لە رۆژی ئاڵای کوردستاندا لە باشووری کوردستان چەند چالاکییەک بەڕێوەچوو

- 12/17/2018 10:28:00 AM 2217 جار خوێندراوەتەوە

خەندان- شه‌وكه‌ت قادر 

ئەمڕۆ لە رۆژی هەڵکردنی ئاڵای کوردستاندا چەند چالاکییەک لە شارەکانی هەولێر و سلێمانی بەڕێوەچوو تێیدا ئاڵای کوردستان هەڵکرا و سرودی نیشتیمانی وترایەوە.

پشتیوان سادق، وه‌زیری په‌روه‌رده‌ی حکومەتی هەرێمی کوردستان لەمیانی مەراسیمێکدا  بۆ هەڵکردنی ئاڵای کوردستان لە شاری هەولێر رایگەیاند، "پێویسته‌ گرنگی به‌ بابه‌ته‌ نیشتیمانی نه‌ته‌وه‌ییه‌كان بدرێت بۆ ئه‌وه‌ی رۆڵه‌كانمان به‌های ئه‌و ئاڵایه‌ و ئه‌و هه‌مو خه‌بات و قوربانیدانه‌ بزانن".

ئاماژەی بەوەشکرد، "ساڵی رابردوو رێگه‌یان نه‌دا له‌ كه‌ركوك ئاڵای كوردستان هه‌ڵبكرێت به‌ڵام ئه‌مساڵ تا ئێستا هیچ رێگریه‌ك نیه‌، به‌ڵام ناتوانن رێگری له‌و هه‌موو قوتابی و خوێندكار و مامۆستا و سه‌رپه‌رشتیار و به‌ڕێوه‌به‌ره‌ بكرێت بۆیه‌ له‌ كه‌ركوك ئاڵای كوردستان به‌به‌رزی ده‌شه‌كێته‌وه‌".

ئاڵای کوردستان لە لاکێشەی ئاسۆیی پێکھاتوە، لاکێشەی سەرەوە رەنگی سوورە، ئەوەی ناوەند ڕنگی سپی یە، و لاکێشەی خوارەوە ڕەنگی سەوزە، لە ساڵی 2009دا پەرلەمانی کوردستان بڕیاریدا، ڕۆژی 17ی کانوونی یەکەمی ھەموو ساڵێک، ڕۆژی ئاڵای کوردستان لەسەرجەم شارو شارۆچکەکانی ھەرێمی کوردستان بکرێتەوە.

دروشمی نەتەوەیی ئاڵای کوردستان خۆری زێڕینە، ئەم خۆرە 21 پەڕ (تیشک) ی یەکسان و ھاوشێوەی ھەیە کە ڕێکەوتی 21ی 3 دەگەیەنێت، کە سەرەتای ساڵی کوردییە، بە لەبەرچاوگرتنی دوو لەسەر سێ یەتی قەبارەی ئاڵا، خۆری زێڕین بە پەڕەکانییەوە یەک پێوەرە و بەبێ پەڕەکان نیو پێوەر، ئەم پەڕانە شێوەیان ڕاستە و لە دەرەوە خالێکی تیژ دروست دەکەن، خۆرەکە دەبێت ڕێک لە چەق (ناوەندی) ئاڵای کورستان جێگیر بێت، خۆر بەشێوەیەک جێگیر کراوە کە ستوونی ناوەندی ئاڵا بە ناو خاڵی تیژی بەرزترین پەڕ (تیشک) تێدەپەڕێت.

واتا و هێمای رەنگەکانی ئاڵای کوردستان:
رەنگی سوور: شۆڕش، خوێن رژان لە جەنگ، ئازایی، هێز، یەکسانیی.
رەنگی زەرد: رووناکیی، درەوشانەوە، وریایی، ئاگر.
رەنگی سپی: ئاشتیی، ئارامیی، ئاگربەست.
رەنگی سەوز: سەوزایی، وڵات، پاراستن، لاوێتیی.



Copyright © 2016 Xendan.org all rights reserved

designed and developed by AVESTA GROUP