کاندیدبونی خۆی بۆ خەندان پشڕاست کردەوە
سیروان کوێخا نەجم: پارتی نیەتی خراپە ئەگەر وەڵاممان بۆی نەبێت دەبێت تەسلیمی بین

- 2/28/2019 11:17:00 PM 128535 جار خوێندراوەتەوە

خەندان- بڕیار جەلال

سیروان کوێخا نەجم ئەندامى سەرکردایەتى یەکێتى نیشتیمانى کوردستان ناوەرۆکى ئەو نامەیەى بۆ خەندان پشتڕاستکردەوە کە ئاراستەى مەکتەبى سیاسى کردوە بەمەبەستى خۆکاندیدکردنى پۆ پۆستى پارێزگارى کەرکوک، دەشڵێت: پارتى چۆن ریفراندۆمیان بە عینادى کرد، ئێستاش عینادى دەکەن.

بەداخەوە برایانى پارتى پێداگیرى و عینادى دەکەن، وەک چۆن ریفراندۆمیان بە عینادى کرد، ئیستاش لە پرسەکانى تردا عینادى ئەکەن

 

سیروان کوێخا نەجم ئەندامى سەرکردایەتى یەکێتى نیشتیمانى کوردستان لە لێدوانێکى تایبەت بە خەندان-ى راگەیاند: "لەگەڵ مەڵبەندى کەرکوک قسەمان کردوە و زارەکییەن رەزامەندى خۆیان نیشانداوە لەسەر خۆ کاندیکردنم بۆ پۆستى پارێزگارى کەرکوک، بە نامەیەکیش کە ئاراستەى مەکتەبى سیاسیم کردوە خۆم کاندید کردوە بۆ ئەو پۆستە".

ئەو ئەندامەى سەرکردایەتى یەکێتى لە بارەى ناکۆکییەکانیان لەگەڵ پارتى وتى: "بەداخەوە برایانى پارتى پێداگیرى و عینادى دەکەن، وەک چۆن ریفراندۆمیان بە عینادى کرد، ئیستاش لە پرسەکانى تردا عینادى ئەکەن، سیاسەت بە عینادى ناکرێت، ئەگەر بمانەوێت حکومەتێکى باش و یەکگرتوو سەرکەوتوو بێت و کوڕى جەنابى کاک مەسعود سەرۆکى حکومەتێکى سەرتاسەرى یەکگرتوو بەهێزبێت، ئەوا باشترە هەموو لایەک بەیەکەوە بچینە ناو ئەو حکومەتەو بەشدارییەکى کاریگەرمان هەبێت و زۆرترین خزمەتى بە خەڵکى کوردستان بکەین".

سلێمانى دابڕاوە لە خزمەتگوزارى و جۆرێک لە نادادپەروەرى هەبوو لە کاتێکدا لە هەولێرو شوێنەکانى دیکە خزمەتگوزارییەکان نەوەستابوون

 

لە درێژەى قسەکانیدا سیروان کوێخا نەجم رایگەیاند:"ئەم چەند ساڵەى دوایی حکومەت بەهۆى قەیرانەکانەوە بەراستى دابڕاوە لە خزمەتگوزارى بۆ خەڵک بە تایبەتى پارێزگاى سلێمانى هەر زۆر دابڕاوە، ئەم ناوچانەى کە لە رابردوودا پێیاندەوت زۆرنى سەوز، زۆر بێبەش کرابوو لە خزمەگوزارى لە کاتێکدا لە هەولێر و شوێنەکانى دیکە خزمەتگوزارى نەوەستابوو، جۆرێک لە نادادپەروەرى هەبوو، قەیرانەکانیش کاریگەرى خۆیان هەبوو".

بەروونى بە یەکێتى دەڵێن بڕۆ ئیدارەیەکى دیکە دروست بکە و لەم حکومەتەدا جێگەت نابێتەوە

 

لەبارەى خواستى یەکێتى لەسەر شێوازى رێککەوتنیان لەگەڵ پارتى وتى: "دەبێت لەسەر هەموو ئەو بابەتانە و پرسى کەرکوک و بەغداد و دەرەوە رێککەوتنێکى سیاسى ئەنجامبدەین، چونکە کاتى خۆى ئەم سیاسەتى رێککەوتنە کە جەنابى مامجەلال دایهێنا هەروا لە خۆڕا نەبوو، بۆ ئەوەى زۆرینەیەک کەمینەیەک نەخوات، یان زۆرینەیەک زاڵ نەبێت و بە زۆرینە شتەکانى تێپەڕێنێت، بەڵکو بە کۆدەنگى بێت لەسەر هەموو بابەتە گرنگەکان و رەزامەندى هەموو لایەکى لەسەربێت، بەڵام بەداخەوە ئێستا دەبینین شتەکان بە زۆرینە تێدەپەڕێنرێت کە ئەمە نیشانەیەکى خەتەرەو پاڵ بە یەکێتییەوە دەنرێت بەو مانایەى (بڕۆن بۆخۆتان ئیدارەیەکى دیکە دروست بکەن)، بەروونى بە یەکێتى دەڵێن بڕۆ ئیدارەیەکى دیکە دروست بکە و لەم حکومەتەدا جێگەت نابێتەوە، ئەمە زەنگێکى خەتەرە هەم بۆ ناوچەکە هەم بۆ گەلى کورد زەرەرێکى گەورەیە، بۆیە ئەو پێشهاتانەى رۆژهەڵاتى ناوەراست و عێراق پێویستى بە یەکڕیزى و یەکدەنگى کورد زیاترە، بۆ ئەوەى بتوانین بەرەنگارى هەموو ئەو پلان و نەخشە و ململانێى گەورەى لە ناوچەکەدا هەیە ببینەوە، بتوانین لە بەرژەوەندى میلەتەمان و خەڵکى کوردستان بیقۆزینەوە، بەداخەوە تاکو ئێستا برایانى پارتى سیاسەتەکەیان وا نییە، سیاسەتەکەیان سیاسەتێکى زۆرینەى عینادە، ئەو عینادیەش لە سیاسەتدا هەڵەیەکى گەورەیە، تەجروبەشمان هەیە کە لەساڵى رابردوو زەرەرێکى گەورەمان لە هەرێمى کوردستان و خۆشماندا و تەنانەت لە پێگەى کاک مەسعودیش، ئەو زەرەرو زیانەى بەر خەڵکى کوردستان و ناوچە دابڕێنراوەکان و یەکێتى و پارتى کەوت بەهۆى ئەو عینادیەوە بوو، بۆیە دەبێت ئینسان تەجروبە وەرگرێت لە رابردوى خۆى و شتێک کە بە عینادى سەرکەوتوو نەبوو جارێکى دیکە دوبارەى نەکاتەوە".

