مەکتەبی سیاسی یەکێتی ئامادەکاری بۆ "قۆناغە نوێکەی" دەکات

- 2/23/2019 11:41:00 AM 5697 جار خوێندراوەتەوە
ئەندامانی مەکتەبی سیاسی یەکێتی

خەندان-

مەکتەبی سیاسی یەکێتی ئەمڕۆ شەممە کۆدەبێتەوە و تاوتوێی هەنگاوەکانی داهاتوی دەکات بۆ گفتوگۆکردن لەگەڵ پارتی دیموکراتی کوردستان، هاوکات  ئامادەکاری بۆ "قۆناغە نوێکەی" دەکات.

کۆبونەوەکەی مەکتەبی سیاسی یەکێتی پاشنیوەڕۆی ئەمڕۆ شەممە لە شاری سلێمانی بەسەرپەرشتی کۆسرەت رەسوڵ، جێگری سکرتێری گشتی یەکێتی بەڕێوەدەچێت.

بەپێی زانیاریەکانی خەندان، لە کۆبونەوەکەدا تاوتوێی دۆخی هەرێمی کوردستان و گفتوگۆکانی نێوان یەکێتی و پارتی دەکرێت بۆ پێکهێنانی کابینەی نوێی حکومەتی هەرێمی کوردستان.

کۆبونەوەی مەکتەبی سیاسی یەکێتی لەکاتێکدایە 18ی ئەم مانگە پارتی و گۆڕان رێککەوتنامەی نێوانیان واژۆکرد و هەمان رۆژیش کۆبونەوەی پەرلەمانی کوردستان ئەنجامدرا و دەستەی نوێی سەرۆکایەتی پەرلەمانی کوردستان هەڵبژێردرا، ئەوەش ناڕەزایی توندی یەکێتی لێکەوتەوە.

دوای ئەو هەنگاوەی پارتی بۆ پێکهێنانی کابینەی نۆیەمی حکومەت لەتیف شێخ عومەر، وتەبێژی یەکێتی رایگەیاند، دوای هەڵبژاردنی دەستەی سەرۆکایەتی پەرلەمانی کوردستان بێ ئامادەبونی فراکسیۆنی حزبەکەی "قسەی جیاوازیان" دەبێت.

ئاماژەی بەوەشکرد، "ئەگەر بڕیاربێت یەکێتی خولێکی دیکە لە دانوستان دەستپێبکاتەوە ئەمجارە دوای هەڵبژاردنی سەرۆکی پەرلەمان و ئەو پێشهاتانەی هاتونەتە کایەوە لەسەرەوە دەستپێدەکەینەوە، یەکێتی بێجگە لەوەی لەسەر بەرنامە گشتگیرەکەی خۆی کە داویەتی بە برادەرانی پارتی، کاتێک هاتە سەر قسەکردن لەسەر پۆستەکان ئەوکات قسەیەکی دیکەمان دەبێت جیاواز لە خولی یەکەمی دانوستانەکان".

ناکۆکییەکانی پارتی و یەکێتی دوای ئەوە هات کە یەکێتی داوای دەکرد پرسی پێکهێنانی کابینەی نۆیەمی حکومەتی هەرێمی کوردستان و پۆستی پارێزگاری کەرکوک و پۆستەکانی دیکەی عێراق پێکەوە یەکلایی بکرێنەوە، بەڵام پارتی داوای دەکرد سەرەتا کابینەی نۆیەمی حکومەتی هەرێمی کوردستان پێبکهێندرێت پاشان گفتوگۆ لەبارەی پۆستەکانی دیکەوە بکرێت.

نیشانەکردن :

#یەکێتی

Copyright © 2016 Xendan.org all rights reserved

designed and developed by AVESTA GROUP