کچێکى هەڵەبجەیی کرایە باڵیۆزى ژنان و لاوان لە عێراق

- 1/20/2019 10:54:00 PM 10580 جار خوێندراوەتەوە

خەندان-

ئەمڕۆ شەیدا موعتەسەم کە کچێکى دانیشتووى شارى هەڵەبجەیە کرایە باڵیۆزى رێکخراوى (FAAVM)ی کەندی بۆ کاروبارى ژنان و لاوان لە عێراق.

شەیدا لە کۆتایی ساڵى ٢٠١٨ لە پێشبڕکێی ساڵانەی یەکێتی رێکخراوەکانی رۆژهەڵاتی ناوەڕاست بەشدارى کردو توانی لەکۆی ١٦ هەزارو ٣٠٠ سیڤى پێشکەشکراو وەک یەکێک لە ۱٠٠ کەسایەتییە کاریگەرەکەى رۆژهەڵاتى ناوەڕاست هەڵبژێردێت.

شەیدا موعتەسەم بە خەندان-ى راگەیاند" دواى ئەوەى لەلایەن رێکخراوى (FAAVM)ی کەندی ئاگادارکرامەوە کە کراومەتە باڵیۆزى ژنان و لاوان لە عێراق ئەمڕۆ دەستبەکاربووم.

وتیشى: ئەو رێکخراوە تاکو ئێستا لە عێراق هیچ بنکەیەک و لقێکى نییە و من یەکەم باڵیۆزم کە لێرە دەستبەکاردەبم، هیوادارم بتوانم لە زووترین کاتدا لقێکى رێکخراوەکە بهێنینە عێراق.

ئاماژەى بەوەشکرد کە ئەو رێکخراوە لە زۆر بواردا کاردەکات، بەتایبەت لە بوارەکانى نەهێشتنى هەژارى و کاروبارەکانى ژنان و لاوان و چەندین بوارى تر، منیش بۆیە ئەو کارەم هەڵبژاردووە چونکە دەمەوێت خزمەت لەو بوارەدا بکەم.

خەونى من ئەوە بووە کە رێکخراوە نێودەوڵەتییەکان کارەکانیان بهێننە هەرێمى کوردستان و بەتایبەت لە پارێزگاى هەڵەبجە، دیارە ئەمەش دەرفەتێکى باشە بۆ من تاکو بتوانین ئەم رێکخراوە و رێکخراوە نێودەوڵەتییەکانى دیکەش بهێنینە هەرێمى کوردستان و لێرە نوێنەرایەتییان هەبێت، کە دەرفەتێکى زۆر باش دەبێت تا بتوانین پرۆژەیان پێشکەش بکەین و سودیان لێوەربگرین تا لەو رێگەیەوە خزمەتى کورد بکەین.

لەبارەى هەبوونى بەرنامە و پرۆژە بۆ ئەوەى لەگەڵ دەستبەکاربوونى کارى تێدا بکات، شەیدا موعتەسەم رایگەیاند: بێگومان پرۆژەمان هەیە، بەڵام رەنگە دوابکەوێت، چونکە بارودۆخ و ژینگەکەمان باش نییە و سپۆنسەریشمان نییە، بەداخەوە ئەو کاتەشى وەک یەکێک لە ١٠٠ کەسایەتییە کاریگەرەکەى رۆژهەڵاتى ناوەڕاست هەڵبژێردرام تاکو ئێستا لەلایەن بەرپرسانى هەرێم و پارێزگاى هەڵەبجەوە پەیوەندییم پێوە نەکراوە و هیچ هاوکارییەکم پێشکەش نەکراوە، بۆیە دیارییکردنیشم وەک باڵیۆزى ژنان و لاوان بە هەمان شێواز تێدەپەڕێت.

شەیدا هاوکارى و هەماهەنگى هەموو بەرپرسانى و کەسانى دڵسۆزى بە گرنگ زانى تا بتوانێت لە داهاتوودا سەرکەوتوو بێت لەکارەکانیدا و پرۆژە و بەرنامەکانى جێبەجێ بکات.

لەبارەى شوێنى کارکردنى رایگەیاند: من بەو رێکخراوەم وتووە کە لە هەڵەبجە نیشتەجێم، بەڵام من کراومەتە باڵیۆزى ئەو رێکخراوە لە عێراق بەو هۆیەشەوە دەسەڵاتەکانم فراوانترە و لە هەر شوێنێک بمەوێت دەتوانن ئۆفیس بکەمەوەو کارەکانمانى لێ جێبەجێ بکەین.

 



Copyright © 2016 Xendan.org all rights reserved

designed and developed by AVESTA GROUP