پێگەی ئەلکترۆنی ئەنگێلا مێرکڵ و چەندین گەورە بەپرسی دیکەی ئەڵمانیا هاککراون

- 1/9/2019 6:33:00 PM 2812 جار خوێندراوەتەوە

خەندان-شادان عەلی

پۆلیسی ئەڵمانیا تۆمەتبارێکی دەستگیركردووە، كە دانیناوە بە هاككردن و بڵاوكردنەوەی زانیاری تایبەتی بەرپرسانی ئەو وڵاتە، لەناویشیاندا ڕاوێژكاری ئەڵمانیا ئەنگێلا مێركڵ هەیە.

بەپێی ڕاگەیەندراوێكی پۆلیسی تاوانی فیدراڵی ئەڵمانیا (BKA)، گەنجێکی تەمەن 20 ساڵی ئەڵمانی دەستگیركراوە و دانیناوە بەوەدا كە ئەنجامدەری ئەو هێرشە ئەلیكترۆنیەی مانگی ڕابردووە كە تێیدا هاكی زانیاریە كەسی و داراییەكانی سەدان بەرپرسی سیاسی و ڕۆژنامەنوس و كەسانی ناسراوی ئەو وڵاتەی کردبوو.

ڕۆژی یەكشەممە 6ی كانوونی دووەمی 2019 پۆلیسی ئەڵمانیا تۆمەتبارەکەی دەستگیرکرد و ماڵەكەی پشكنیوە، هەر پاش ڕۆژێك لە دەستگیركردنەكە پۆلیس رایگەیاند لەكاتی لێپرسینەوەكەیدا، دانی ناوە بە ئەنجامدانی ئەو هێرشە ئەلیكترۆنیە و بە پۆلیسی وتووە "خۆم بەتەنها ئەو كارەم ئەنجامداوە".

سەرچاوە ئەمنییەکان ئەڵمانیا ناسنامەی تۆمەتبارەکەیان ئاشكرا نەكردووە، بەڵام ناسنامەی قوربانیەكان ئاشكراکراون، لەناویشیاندا ڕاوێژكار ئەنگێلا مێركڵ و ئەندامانی پارتی یەكێتی دیموكراتی مەسیحی، هەروەها فرانك واڵتەر شتاینمایر-ی سەرۆكی ئەڵمانیا و بەرپرسانی حیزبی سۆشیاڵ دیموكرات هەن.

بەشێكی زۆر لەو زانیاریە دزراوانە بڵاوكراونەتەوە و تێیاندا ژمارەی تەلەفۆن و كارتی حسابی (كرێدیت كارت) و وێنە و پەیوەندیە نهێنیەكان هەیە، نزیكەی هەموو بەرپرسە باڵاكانی ئەڵمانیا  تێوەگلاون بێجگە لە بەرپرسانی باڵی-ڕاستڕەوی پارتی AfD ئەڵمانی. 

تۆمەتبارەکە بە پۆلیسی وتووە "كاردانەوەكەم بە هۆی بێزاربوونم  بووە لەو لێدوانە گشتیانەی کە بەرپرسە باڵاکان داویانە".


Copyright © 2016 Xendan.org all rights reserved

designed and developed by AVESTA GROUP