تا ئێستا (رزگار عەلى، خالید شوانى، شاڵاو عەلى عەسکەرى، سیروان کوێخا نەجم) کاندیدن بۆ پارێزگارى کەرکوک

 

لەبارەى ئەو کەسانەى کە خۆیان کاندیدکردوە بۆ پۆستى پارێزگارى کەرکوک، سیروان کوێخا نەجم وتى: "هەیە خۆى کاندید کردوە و هەیە کاندیدکراوە کە پێکدێن لە چوار کەس ئەوانیش( رزگار عەلى، خالید شوانى، شاڵاو عەلى عەسکەرى لەگەڵ بەندەى موخلیس) ئێمە پێشتر وەک کەرکوکییەکان لەگەڵ رزگار عەلى کۆک بوین، بەداخەوە بۆمان نەچوە سەرو نەکراوە، هەم برایانى پارتى رازى نەبوون هەم بەغداش کێشەى بۆ دروستکرد".

بەم نەفەسەى ئێستاى پارتى بەمنزیکانە رێکناکەوین

 

لەوەڵامى پرسیارى ئایا یەکێتى و پارتى دەتوانن بەمنزیکانە رێکبکەون، سیروان کوێخا نەجم وتی: "بەم نەفەسەى کە ئێستا پارتى کاردەکات نەخێر".

دەبوو بوەستانایە لەسەر نامەکەى کاک مەسعود و لیژنەى یاسایی هەڵنەبژێردرایە

 

سیروان کوێخا نەجم وتیشى: "کاک مەسعود نامەیەکى دۆستانەى زۆر باشى ناردبوو بۆ کاک کۆسرەت، ئەویش زۆر بە دۆستانە وەڵامى دایەوە، بەڵام لەبەر ئەوەى نیەتەکە باش نییە، پارتى نەوەستان لەسەر ئەوەى کە کاک مەسعود داوای کردبوو کە بەپەلە هەردوو مەکتەبى سیاسى یەکێتى و پارتى کۆببنەوە، چون بە پەلە لیژنەى یاساییان لە پەرلەمان هەڵبژارد، کێشەکان لەم شتانەدان، دەبوو بوەستانایە لەسەر نامەکەى کاک مەسعود بۆ ئەوەى مەکتەبى سیاسى هەردوولا کۆببونایەتەوە بۆ ئەوەى بگەشتینایەتە چارەسەرێک".

ئەگەر برادەرانى پارتى نەوەستن، لەمەودوا یەکێتیش جوابى دەبێت

 

ئەو ئەندامەى سەرکردایەتى یەکێتى وتیشى: "ئەگەر برادەرانى پارتى نەوەستن، لەمەودوا یەکێتیش جوابى دەبێت، ئەگەر بوەستن و بێنەوە بۆ گفتوگۆ و دانوستانەکان، ئەو کاتە رەنگە بگەینە رێککەوتنێک کە ئەم دۆخە ناهەموارەى هەیە لەنێوان لایەنە سیاسییەکاندا بگاتە ئامانجێکى باشتر".

یەکێتى ئەگەر وەڵامى نەبێت دەبێت تەسلیمى پارتى بێت

 

لە وەڵامى پارتى کە وتبووى بەرەو ئاراستەى سەرۆکایەتى هەرێم هەنگاو دەنێین لەگەڵ گۆڕان، سیروان کوێخا نەجم وتى:"ئەوە نیەتە خراپەکانە، بۆیە ئەگەر جوابمان نەبێت دەبێت تەسلیم بین، من دەپرسم بۆچى جوابمان نەبێت دەستەى سەرۆکایەتى پەرلەمانى هەڵبژاردن، لیژنەى یاسایی هەڵبژارد، یاساى سەرۆکایەتى هەرێمیش هەموار بکاتەوە سەرۆکى هەرێمیش هەڵدەبژێرێت و سەرۆکى هەرێمیش داوا لە سەرۆکى حکومەت دەکات بۆ پێکهێنانى حکومەت، ئەو کاتەش چى دەمێنێت لە ساحەکەدا بۆ یەکێتى، بۆیە ئەگەر وەڵاممانە نەبێت ئەوا یەکێتى دەبێت نەمێنێت".



Copyright © 2016 Xendan.org all rights reserved

designed and developed by AVESTA GROUP