لە 2019دا پێشبینی خاوبونەوەی گەشەی ئابوری جیهانی دەكرێت

- 1/9/2019 10:27:00 AM 811 جار خوێندراوەتەوە

خەندان- شادان عەلی

بانكی نێودەوڵەتی جیهان پێشبینی دەكات ئابوری جیهان لەمساڵدا خاوببێتەوە بۆ لە سەدا 2.9 و بە بەراورد بە ساڵی رابردوو لە سەدا سێی بەرزبونەوەی ئاڵۆزی گرژی و لاوازی جموجۆڵی بازرگانی جیهانی.

بەپێی ئاژانسی هەواڵی رۆیتەرز، كریستیان جۆرجیڤا، بەڕێوەبەری جێبەجێكاری بانكی نێودەوڵەتی جیهانی لە ڕاپۆرتێكی دا بەناوی "بەدواداچونی ئابوری جیهان" كە لە ساڵێكدا دووجار لە لایەن بانكەوە بڵاودەبێتەوە رایگەیاندووە، "لە سەرەتای ساڵی 2018دا ئابوری جیهان بەهەموو وزەیەكییەوە كاریدەكرد، بەڵام توانا و پاڵنەری لەدەستدا و پێشبینی دەكرێت لە ساڵی 2019 دا زیاتر ڕۆبچێت".

ئەو پێشبینیەی بانكی نێودەوڵەتی لە كاتێكدایە چەند مانگێكە ناكۆكییەكی توندی بازرگانی لە نێوان ویلایەتە یەكگرتووەكانی ئەمەریكا و چین هەیە و كاریگەریشی لەسەر بازاڕەكانی سەرتاسەری جیهان هەیە، هەرچەندە چەندین نیشانەی پێشكەوتنی دانوستانەكان هەیە كە هەردوو وڵات ئامادەییان دەربڕیوە و پێیناوەتە ڕۆژی سێیەمەوە لە پەكین.

بانكی نێودەوڵەتی جیهان ئاماژەی بەوەکردووە، پێشبینی ئەوە دەكەن لەمساڵدا ئابوری ویلایەتە یەکگرتووەکانی ئەمەریکا خاوببێتەوە بۆ لە سەدا 2.5، كە رێژەكەی لەسەدا 2.9 بووە، هاوکات پێشبینی خاوبونەوەی گەشەسەندنی ئابوری چین-یش بۆ لە سەدا 6.2 دەکرێت كە  لە 2018 دا لە سەدا 6.5 بووە.

هەروەها لە ڕاپۆرتەكەدا پێشبینیشی كراوە ئابوری ئەو بازاڕانەی لە گەشەسەندندان بە ڕێژەی لە سەدا 4.2 گەشەبكەن لە 2019 دا.


Copyright © 2016 Xendan.org all rights reserved

designed and developed by AVESTA GROUP