وەزیرى بەرگرى ئەمریکا دەستى لەکارکێشایەوە
ترەمپ پەسەندى کرد

- 12/21/2018 8:25:00 AM 9839 جار خوێندراوەتەوە

خەندان- بڕیار جەلال

وەزیرى بەرگرى نامەیەکى دەستلەکارکێشانەوەى پێشکەشى دۆنالد ترەمپ دەکات و دەڵێت منیش پێموایە ناکرێت ئەمریکا ببێتە پۆلیسى جیهان.

بەپێى نامەیەک کە ئێوارەى دوێنێ پێنجشەممە بڵاوکراوەتەوە، جێمس ماتیس وەزیری بەرگری ئەمەریکا دەست لەکارکێشانەوەى خۆى لە پۆستى بەرگرى وڵاتەکەى داوەتە دۆنالد ترەمپ سەرۆکى ئەمریکا  .

لە نامەکەدا وەزیرى بەرگرى ئەمریکا نوسیویەتى: "مافى خۆتە کەسێک ببێتە وەزیرى بەرگرى کە بۆچوونەکانى نزیک بن لە خۆتەوە".

ئاماژەى بەوەشکردووە، شانازى دەکات کە وەک 26 هەمین وەزیری بەرگری ئەمەریکا کاری کردووەو رایگەیاندووە،" پۆستى وەزارەتى بەرگرى بواری پـێدابووم لە پاڵ پـیاوان و ژنانی وەزارەتی بەرگری کاربکەم بۆ بەرگریکردن لە هاووڵاتیانمان و بەها باڵاکانمان".
ناکرێت ئەمریکا ببێتە پۆلیسى جیهان

پێشتر دۆنالد ترەمپ سەرۆک ولایەتە یەکگرتووەکانى ئەمریکا لەبارەى کشانەوەى هێزەکانى وڵاتەکەى نوسیویەتى، ناکرێت ئەمریکا ببێتە پۆلیسى رۆژهەڵاتى ناوەڕاست.

لاى خۆیەوە جێمس ماتیس دەڵێت منیش لەسەرەتاوە پێموایە ناکرێت ئەمریکا ببێتە پۆلیسى جیهان، بۆیە یەکێک لە بنەما سەرەکییەکانى کە باوەڕم پێى بووە ئەوەیە کە بەهێزى ئەمریکا لەو پەیوەندیـیە پـتەوانەدایە کە لەگەڵ هاوپەیمانان و هاوبەشەکانی هەیەتى، بۆیە ناکرێت ئەمەریکا بەرژەوەندیـیەکانی بپارێزیت بەبێ بەردەوامبوون لە هاوپەیمانێتیەکانی و ڕێزگرتن لە هاوبەشەکانى.

لە کۆتایی نامەکەدا رایگەیاندووە کە لە ٢٩ ى شوباتى ٢٠١٩ ئۆفیسەکەى لە وەزارەتى بەرگرى جێدەهێڵێت و ئەو ماوەیە بەسە بۆ ئەوەى سەرۆکى ئەمریکا کەسێک لە شوێنەکەى دابنێت.

 

لاى خۆیەوە دۆنالد ترەمپ لە تویتێکدا لە هەژمارى تایبەتى خۆى لە تویتەر نوسیویەتى دەستلەکارکێشانەوەى وەزیرى بەرگریم پەسەندکردووەو جەنەرال ماتیس لە کۆتایی مانگى شوباتى ساڵى داهاتوو خانەنشین دەبێت، وتوشیەتى لەماوەى دوو ساڵى وەک وەزیرى بەرگرى کارى مەزنى کردووە بۆ بەهێزکردنى پەیوەندییەکانمان لەگەڵ هاوبەش و هاوپەیمانەکان، زۆر سوپاسى دەکەم، لەماوەیەکى کورتدا کەسێکى تر بۆ شوێنەکەى دەستنیشان دەکەم.

 

 

دواى بڕیارى کشانەوەى هێزەکانى ئەمریکا لە سوریا، ئەندامێکى کۆمارییەکان و راوێژکارى ئیدارەى ترەمپ بە خەندان-ى راگەیاند:"ئەگەر بمانەوێت ناوچەکە سەقامگیر بێت پێویستمان بە مانەوەى هێزێکى گەورەى ئەمریکایە، پێویستمان بە ستراتیژێکى باشتر هەیە لەوەى ئێستاى ئەمریکا، وە پێویستمان بە خەرجکردنى پارەیەکى زیاتر هەیە بۆ سەقامگیرى لە ناوچەکەدا، پێویستمان بەوە هەیە جارێکى تر هاوپەیمانى نوێ بدۆزینەوە لە ناوچەکە.

بەپێى ئەو راوێژکارەى ئیدارەى ترەمپ، وەزارەتى بەرگرى هەموو کاتێک بەرگرى لە مافەکانى کورد دەکات بەتایبەت کوردەکانى رۆژئاوا، زۆر بەباشى سەیرى کەیسى کورد ئەکەن، بەڵام وەزارەتى دەرەوەى ئەمریکا  لەگەڵ کشانەوەى هێزەکانى ئەمریکان، کشانەوەى ئەمریکا دەبێتە هۆى بەهێزبوونى ئەو هێزانەى دژى بەرژەوەندییەکانى ئەمریکان، بۆیە لەمڕۆدا کشانەوەى ئەمریکا هەڵەیەکى سەربازى و ستراتیژییە.

دوێنێ دۆنالد ترەمپ سەرۆک ولایەتە یەکگرتووەکانى ئەمریکا بڕیارییدا بە کشانەوەى هێزەکانى وڵاتەکەى لە سوریا و ڕایگەیاند توانیومانە داعش تێکبشکێنین و بە چەند قۆناغێک هێزەکانمان دەکشێنینەوە، ئەوەش کاردانەوەى گەورەى لەسەر ئاستى ناوچەکەو جیهان بەدواى خۆیدا هێناو هێزە ئۆپۆزسیۆنەکانى سوریا بە خیانەت لە شۆڕشەکەیان لەقەڵەمیاندا.

 

 

 

 



Copyright © 2016 Xendan.org all rights reserved

designed and developed by AVESTA GROUP