بەپەلە

کاریگەرترین وڵاتانی جیهان

- 3/2/2019 11:47:00 PM 12012 جار خوێندراوەتەوە

خەندان- 

راپۆرتی (پلەبەندی جیهان و ئەمەریکا نیوز) دواین لیستی کاریگەرترین وڵاتانی جیهانی بڵاوکردەوە و بەپێی ریزبەندیەکە تا ئێستا ئەمریکا لەپلەی یەکەمی ریزبەندییەکەدا ماوەتەوە. 

راپۆرتەکە کاریگەری سیاسی و ئابوری و سەربازی و کولتوری وڵاتانی بەهەند وەرگرتوە لەگەل ئەو هاوپەیمانێتییانەی کە دروستیان دەکەن.

ئەم ریزبەندییە بەهاوکاری زانکۆی پێنسلڤانیا ئامادەکراوە و تێیدا رای 20هەزار کەس وەرگیراوە لەبارەی 80 وڵاتی جیهانەوە.

پاش ئەمەریکا کە خاوەنی کاریگەرترین هێزی ئابوری و سەربازی و کولتورییە لەجیهاندا، ئەم وڵاتانەی  خوارەوە ناوی کاریگەرترین وڵاتانی جیهانە:

یەکەم/ روسیا، ئەم وڵاتە خاوەنی زۆرترین روبەری زەوییە کە هاوسنورە لەگەڵ زیاتر لەدە وڵات، جگەلەوە خاونی دەوڵەمەندرین گەنجینەی سەربازییە و بەهاوجەمسەری سەربازی و سیاسی ئەمەریکا دادەنرێت.

دوەم/ چین. خاوەنی یەکەمین رێژەی دانیشتوان و دوەمین هێزی ئابوری جیهانە. هەرچەندە ئابورییەکەی لەگەشەکردندایە بەڵام هێشتا ملیۆنان کەسی وڵاتەکەی لەخوار هێڵی هەژارییەوە دەژین. 

سێیەم/ ئەڵمانیا، ئەم وڵاتە خاوەنی زۆرترین رێژەی دانیشتوانە لەئەوروپادا و زۆرترین کرێکاری شارەزا وخاوەن ئەزمونی لەجیهاندا هەیە. 

چوارەم/ بریتانیا، ئەم وڵاتەش کە ئێستا بەنیازە لەیەکێتی ئەوروپا بچێتە دەرەوە، بەپێی راپۆرتەکەی ( یو ئێس نیوز) لەروی ئابوری و سیاسی و زانستی و کولتورییەوە یەکێکە لەکاریگەرترین وڵاتانی جیهان.

پێنجەم/ فەرەنسا، یەکێکە لەکۆنترین وڵاتانی جیهان و ئەوەی ئەم وڵاتەی لەریزبەندی کاریگەرترین وڵاتانی جیهاندا هێشتۆتەوە، کاریگەرییە سیاسی و ئابوری و کولتورییەکەیەتی.

شەشەم/ ژاپۆن، خاوەنی خوێنەوارترین میللەت و پێشکەوتوترین ژێرخانی ئابوری تەکنیکی و تەکنۆلۆژییە و سێیەم ئابوریشە لەجیهاندا.

حەوتەم/ ئیسرائیل، ئەم وڵاتە بەبەراورد بەقەبارەی بچوکییەکەی، زۆرترین رۆڵی لەهاوکێشە جیهانییەکاندا هەیە. هاوکات خاوەنی ئابورییەکی زۆرباشە، بەڵام کێشەی سنورەکانی بەرۆکی ئابورییەکەیان گرتوە.

هەشتەم/ سعودیە، ئەم وڵاتە لەراپۆرتەکەدا بە وڵاتە زەبەلاحەکەی رۆژهەڵاتی ناوەڕاست ناوزەندکراوە کە بەهۆی پێگە ئاینی و نەوتییەکەیەوە لەپێشەنگی ئابورییەکانی جیهاندا ماوەتەوە.

نۆیەم/ کۆریای باشور، ئەم وڵاتە حەوتەمین هەناردەکاری جیهانە و ئابورییەکەشی ریزبەندی یازدەهەمین ئابوری جیهانی گرتوە. پیشەسازی ئۆتۆمبێل لەگرنگترین چالاکییەکانی هەناردەکردنی ئەو وڵاتەیە. 

دەیەم/ ئیماراتی عەرەبی یەکگرتو، هەرچەندە ئەم وڵاتە لەریزبەندی یەکەمی وڵاتانی عەرەبی هاتۆتەخوارەوە، بەڵام لەدیداری ئابوری جیهانیدا کاریگەرترین ئابوری ئەو ولاتانە دادەنرێت کە لەپێشبڕکێ و کێبڕکێی بەردەوامدان و بەهێزترین پێگەی جوگرافیای بازرگانی لەرۆژهەڵاتی ناوەڕاستدا هەیە.

یازدەیەم/ کەنەدا، ئەم وڵاتە دوەمین گەورە وڵاتی جیهانە و خاوەنی پێنجەمین گەورە سەرچاوەی نەوتە لەجیهاندا. 

پاش ئەمانیش هەریەک لەولاتانی ئێران، سویسرا، ئوستورالیا، تورکیا، هندستان، ئیتالیا، عێراق، سەنگافورە، سوید، پاکستان، ئیسپانیا، قەتەر و بەلجیکا لەکاریگەرترین وڵاتانی جیهاندان، بەڵام کاریگەرییەکانیان بەشێوازی جیاواز و هۆکاری جیاوازە و هەریەکەیان بەجۆرێک رۆلی خۆیان لەهاوکێشە جیهانییەکاندا دەبینن. 


Copyright © 2016 Xendan.org all rights reserved

designed and developed by AVESTA GROUP