ئەمریکا لە لێوارى بەریەککەوتنى لایەنگرانى دیموکرات و کۆمارییەکان

- 1/11/2019 11:31:00 AM 8950 جار خوێندراوەتەوە

خەندان-

راوێژکارێکى کۆمارییەکان مەترسییەکانى بەردەوامى داخستنى حکومەت لە ئەمریکا بۆ خەندان دەخاتەروو رایدەگەیەنێت 365 هەزار فەرمانبەرى حکومەت زیانیان پێدەگات.

لەئێستادا بەهۆى ناکۆکییەکانى نێوان دیموکراتى و کۆمارییەکان ماوەى 21 رۆژە کارەکانى حکومەت لە ئەمریکا پەکى کەوتووە، ئەوەش دواى ترەمپ داوایکرد پێنج ملیار دۆلار بۆ دروستکردنی دیوارى سنوری ئەمەریکا-مەکسیک تەرخانبکرێت، بەمەبەستى رێگریی کردن لە کۆچى نایاسایی و پاراستنى ئاسایشى ئەمریکا، بەڵام دیموکراتەکان هەر زوو داواکارییەکەیان رەتکردەوە.

زەردەشت بابان ئەندامى کۆمارییەکان و راوێژکار لە حکومەتەکەى دۆنالد ترەمپ لەبارەى ئەو گرژیانەى لەنێوان دیموکرات و کۆمارییەکان لە ئەمریکا دروستبوون بە خەندان-ى راگەیاند: ترەمپ سورە لەسەر دروستکردنى ئەو دیوارە، ئێمە لە کۆمارییەکان داوامان لێکردووە کە بەهیچ شێوەیەک پاشەکشە لە بڕیارەکەى نەکات.

لەبارەى زیانمەندانى داخستنى حکومەت لەدواى ئەو بڕیارەى ترەمپ، ئەو ڕاوێژکارەى کۆمارییەکان رایگەیاند: بەپێى دواین ئامار لە نزیکەى دوو ملیۆن فەرمانبەرى حکومەت ٣٦٥ هەزار فەرمانبەر زیانیان بەردەکەوێت و دەبێت ئەمڕۆ هەینى موچەکانیان وەربگرن، بەڵام بەهۆى پەکخستنى کارەکانى حکومەتەوە ناتوانن موچە وەربگرن.

ئەوەشى خستەروو، ئەگەر دیموکراتەکان پەنا ببەنە بەر ئەنجامدانى خۆپیشاندان و هاندانى هاووڵاتیانى ئەمریکا لە رێگەى دەزگا میدیاییەکانەوە، بێگومان کۆمارییەکانیش هەمان هەنگاو دەنێن و خۆپیشاندان ئەنجام دەدەن، ئەوەش کاریگەرى دەکاتە سەر تێکچوونى دۆخى ئەمنى و ئارامى ئەمریکا.

ئەو راوێژکارەى کۆمارییەکان ئاشکرایکرد کە لەگەڵ راوێژکارەکانى هاوڕێى داوایان لە ترەمپ کردووە بە هیچ شێوەیەک پاشەکشە لە بڕیارەکەى نەکات و هەموو دەسەڵاتەکانى بەکاربهێنێت لەپێناو سەرخستنى بڕیارەکەى.

ئاماژەى بەوەشکرد ئەگەر داخستنى حکومەت هەتا 15  رۆژى دیکە بەردەوام بێت کاریگەرى گەورە لە ئەمریکا دروست دەکات و دەبێتە هۆى ئەوەى باج نەگەڕێتەوە بۆ حکومەت ئەوەش زیانى گەورەى لێدەکەوێتەوە.

لەدوو رۆژى رابردوودا دۆنالد ترەمپ سەرۆکى ئەمریکا لەگەڵ هەریەک لە نانسی پێلوسی سه‌رۆكی ئه‌نجومه‌نی نوێنه‌ران و تشاك شومه‌ر ، گفتوگۆى کرد لەسەر دروستکردنى دیوارەکەى سنوورى باشوورى ئەمریکا، بەڵام نەیتوانی بگاتە ئەنجام و بەو هۆیەوە بە توڕەییەوە کۆبوونەوەکەى جێهێشتووە.
 


Copyright © 2016 Xendan.org all rights reserved

designed and developed by AVESTA GROUP