تورکیا: ئەمریکا بکشێتەوە یان نا ئۆپراسیۆن ئەنجامدەدەین

- 1/10/2019 10:21:00 PM 6213 جار خوێندراوەتەوە

خەندان-

وه‌زیری ده‌ره‌وه‌ی توركیا رایگەیاند، ئەنجامدانى هێرشى سەربازى بۆ سەر یەکینەکانى پاراستنى گەل (یەپەگە) پەیوەست نییە بە کشانەوەى هێزەکانى ئەمریکا لە سوریا.

مەولود چاوشئۆغڵو لە دواین لێدوانیدا لەسەر رەوشى سوریا و ئەنجامدانى ئۆپراسیۆنى سەربازى بۆسەر رۆژهەڵاتى فورات و بڕیارى کشانەوەى هێزەکانى ئەمریکا لە سوریا رایگەیاند: بەداخەوە ئەمریکا کە ئەندامى ناتۆیە لەگەڵمان لەگەڵ رێکخراوێکى تیرۆرستى (یەپەگە) رێککەوتووەو کەوتۆتە ژێر کۆنتڕۆڵیانەوە، پەنا بردن بۆ بەهانەى رێکخراوێک بۆ نەکشانەوە لە سوریا کارێکى دروست نییە، دەوڵەت کاتێک بەڵێنێکى دا دەبێت بیباتە سەر.

وتیشى : ئەنجامدانى ئۆپراسیۆنى ئێمە بۆسەر رۆژهەڵاتى فورات پەیوەست نییە بە کشانەوە یان نەکشانەوەى هێزەکانى ئەمریکا، هێشتا ئەمریکا بڕیارى کشانەوەى نەدابوو کە ئەردۆغان رایگەیاند دەچنە ناو رۆژهەڵاتى فورات و دەست دەکەین بە ئۆپراسیۆن، تەنانەت نەماندەزانى کە ئەمریکا لە سوریا دەکشێتەوە.

ئاشکراشى کرد کە تورکیا دەیەوێت لەگەڵ هەریەک لە روسیا و ئێران کۆبوونەوەیەکى سێقۆڵى هاوشێوەى کۆبوونەوەى سۆچى و ئاستانا ئەنجامبدات و لەو رووەشەوە هەردوو دەوڵەتەکەى ئاگادارکردۆتەوە.
 


Copyright © 2016 Xendan.org all rights reserved

designed and developed by AVESTA GROUP