عیماد ئەحمەد باس لە گەوھەر خانی دایکی و ئازارەکانی ژیانی دەکات

- 1/12/2019 3:37:00 PM 104558 جار خوێندراوەتەوە

خەندان-

عیماد ئەحمەد، ئەندامی مەکتەبی سیاسی یەکێتی چیرۆکی ئازارەکانی ژیانی و سۆزی گەوھەر خانی دایکی دەگڕێتەوە و دەڵێت، له‌ناو تاریكی ژیانێكی دڵڕه‌قانه‌، له‌ناو ده‌هلیزی هه‌ژاری و نه‌داریدا گەوھەر  زیاتر بۆ ئەوان ئه‌گه‌شایه‌وه‌.

عیماد ئەحمەد، ئەندامی مەکتەبی سیاسی یەکێتی لەمیانی وتارێکدا کە لە بەشی بیروڕای خەندان بڵاوکراوەتەوە نوسیویەتی، "وا ئه‌زانم دوێنێیه‌، مێرمنداڵێک بووم له‌ ئێواره‌یه‌کی بێڕه‌حمی خانه‌قیندا به‌هاوارو گریانه‌وه‌ به‌ دوای جه‌نازه‌ی‌ باوكمه‌وه‌ بووم به‌ره‌وگۆڕستان، به‌ڵام هاواری ئه‌و كاتم ته‌نیا هاواری مندڵێك بوو بۆ له‌ده‌ستدانی باوكی به‌بێ ئه‌وه‌ی به‌ ڕاستی قورسایی ئه‌و كۆسته‌ بزانێت، به‌بێ ئه‌وه‌ی درک به‌وه‌ بکات که‌ دێوه‌زمه‌ی بێ باوکی چۆن چنگ له‌ قوڕگی چاره‌نووسی ئه‌گرێت".

هاواری من لەمەرگی دایکم ته‌نیا تێكه‌ڵ به‌ قوڵپی گریان نه‌بوو

عیماد ئەحمەد باسی لە چیرۆکی کۆچی دوایی دایکی کردووە کە شەوی دووی ئەم مانگە  لە گۆڕستانی ئیمام عەباس لە خانەقین بەخاك سپێردرا و دەڵێت، "ساڵانێکی زۆر دوای ئه‌وه‌ به‌هه‌مان شێوه‌ له‌ ئێواره‌یه‌کی خانه‌قیندا به‌ دوای جه‌نازه‌ی دایكمه‌وه‌ بۆ هه‌مان گۆڕستان، به‌ڵام ئه‌م جاره‌ به‌ خه‌مێكی قوڵتر، چونکه‌ هاواری من ته‌نیا تێكه‌ڵ به‌ قوڵپی گریان نه‌بوو، به‌ڵكو هاوارێك بوو له‌ هه‌موو جه‌سته‌و رۆحم هه‌ڵئه‌قوڵا بۆ له‌ ده‌ستدانی (گه‌وهه‌ر)ی ژیانم".

ئه‌و ژنه‌ی هه‌موو ته‌مه‌نی خۆی بۆ ئه‌وه‌ ته‌رخانكرد كه‌ هه‌وڵبدات هه‌موو تاڵیه‌كانی ژیان، به‌ تامی هه‌نگوین ده‌رخواردی پێنج منداڵه‌ هه‌تیوه‌كه‌ی بدات

عیماد ئەحمەد لە وەسفی گەورهەر خانی دایکیدا نوسیویەتی، "دایکم، ئه‌و ژنه‌ی هه‌موو ته‌مه‌نی خۆی بۆ ئه‌وه‌ ته‌رخانكرد كه‌ هه‌وڵبدات هه‌موو تاڵیه‌كانی ژیان، به‌ تامی هه‌نگوین ده‌رخواردی پێنج منداڵه‌ هه‌تیوه‌كه‌ی بدات، هه‌وڵبدات گیان و رۆحی خۆی بکاته‌ قه‌ڵغانی منداڵه‌ بێنازه‌كانی بۆ ئه‌وه‌ی‌ زیاتر به‌ر زه‌بری قه‌ده‌ری بێ باوكی و نه‌داری نه‌كه‌ون".

