سەرۆکی کۆریای باکور بەڕێگای شەمەندەفەر دەگاتە ڤێتنام

- 2/23/2019 4:41:00 PM 4743 جار خوێندراوەتەوە

خەندان- بەهمەن ئەحمەد
بەپێی راپۆرتێکی ئاژانسی تاسی روسی، ئەمڕۆ شەممە 23/2/2019 کیم جۆن ئونی سەرۆکی کۆریای باکور بەمەبەستی کۆبونەوەی لەگەڵ دۆناڵد ترەپی سەرۆکی ئەمەریکا  لەڕێگای شەمەندەفەرەوە گەشتەکەی بۆ ڤێتنام دەستپێکردوە.

ئاژانسەکە ئەوەشی گواستۆتەوە چەند کاتژمێرێک بەرلەدەستپێکردنی گەشتەکەی کیم جۆن ئون،  بەرپرسانی ڤێتنام رایانگەیاندوە لەماوەی "چەند رۆژی ئایندەدا"  سەرۆکی کۆریای باکور بە سەردانێکی فەرمی دەگاتە وڵاتەکەیان.
دوەمین کۆبونەوەى لوتکەى نێوان سەرۆکى ئەمریکا و سەرۆکى کۆریا کۆتایی ئەم هەفتەیە دەبێت

 

بڕیاروایە دوەمین کۆبونەوەی لوتکەی ئەمەریکا و کۆریای باکور بەئامادەبونی هەریەک لە دۆناڵد ترەمپی سەرۆکی ئەمەریکا و کیم جۆن ئونی سەرۆکی کۆریای باکور لە رۆژی چوار شەممە و پێنج شەممەی داهاتو وڵاتی ڤێتنام کە دەکەوێتە باشوری رۆژهەڵاتی ئاسیا ئەنجامبدرێت.

پێشتر زانیاری لەسەر چۆنیەتی ئەنجامدانی گەشتی هەردو سەرۆک بۆ ڤێتنام ئاشکرا نەکرابو. 

بەپێی زانیارییە دپلۆماسییەکان، کیم جۆن ئون لەکاتژمێر 5 ی سەرلەئێوارە بەکاتی وڵاتەکەی لەشەمەندەفەرێکی سەربازی دەورەدراودا  کۆریای باکوری بەجێهێشتوە و بەرەو وڵاتی ڤێتنام بەڕێکەوتوە.

ماوەی گەشتەکەی کیم هەزاران کیلۆمەترە و بەناو خاکی چیندا تێدەپەرێت و دواتر دەگاتە ناو خاکی ڤێتنام، پێشبینیش دەکرێت زیاتر لە دوو رۆژ و نیو بخایەنێت.

ئەوەش ئاشکراکراوە شەمەندەفەرەکەی لەوێستگەی (دۆنگ دانگ)ی سنوری ڤێتنام دەوەستێت و دواتر لەڕێگای ئۆتۆمبێلەوە 105 میل دەبڕێت تا دەگاتە شاری هانۆی، پۆلیسی ئەو وڵاتەش رایگەیاندوە رۆژی گەشتنی کیم کە 26 ی شوباتە هاتوچۆکردن لەو شارە رادەگرن.



Copyright © 2016 Xendan.org all rights reserved

designed and developed by AVESTA GROUP