاواز كراوەتە سەر دو مزگەوتی شارەكە، بەڵام نەیانتوانیوە ئەوە پشتڕاستبكەنەوە كە چەند كەس بەشداریان لەو هێرشانەدا كردوە.
 
پۆلیس دەڵێت" چواركەسیان دەستگیركردوە كە یەكێكیان تەمەنی لە 20 ساڵیدایە و بەئەنجامدەری هێرشەكە تۆمەتباركراوە، دو پیاو ژنێكی دیكەشیان دەستگیركردوە كە پێدەچێت دەستیان لەهێرشەكاندا هەبوبێت".

دواتر لەگرتەیەكی ڤیدیۆیدا دەردەكەوێت چەكدارەكە دەڵێت" كە تەمەنی 28 ساڵە و خەڵكی ئوستورالیایە و ناوی (برێنتن تارانت)ە و لەسوچێكی مزگەوتی (ئەل نور)ەوە بەشێوەیەكی هەڕەمەكی تەقە لەژن و منداڵ و پیاوی مزگەوتەكە دەكات". 
 



Copyright © 2016 Xendan.org all rights reserved

designed and developed by AVESTA GROUP