شەڕڤانان: بونی ژن و منداڵ رێگرە لەوەی دوایین هەڵمەتی پاککردنەوەی داعش ئەنجامبدەین

- 3/10/2019 11:28:00 AM 2835 جار خوێندراوەتەوە

خەندان-

بەرپرسانی باڵای هێزەکانی سوریای دیموکرات (هەسەدە) رایانگەیاندوە، پێشبینی مانەوەی زیاتری هاوڵاتیانی مەدەنی لەژێر دەستی داعش دەکەن لە باغۆز، بۆ ئەو مەبەستەش ئۆپەراسیۆنە سەربازییەکانیان راگرتوە.

بەپێی ئاژانسی هەواڵی رۆیتەرز، بەرپرسانی باڵای هێزەکانی سوریای دیموکرات رایانگەیاندوە، "پێشبینی مانەوەی هاوڵاتی زیاتری مەدەنی لەژێردەستی داعشدا دەکەن و بەوهۆیەشەوە ئۆپەراسیۆنە سەربازییەکانیان راگرتوە بۆ سەر شارۆچەکەکە".

سەدان خێزان کە زۆربەیان ژن و منداڵی چەکدارەکانی داعش بون ناوچەی باغۆزی سوریایان چۆڵکردوە

 

لەماوەی رابردودا سەدان خێزان کە زۆربەیان ژن و منداڵی چەکدارەکانی داعش بون ناوچەی باغۆزی سوریایان چۆڵکردوە، کە دوایین مۆڵگەی داعشە و کەمتر لە یەک کیلۆمەتر چوارگۆشەیان بەدەستەوە ماوە.

هێزەکانی هێزەکانی سوریای دیموکرات (هەسەدە) کە یەکینەکانی پاراستنی گەل (یەپەگە) پێکهێنەری سەرەکییەتی و هاوپەیمانی نێودەوڵەتی دژی داعش بەسەرۆکایەتی ئەمریکا پشتگیریان دەکات رایانگەیاندوە، بونی ژن و منداڵ رێگرە لەوەی کە دواین هەڵمەتی پاککردنەوەی داعش ئەنجامبدەن.

شەڕڤانان چوار ئۆتۆمبێلی بارهەڵگری گەورەیان رەوانەی باغۆز کردوە بۆ دورخستنەوەی ژن و منداڵە جێماوەکان

شەڕڤانان دوێنێ شەممەش چوار ئۆتۆمبێلی بارهەڵگری گەورەیان رەوانەی باغۆز کردوە بۆ دورخستنەوەی ژن و منداڵە جێماوەکان لە مەیدانی جەنگ.

بەپیی راپۆرتی نەتەوە یەکگرتوەکان، تەنها لە ماوەی دەستپێکردنی دوایین شەڕی داعش لەناوچەی باغۆز، 62 هەزار هاوڵاتی بێلانەوماڵ بون و رەوانەی کامپی هۆڵ کراون، هاوکات لە نێوان پێنج بۆ حەوتی ئەم مانگەشدا نزیکەی پێنج هەزار و 200 کەسی دیکەش گەیەنراونەتە ئەو کامپە.

نیشانەکردن :

#سوریا #شەڕڤانان

Copyright © 2016 Xendan.org all rights reserved

designed and developed by AVESTA GROUP