داكۆكیكارانی مافی منداڵ داوای داخستنی "مێسنجەر كیدس" دەكەن

- 1/30/2019 7:34:00 PM 3586 جار خوێندراوەتەوە
نمونەیەک لە بەرنامەی مێسنجەر کیدس

خەندان - شادان عەلی

پارێزەرانی مافی منداڵان لەئەمریکا داوای داخستنی بەرنامەی مێسنجەر كیدس-یان لە كۆمپانیای فەیسبوك كردوە و بە كۆمپانیاكەیان راگەیاندوە "بەرنامەكە بۆ منداڵان نەگونجاوە".

بەرنامەکە ئامڕازێكی تایبەتە بۆ پەیوەندی منداڵان

لە نامەیەكی كراوەدا بۆ بەرێوەبەری كۆمپانیای فەیسبوك، ژمارەیەک لەپارێزەرانی مافی منداڵان داوای داخستنی بەرنامەی مێسنجەر كیدس-یان كردوە، كە بەرنامەیەكی تایبەتە بە نامە ناردن و پەیوەندیكردنی منداڵانی خوار تەمەن 13 ساڵ، بێ ئەوەی پێویست بە ژمارەی تەلەفۆن بكات.

لە نامەكەدا ئاماژە بەوەكراوە، بەرنامەكە بۆ منداڵان نەگونجاوە و هانیان دەدات بێ پرسی دایبابیان پارەیەكی زۆر بۆكڕینی یارییە ئەلكترۆنییەكان خەرجبكەن.

ساڵێك لەمەوبەر، داكۆكیكارانی مافی منداڵان و ژمارەیەكی گروپی دیكەی داكۆكیكار هۆشداریانداوە لەو بەرنامە بێبەرامبەرە، كە منداڵان بەرەو خەمۆكی و نارێكی خەوتنی تەندروست و كەمكردنەوەی باوەربەخۆبون دەبات. 

دوبارە داوای داخستنی دەکەن

ئەمساڵیش، گروپەكانی داكۆكیكاری مافی منداڵان، هەمان داواكاری ساڵی رابردو بۆ كۆمپانیای فەیسبوك  دوبارە دەكەنەوە بۆ داخستنی بەرنامەكە و نیگەرانیان دەربریوە كە "ئەو كۆمپانیایە بێ ئاگایانە هه‌ڵسوكه‌وتى منداڵان خراپدەكات".

لە راپۆتێكی لێكۆڵینەوەی پارێزەرانی مافی مرۆڤ-دا هاتوە، ئەو تۆرە كۆمەڵایەتیە "هاورێیەكی خەڵەتێنەرە" كە رێگە بە دروستكەرانی یارییە ئەلكترۆنیەكان دەدات كە منداڵان هانبدات پارەی دایبابیان بەكاربهێنن بۆ كرینی ئەو یارییانە، بێ ئەوەی دایبابان دركی پێبكەن.

نابێت فەیسبوک مێسنجەر کیدسی هەبێت بۆ منداڵان

ئاماژەیان بۆئەوه‌شكردوە، كۆمپانیاكە لەپێناو قازانجی خۆیدا زیان بە منداڵان و خێزانەكانیان دەگەیەنێت و نوسیویانە "تۆری كۆمەڵایەتی فەیسبوك، پلاتفۆرمێكە ناگونجێت هیچ بەرهەمێكی هەبێت بۆ منداڵان، بەتایبەتی بەرنامەی هاوشێوەی مێسنجەر كیدس".

لەوەڵامی نامەكەدا، وتەبێژی كۆمپانیای فەیسبوك رایگەیاند، ئێمە لە داكۆكیكارانی مافی منداڵانەوە بیستومانە كە بەرنامەی مەسنجەر كیدس یەكێكە لە بێمەترسیترین بەرنامەكان بۆ منداڵان، تا بتوانن لەو رێگایەوە پەیوەندی بە هاورێ و خێزانەكانیانەوە بكەن. 

ساڵی 2017 لەلایەن كۆمپانیای فەیسبوكەوە دروستكرا

بەرنامەی مەسنجەر كیدس، لە ساڵی 2017 دا  لەلایەن كۆمپانیای فەیسبوكەوە بەمەبەستی پەیوه‌ندیكردنی نێوان منداڵان و خێزانەكانیان دروستكرا، بەپێی بەرپرسانی كۆمپانیاكە بەرنامەكە تایبەتمەندی پارێزگاریكردن و پاراستنی بۆ منداڵان تێدایە و رێنمایی داناوە بۆ ئەوەی دایبابیان بتوانن كۆنترۆڵی بەكارهێنانی بكەن.



Copyright © 2016 Xendan.org all rights reserved

designed and developed by AVESTA GROUP