خۆشه‌ویستی دایكی من ئه‌ڵماسێك بوو له‌ناو تاریكی ژیانێكی دڵڕه‌قانه‌

"ئه‌و ئێواره‌یه‌ خانه‌قین بۆ من پایته‌ختی خه‌می هه‌موو دنیا بوو، چونکه‌ دایكم به‌ یه‌کجاری جێی هێشتم، ئه‌و دایکه‌ی پاڵه‌وانی راسته‌قینه‌ی پڕكردنه‌وه‌ی كه‌لێنی بێ باوكیمان بوو‌، بۆیه‌ به‌ مردنی سه‌رله‌نوێ هه‌تیو که‌وتمه‌وه‌"، عیماد ئەحمەد واینوسیوە.

ئەو ئاماژەی بە خۆشەویستی دایکی کردووە و وتی، "خۆشه‌ویستی دایكی من ئه‌ڵماسێك بوو له‌ناو تاریكی ژیانێكی دڵڕه‌قانه‌، له‌ناو ده‌هلیزی هه‌ژاری و نه‌داریدا زیاتر بۆ ئێمه‌ ئه‌گه‌شایه‌وه‌، ئه‌و ته‌نها دایك نه‌بوو، به‌ڵكو فریشته‌یه‌ك بوو له‌ پێستی دایكه‌وه‌ هاتبووه‌ سه‌ر زه‌وی بۆ ئه‌وه‌ی ‌له‌و دۆزه‌خه‌ سه‌خته‌ رزگار بكات كه‌ بێ باوكی بۆ ئێمه‌مانانی سازدابوو".

ئه‌و ژنه‌ دوو دیوی هه‌بوو، دیوێك كه‌ ده‌ریایه‌ك بوو له‌ خه‌م، دیوێكی تریشی خۆشی به‌خش و فریادڕه‌سی ئێمه‌ بوو

باسی لەوەشکردووە، "ئه‌و ژنه‌ دوو دیوی هه‌بوو، دیوێك كه‌ ده‌ریایه‌ك بوو له‌ خه‌م، مردنی هاوسه‌ره‌كه‌ی، پێنج مناڵی هه‌تیو(سعاد، عماد، سنا‌و، سمیر، سەرگوڵ) جیها‌نێك پڕ لە هه‌ژاری كه‌ ئه‌و دیوه‌ی جێ برینی خه‌م و ناسۆر بوو، دیوێكی تریشی خۆشی به‌خش و فریادڕه‌سی ئێمه‌ بوو".

دایکم له‌ گه‌رمای هه‌ڵقرچێنه‌ری خانه‌قیندا، به‌ ده‌زو و داو ژیانى بۆ نەخشاندین

عیماد ئەحمەد لە باسی چۆنییەتی ژیانی دایکیدا دەڵێت، "له‌ گه‌رمای هه‌ڵقرچێنه‌ری خانه‌قیندا، له‌ ژورێکی قوڕینی بێ په‌نجه‌ره‌دا، دایکم به‌ ده‌زو و داوی خه‌م و چه‌رمه‌سه‌ری چاره‌نووسێكی باشتری له‌سه‌ر پارچه‌قوماشی ژیان بۆ ئه‌نه‌خشاندین، له‌و گه‌رما هه‌ڵپڕوکێنه‌ره‌ی خانه‌قیندا به‌ باوه‌شێنێکه‌وه‌ ئێمه‌ی فێنک ئه‌کرده‌وه‌، که‌ گه‌وره‌ بووم و به‌ ئێستاشمه‌وه‌ من بیر ئه‌که‌مه‌وه‌ که‌ دایکم ئه‌وکات چه‌ند به‌ بێده‌نگی بۆ چاره‌نووسی خۆی و منداڵه‌کانی گریابێت".

ئێستا گیانی من تاریکستانێکه‌ خۆری دایکی لێ ئاوابوو
ئەندامەکەی مەکتەبی سیاسی یەکێتی لە بەردەوامی گێڕانەوەی چیرۆکی ژیانیدا نوسیویەتی، "ئێستا گیانی من تاریکستانێکه‌ خۆری دایکی لێ ئاوابوو، مه‌گه‌ر بیره‌وه‌ریه‌کانی سه‌بووری ئه‌و کۆسته‌م بده‌ن! من (گه‌وهه‌ر)ێکم رۆشت که‌ تا ماوم جێگه‌ی پڕ نابێته‌وه‌".


Copyright © 2016 Xendan.org all rights reserved

designed and developed by AVESTA GROUP