هیڤیدار ئەحمەد: دەبێت تورکیا و پەکەکە خاکی هەرێم جێبهێڵن

- 1/26/2019 7:26:00 PM 34043 جار خوێندراوەتەوە

خەندان-

ئەندامێکی پەرلەمانی کوردستان لە فراکسیۆنی پارتی رایگەیاند، دەبێت پەکەکە و تورکیا شەڕی خۆیان ببنە باکوری کوردستان.

هێڤیدار ئەحمەد، ئەندامی پەرلەمانی کوردستان بە خەندان-ی راگەیاند،"چۆن خەڵک داوای چوونە دەرەوەی سوپای تورکیایان کرد دەبێت بەهەمان شێوە داوای چوونە دەرەوەی پەکەکەش بکەن لە خاکی کوردستان".

دەشڵێت، "ئەم هاتنەی تورکیا بۆ هەرێمی کوردستان رێککەوتنێکی نێوان تورکیا - عێراق لە کاتی حوکمی سەدام کە رێگە بە تورک دەدات 15کم بێتە ناو خاکی کوردستان، نابێت پەکەکەش لە خاکی کوردستان هێرش بکاتە سەر پەکەکە".

پەکەکە و تورکیا دەستدرێژی دەکەنە سەر خاکی کوردستان

سەبارەت بەوەی تورکیا بۆچی راستەخۆ لە شوێن و بارەگاکانی پەکەکە نادات و هاووڵاتیان دەکاتە ئامانج وتیشی، ئەو هاوڵاتیانە دەچنە گوندەکانی خۆیان بۆ سەر خانوەکانیان، دواجار دەکەونە بەر ئەو تۆببارانە تێکەڵ بە بارەگاکانی پەکەکە دەبن.

باسی لەوەشكرد، ئیدانەی ئەو کارەدەکەن و داوا لە تورکیا دەکەن ئەو هێرشانە رابگرن، با بچنە باکور شەڕی خۆیان بکەن، بۆ خەڵکی ئێرە ببنە قوربانی سیاسەتێک کە کەس نازانێت سەرچاوەکەی چییە؟ هەرێمی کوردستان قوربانی دەستی پەکەکە و تورکیان.

ئەو پەرلەمانتارەی پارتی وتیشی، "با تورکیا و پەکەکە بارەگاکانیان لە هەرێم ببەنە دەرەوە بچنە باکوری کوردستان و پرۆسەی ئاشتی دەستپێبکەن لە باکوری کوردستان، ئەو کێشەیە بەشەڕ چارەسەرناکرێت، شەڕی خۆیان بۆ خۆیان و ئاشتی خۆیان بۆ خۆیان و هیچ پەیوەندی بە هەرێمی کوردستانەوە نییە، هەردوکیان دەستدرێژی دەکەنە سەر خاکی کوردستان". 
 


Copyright © 2016 Xendan.org all rights reserved

designed and developed by AVESTA GROUP