هەواڵی ئەمڕۆ

ئەپڵ فەیس تایم دەخاتەوە بەردەست بەكارهێنەرانی

- 2/1/2019 10:49:00 PM 13055 جار خوێندراوەتەوە


خەندان-شادان عەلی

كۆمپانیای ئەپڵ بڵاویكردەوە، لە هەفتەی داهاتودا بە شێوەیەكی نوێ خزمەتگوزاری "فەیس تایم" دەخاتەوە بەردەست بەكارهێنەرانی.

پاش ئەوەی هەفتەی رابردو كۆمپانیای ئەپڵ خزمەتگوزاری (فەیس تایم)ی بە هۆی گرفتێكی تەكنیكیەوە لابرد، ئەمڕۆ هەینی رایگەیاند، ئەو گرفتە تەكنیكیەی چارەسەركردوە و خزمەتگوزاریەكە دەخاتەوە كار.

كۆمپانیاكە لە راگەیەندراوێكیدا بڵاویكردوەتەوە، چارەسەری ئەو گرفتە تەكنیكیەی كردوە كە بەهۆیەوە هەفتەی پێشو خزمەتگوزاری (فەیس تایم)-ی لابرد و لە هەفتەی داهاتودا بەشێوەیەكی نوێ دەخرێتەوە بەردەست بەكارهێنەرانی.

ئەو گرفتە تەکنیکییە، مەترسی وەرگرتنی زانیاری تایبەتی لێدەکرا

 

هۆکاری سەرەکی لابردنی ئەو خزمەتگوزارییەی ئەپڵ، گرفتێکی تەکنیکی بو کە بەهۆیەوە بەکارهێنەرانی دەیانتوانی گوێبیستی هەموو گفتوگۆیەکی پەیوەندییە تەلەفۆنییەکان بن پێش ئەوەی وەرگری پەیوەندییەکە وەڵامی پەیوەندییەکە بداتەوە.

ئەو گرفتە تەکنیکییە، مەترسی وەرگرتنی زانیاری تایبەتی لێدەکرا، بەتایبەتی لەکاتی رۆشتنی زەنگی تەلەفۆن پێش وەڵامدانەوە و زیاتر مەترسییەکەش روبەروی بەکارهێنەرانی ( IOS) دەبوەوە.

گرفتە تەکنیکیەکە بەوجۆرە بوە کە لەسەر شاشەی ئایفۆنی ئەو کەسەی تەلەفۆنەکە دەکات لایەنی بەرامبەر هاتوەتە ناو گروپی تەلەفۆنکردنەوە و پەیوەندییەکەی وەڵامداوەتەوە، بەڵام لەراستیدا لای وەرگری تەلەفۆنەکە هێشتا لەکاتی زەنگ لێداندایە. 
گرفتەکە بەهۆی هەوڵێکی هاککردنەوە دروستبوبو 

 

پسپۆڕانی ئەپڵ پێیان وابو، ئەو گرفتە بەهۆی هەوڵێکی هاککردنەوە دروستبوە و رایانگەیاندبو لە ماوەی هەفتەیەكدا کێشەکە بەپرۆگرامێکی سۆفت وێر چارەسەردەکەن. 

بەرنامەی فەیس تایم، یەکێکە لەخزمەتگوزارییەکانی ئەپڵ بۆ بەکارهێنەرانی ئایفۆن، کە لەرێگایەوە دەتوانرێت پەیوەندی تەلەفۆنی و گواستنەوەی دەنگ و رەنگ ئەنجامبدرێت.


Copyright © 2016 Xendan.org all rights reserved

designed and developed by AVESTA GROUP