ساڵح موسلیم لەبارەى دۆخى مەنبەج بۆ خەندان دەدوێت

- 12/28/2018 1:49:00 PM 26332 جار خوێندراوەتەوە

خەندان-

بەرپرسی کۆمیتەی دەرەوەی بزووتنەوەى کۆمەڵگەى دیموکرات (تەڤدەم) رایگەیاند سوپاى سوریا و یەکینەکانى پاراستنى گەل بە ئاگادارى رووسیا رێککەوتون بۆ پاراستنى مەنبەج.

ساڵح موسلیم بەرپرسی کۆمیتەی دەرەوەی بزووتنەوەى کۆمەڵگەى دیموکرات (تەڤدەم) بە خەندان-ى راگەیاند: سوپاى سوریا چونەتە ناوچە سنووریەکانى مەنبەج بۆ پاراستنى شارەکە لە هەر هێرشێکى سوپاى تورکیا.

راشیگەیاند: کشانەوەى هێزەکانى پاراستنى گەل و رادەستکردنى مەنبەج بە سوپاى سوریا بە ئاگادارى روسیا بووە.

لە ئەگەرى هێرشى سوپاى تورکیا بۆ سەر شارى مەنبەج موسلیم رایگەیاند: ئەگەر سوپاى تورکیا هێرش بکاتە سەر مەنبەج، بەرخۆدانى گەورە لەلایەن دانیشتوانى شارەکەو هێزەکانى سوریا لە دژى ئەنجام دەدرێت، بۆیە بڕوام وا نییە وا بە ئاسانى تورکیا هێرش بکات.

لەبارەى ئەنجامدانى رێککەوتنى ستراتیژى لە نێوان هێزە کوردییەکانى رۆژاڤاو رژێمەکەى ئەسەد ، بەرپرسی کۆمیتەی دەرەوەی بزووتنەوەى کۆمەڵگەى دیموکرات (تەڤدەم) ئاماژەى بەوەکرد کە هەتا ئێستا هیچ جۆرە رێککەوتنێک لەبارەى ناوچەکانى ژێر دەسەڵاتى هێزە کوردییەکان نەکراوەو چاوەڕێش ناکرێت بەمنزیکانە رێککەوتن ئەنجامبدرێت.

ئەمڕۆ سوپاى سوریا چونە ناو شارى مەنبەج و ئاڵاى سوریایان لەناو شارەکە هەڵکرد، ئەوەش دواى کشانەوەى هێزەکانى پاراستنى گەل.


Copyright © 2016 Xendan.org all rights reserved

designed and developed by AVESTA GROUP