هەواڵی ئەمڕۆ

بەپەلە

بۆ پابەندبون بە یاسا دوبەی بڕیارێکى سەیر لەسەر سزای سەرپێچی هاتوچۆ دەردەكات

- 2/6/2019 6:41:00 PM 13567 جار خوێندراوەتەوە

خەندان- شادان عەلى

لە چوارچێوەی دەستپێشخەری “ساڵی لێبوردەیی” كە لە دەوڵەتی ئیمارات دەستیپێكردوە، بەرپرسانی گشتی پۆلیسی هاتوچۆی دوبەی رایانگەیاند، بە رێژەی 100% داشكاندن دەكات لە پارەی سزا بۆ ئەو شۆفێرانەی ناویان لە سەرپێچی هاتوچۆدا تۆماركراوە.
داشكاندن دەکرێت بە رێژەی 100% بۆ ئەو شۆفێرانەی ناویان لە تۆماری سەرپێچی هاتوچۆدا هەیە

 

بە دروشمی “چاكسازی سەرپێچی هاتوچۆ”، لە دوبەی، داشكاندن بە رێژەی 100% بۆ ئەو شۆفێرانەی ناویان لە تۆماری سەرپێچی هاتوچۆدا هەیە پێشكەشدەكرێت، بەڵام بە مەرجی پابەندبون بە یاسا و رێساكانی هاتوچۆوە.

لە دەستپێشخەریەكەدا هاتوە، ئەو شۆفێرەی بۆماوەی سێ مانگ بە یاساكانی هاتوچۆوە پابەنددەبێت لە 25% لە پارەی سزاكەی دادەشكێنرێت و لە 50% بۆ ئەو شۆفێرانەی بۆ ماوەی شەش مانگ و لە 75% بۆ ماوەی نۆ مانگ، هەر شۆفێرێكیش بۆ ماوەی ساڵێكی تەواو سەرپێچی نەكرد و پابەند بو بە یاساكانی هاتوچۆوە، بە رێژەی لە 100% داشكاندنی بۆ دەكرێت و هیچ بڕە پارەیەكی لە بەرامبەر سەرپێچیەکانی پێشویدا لێوەرناگیرێت.

بەپێى هەواڵێکى سکاى نیوز، “ساڵی لێبوردەیی” لەمڕۆ چوارشەممەوە لە دەوڵەتی ئیمارات دەستپێدەكات و لە دوبەی بۆ چارەسەركردن و رێكخستنەوەی سەرپێچی هاتوچۆ كە لەماوەی رابردودا ئەنجامدراون ئەو دەستپێشخەریە جێبەجێدەكرێت.
ئەو ئۆتۆمبێلانە ناگرێتەوە كە بەناوی نوسینگەكانی بەكرێدانی ئۆتۆمبێل و كۆمپانیاكانی گواستنەوە و گەیاندن تۆماركراون
 
ئەم هەنگاوە، ئەو ئۆتۆمبێلانە ناگرێتەوە كە بەناوی كۆمپانیا و دامەزراوە و نوسینگەكانی بەكرێدانی ئۆتۆمبێل و كۆمپانیاكانی گواستنەوە و گەیاندن تۆماركراون، ئەو شۆفێرانەش ناگرێتەوە كە بۆ ماوەی زیاتر لە سێ مانگی لەسەریەك لە دەرەوەی وڵات دەمێننەوە.

لەو بارەیەوە، پۆلیسی هاتوچۆی دوبەی لە هەژماری تایبەتی خۆی شۆفێرانی وڵاتەكەی بانگهێشتكرد بۆ پابەندبونیان بە یاساكانی هاتوچۆوە و نوسیویەتی “ئەو دەستپێشخەریە، لە چوارچێوەی گرنگیدانە بە ئاسایشی رێگاوبان و ژیانی خەڵك و خۆشبەختیانەوە”.

پۆلیسی دوبەی گەشبینی خۆی سەبارەت بەو دەستپێشخەریە راگەیاندو هیوای خواستوە ببێتە هۆی پاراستنی گیانی بەكارهێنەرانی شەقامەكانی دوبەی و پاراستنی وڵاتەكە لە كارەساتی هاتوچۆ.

نیشانەکردن :

#رووداوی هاتوچۆ

Copyright © 2016 Xendan.org all rights reserved

designed and developed by AVESTA GROUP