لەسەر پشوەکەى سبەى دووراى جیاواز دروست بووە

- 1/5/2019 9:37:00 PM 134075 جار خوێندراوەتەوە

خەندان-کۆچەر عەزیز

هەرچەندە رۆژی ٦ی کانونی دووەم لە پشووەکانی حکومەتی هەرێمدا بە فەرمی دیاریکراوە و هەموو ساڵێک ئەو رۆژە لە هەرێمدا پشوو بووە، بەڵام ئەمساڵ حکومەت هیچ روونکردنەوەیەکی لەسەر پشوو یاخود دەوامی ئەو رۆژە نەداوە و بێدەنگە، بە هەزاران فەرمانبەران و خوێندکار چاوەڕێی بڕیارێکى حکومەت دەکەن، بەڵام وتەبێژە تاقانەکەى حکومەت لە دەرەوەیە و کەسیش نییە لە شوێنى قسە بۆ راگەیاندنەکان بکات.

لەئێستادا ژمارەیەک لە دامودەزگاکانى حکومەت بەخواستى خۆیان بڕیار لەسەر دەوامکردن یاخود دەوامنەکردن دەدەن، بەشێک لە دامەزراوەکانى حکومەتى هەرێم رۆژى یەکشەممە ٦ى کانونیان کردووەتە پشوو، ئەویش بە پشت بەستن بە بەڵگەنامەیەکى حکومەت کە لەساڵانى رابردوودا ئەو رۆژەى کردبوویە پشووى فەرمى.

زانکۆى سلێمانى یەکێکە لەو دامەزراوانەى حکومەت کە زیاتر لە ٣٠ هەزار خوێندکار و فەرمانبەرى هەیە، بەشێکى زۆر لەو فەرمانبەر و خوێندکارانە بەخواستى خۆیان بڕیاریانداوە بەیانى بکەنە پشوو، د.رەزا حەسەن، سەرۆکی زانکۆی سلێمانی بە خەندان-ی وت، راگەیاندنی پشوو لە دەسەڵاتی حکومەتە و ئەو بڕیاری لەسەر دەدات، بەڵام تا ئێستا حکومەت هیچ بڕیارێکی نەداوە، بۆیە ئەوان لەگەڵ بڕیاری حکومەتن".

هەرچەندە چەند میدیایەک بڵاویانکردووەتەوە کە سبەى پشوو نییە، بەڵام خەندان پەیوەندى کرد بە زیاتر لە شەش کەس لە ناو ئەنجومەنی وەزیران بۆ پشتڕاستکردنەوەی ئەوەی کە بەیانی دەوامی فەرمییە یاخود نا، بەڵام کەسیان وەڵامی پەیوەندییەکەیان نەدایەوە.

وتەبێژى حکومەتى هەرێم لە ئێستادا لە وڵاتى تورکیایە و ئەوەى جێگەى سەرنج و رەخنەیە، جگە لەوەى وتەبێژى حکومەت هیچ کەسێک لە شوێنى دیاریی نەکراوە، بەڵام لەماوەى زیاتر لە یەک مانگى رابردوودا بۆ چەندین پرسى گرنگ و پەیوەست بە ژیانى خەڵکەوە خەندان پەیوەندى پێوەکردووە، بەڵام ناوبراو هیچ کاتێک وەڵامى پەیوەندییەکان ناداتەوە.

هەر سەبارەت بە پرسى پشووى سبەى خەندان پەیوەندى کرد بە پارێزگارى سلێمانى، لەو بارەیەوە هەڤاڵ ئەبوبەکر رایگەیاند، ئەوان چاوەڕێی بڕیاری حکومەت دەکەن، چونکە پشووەکە بۆ هەموو هەرێمی کوردستانە، نەک تەنها سلێمانی.

لەلایەکى دیکە لەماوەى رابردوودا بەرپرسانى حکومەتى هەرێم و نوێنەرانى لایەنە سیاسییەکان لە بەغداد چەندینجار داوایان کردووە، وەزارەتى پێشمەرگە بخرێتە سەر سوپاى عێراق، بەڵام لەو پرسانەى کە لاى حکومەتى عێراق نیشتیمانین، حکومەتى هەرێم خۆى بڕیار دەدات و بەبێ گوێدانە حکومەتى ناوەند.

هەر سەبارەت بە پرسى پشوو لەلایەن وەزارەتى پێشمەرگە، جەبار یاوەر، کە ئەمینداری گشتی وەزارەتی پێشمەرگەیە بۆ خەندان وتى، "بەیانی من دەوامی خۆم دەکەم، ئێمە وەک وەزارەتی پێشمەرگە بەشێکین لەحکومەتی هەرێم دەبێت لە حکومەت بپرسن کە پشووە یاخود نا".

لەبەرامبەر ئەمانەدا ژمارەیەک لە دامەزراوەى حکومەتى هەرێم بە خواستى خۆیان بەیانی ٦ى کانوونى دووەمیان کردووەتە پشوو، بەپێى زانیارییەکانى خەندان، بەشێک لە کۆلێژو پەیمانگاکانى سەر بە زانکۆى پۆلیتەکنیکى سلێمانى دواى گەڕانەوەیان بۆ راى سەرۆکى زانکۆکەیان بەیانییان کردووەتە پشوو، لەو بارەیەوە خەندان پەیوەندى کرد بە ئالان فەرەیدون سەرۆکى زانکۆى پۆلیتەکنیکى سلێمانى، بەڵام ناوبراو وەڵامی پەیوەندییەکەى نەدایەوە. 

 

رۆژەکانی پشوو کە لەلایەن حکومەتی هەرێمەوە دیاریکراون.


نیشانەکردن :

#پشوو

Copyright © 2016 Xendan.org all rights reserved

designed and developed by AVESTA GROUP