خەندان-

سەرۆکی پارتی دیموکراتی کوردستان دوای گەیشتنی بە ئوردن لەگەڵ شا عەبدوڵڵا، پاشای ئەو وڵاتە کۆبوەوە و بەپێی راگەیەندراوی کۆبونەوەکە لەبارەی چەند پرسێکەوە گفتوگۆیان کردوە.

دیوانی شاهانەی ئوردن لە تویتێکدا لە تۆڕی کۆمەڵایەتی تویتەر بڵاویکردەوە، شا عەبدوڵڵا پێشوازی لە مەسعود بارزانی، سەرۆکی پێشوی هەرێمی کوردستانی عێراق و سەرۆکی پارتیی دیموکراتی کوردستان کردوە.

لە راگەیەندراوەکەدا هاتوە، لە کۆبوونەوەکەدا جەخت لە پەرەپێدانی پەیوەندییە بەهێزەکانی نێوان ئوردن و هەرێمی کوردستان لە چەندین بواردا کراوەتەوە.

ئێوارەی دوێنێ یەکشەممە مەسعود بارزانی بە یاوەرى شاندێک گەیشتە ئوردن و لەلایەن براى پادشاى ئوردن پێشوازیی لێکرا.