وەزیری ناوخۆی تورکیا: ویستیان لە هەرێمی کوردستانەوە تا عەفرین ھێڵێک بکێشن، بەڵام بشمرین ناهێڵین

- 2/11/2019 9:14:00 AM 39172 جار خوێندراوەتەوە

خەندان-

وەزیری ناوخۆی تورکیا رایگەیاند، ساڵ و نیو پێش ئێستا لە هەرێمی کوردستان ریفراندۆم ئەنجامدرا، ویستیان لە باکوری عێراقەوە تا عەفرین ھێڵێک رابکێشن، بەڵام "ئێمە بشمرین رێگە بەوە نادەین".

سولەیمان سۆیڵو، وەزیری ناوخۆی تورکیا، لە میانی بەشداریکردنی لە کۆبونەوەیەکی جەماوەری لە شاری ئەنقەرە رایگەیاند، "ئیتر تورکیای کۆن نەماوە، ئەمڕۆ دەنگمان بەرز دەکەینەوە، ئینشائەڵڵا ئۆتۆمبێڵ و فڕۆکەی خۆمان دروست دەکەین، ئەوە بزانن کە ئەمڕۆ لە بەرەنگاربونەوەی تیرۆر فڕۆکە بێ فڕۆکەوانەکانمان لە ئیسرائیل و ئەمریکا ناکڕین، بەڵکو رۆڵەکانی ئێمە، ئەندازیارەکانی ئێمە دروستی دەکەن".

ئیتر تورکیای کۆن نەماوە، ئەمڕۆ دەنگمان بەرز دەکەینەوە

ئاماژەی بەوەشکرد، "ھێزە دەرەکییەکان دەیانەوێت گوشار لەسەر تورکیا دروست بکەن و بە ئێمەیان وت ناتوانن بچنە ناو عەفرینەوە، چوین، جا چی ئەمریکا یان ئەوروپا بیڵێت، بە ئێمەیان وت لە باکوری عێراق دەوڵەت دادەنرێت، یەک ساڵ و نیو پێش ئێستا گشتپرسی کرا، ویستیان لە باکوری عێراقەوە تا عەفرین ھێڵێک رابکێشن، ویستیان پەیوەندی تورکیا لەگەڵ گشت جوگرافیای باشور بپچڕێنن، بەڵام بشمرین ناهێڵین".

ویستیان پەیوەندی تورکیا لەگەڵ گشت جوگرافیای باشور بپچڕێنن

25ی مانگی ئەیلولی ساڵی 2017 ریفراندۆم لە هەرێمی کوردستان و کەرکوک و ناوچە جێناکۆکەکان بەڕێوەچو، تێیدا لەسەدا 92.67ی بەشداربوانی راپرسییەکە بە "بەڵێ" دەنگیان بۆ سەربەخۆیی هەرێمی کوردستاندا، بەڵام وڵاتانی دراوسێ بە توندی دژی وەستانەوە و دەروازە سنورییەکانیان بەروی هەرێمدا داخست.

وەزیری ناوخۆی تورکیا راشیگەیاند، دەوترێت لە هەندێک لە پارێزگاکان پەرلەمانتارانی پارتی دیموکراتی گەلان (ھەدەپە) بەمەبەستی ئازادکردنی ئاپۆ لە ئیمڕالی رێپێوان دەکەن، "منیش دەڵێم، ئەگەر رێگەمان بە رێپێوانتان دا ئەوە ئێمە پیاو نین".
ئەگەر رێگەمان بە رێپێوانی پەرلەمانتارانی ھەدەپەدا، پیاو نین

 

لە ئێستادا لە باکوری کوردستان مانگرتن لە خواردن دژی گۆشەگیری عەبدوڵا ئۆجەلان، رێبەری پارتی کرێکارانی کوردستان (پەکەکە) بەڕێوەدەچێت، حکومەتی تورکیا لە 27ی تەموزی ساڵی 2011ەوە رێگەیان بە پارێزەرەکانی ئۆجەلان نەداوە سەردانی دورگەی ئیمراڵی بکەن.

تا ئێستاش زیاتر لە 789 جار، داواکاری بینینی ئۆجەلان رەتکراوەتەوە، کۆتا جاریش لە 27ی مانگی تەموزی 2011 پارێزەران چاویان بە ئۆجەلان کەوتوە.

بەڵام دوای نزیكەی سێ ساڵ، 12ی مانگی رابردو رێگا بە محەمەد ئۆجەلان درا بۆ چەند ساتێک سەردانی ئۆجەلان بکات لە زیندانی ئیمراڵی.



Copyright © 2016 Xendan.org all rights reserved

designed and developed by AVESTA GROUP