پیسترین کەشوهەوای پایتەختەکانی جیهان دیاریکران

- 3/5/2019 9:25:00 PM 14199 جار خوێندراوەتەوە
نیودلهی پایتەختی هندستان

خه‌ندان-

توێژینەوەیەک پیسترین کەشوهەوای پایتەختەکانی جیهان دیاریدەکات و بەپێی ئەنجامەکانیشی نیودلهی پایتەختی هندستان پیسترین کەشوهەوای لەجیهاندا هەیە. 

بەپێی هه‌واڵێكى ئاژانسی رۆیتەرز، توێژینەوەکە لەلایەن گروپی "IQ AirVisual" ی سویدی و "گرین پیس"ی هندی ئەنجامدراوە کە داتاو زانیاری کەشوهەوای کۆکردۆتەوە و تێیدا بەراوردی کەشوهەوای 61 پایتەختی جیهان-یان کردوە.

 نیودلهی پایتەختی هندستان پیسترین کەشوهەوای لەجیهاندا هەیە

بەپێی ئه‌نجامه‌كانى توێژینەوەکە، نیودلهی پایتەختی هندستان پیسترین کەشوهەوای لەجیهاندا هەیە و پاش ئەویش هەریەکلە داهکای پایتەختی بەنگلادش و کابوڵی پایتەختی ئەفغانسان دێت، ئاشكراشیكردوه‌  هۆکاری پیسبونی شارى نیودلهی بەهۆی ئۆتۆمبێل و چالاکی پیشەسازی و تەپوتۆز و خۆڵی دروستکردنی بیناکان و دوکەڵی سوتاندنی پاشماوەکانە.

هندستان خاوەنی 15 شارە لەپیسترین شارەکانی جیهان

هاوکات، توێژینەوەکە ئەوەشده‌خاته‌رو، بەپێی پێوەری  "PM2.5" کە لەلایەن رێکخراوی تەندروستی جیهانی بۆبونی گەردیلەی پیس لەهەر مەتر چوارگۆشەیەکدا دانراوە، لەئێستادا کەشوهەوای نیودلهی دو هێندەی کەشوهەوای پەکینی پایتەختی چین پیسە کە پلەی هەشتەمی لەریزبەندییەکەدا وەرگرتوە، و جۆری پیسی ئەو کەشوهەوایەی کە دیاریکراوە مەترسیدارە و دەچێتە سییەکانەوە.

لەماوەی ساڵانی رابردودا چین کە پایتەختەکەی هەمیشە سەرەوەی ریزبەندییەکەی گرتبو شەڕی جێبەجێکردنی ئەو یاسایانەی دەکرد، کە بەرگری لەپاکڕاگرتنی کەشوهەوا دەکات و بەوهۆیەشەوە توانیویەتی کەمێک خۆی لەریزبەندییەکە بهێنێتەوە خوارەوە، هه‌روه‌ك چۆن ئەوەش ئاشکراکراوە هندستان خاوەنی 15 شارە لەپیسترین شارەکانی جیهان. 


نیشانەکردن :

#جیهان

Copyright © 2016 Xendan.org all rights reserved

designed and developed by AVESTA GROUP