یەپەگە کوژرانی چوار چەکداری لە عەفرین راگەیاند

- 12/10/2018 10:39:00 AM 934 جار خوێندراوەتەوە

خەندان-

ناوەندی راگەیاندنی یەکینەکانى پاراستنى گەل (یەپەگە) بڵاویکردەوە، لەمیانی چالاکییەکیاندا لە عەفرین چوار چەکداری سەر بە گروپە چەکدارەکان کوژران.
 
ناوەندی راگەیاندنی یەکینەکانى پاراستنى گەل (یەپەگە) رایگەیاند، لە چوارچێوەى قۆناغی دووەمی بەرخودان لە عەفریندا لە ناوەندی عەفرین و ناوچەکانى دەورووبەری جندرێس و بلبلێ ٣ چالاکیى لە دژی سوپاى تورکیا و چەکدارانی نزیک لە تورکیا ئەنجامدراون.

ئاماژە بەوەشکراوە، دەستەیە لە شەڕڤانانى یەپەگە لە دەورووبەری گوندی دێر بەلوت لە ناوچەى جندرێس لە دژی ئۆتۆمبێلێکى سەربازیى چەکداران ئەحرار شام چالاکییان ئەنجامدا و بەهۆیەوە دوو چەکدار کوژران.

راشیگەیاندووە، دەستەیەکى دیکەی شەڕڤانانی یەپەگە لە رۆژئاواى ناوەندی عەفرین لە دژی ئۆتۆمبێلێکى چەتەکانی ئەحرار شەرقییە چالاکییان ئەنجامدا، و لەو چالاکییەدا چەکدارەکان کوژراو و برینداریان هەبوو، بەڵام ژمارەی کوژراو و بریندارەکانیان روون نەبووەتەوە.

راگەیەندراوەکەی یەپەگە ئەوەشی خستووەتەڕوو، لەسەر رێگاى گوندی شێخ ئورزێ لە ناوچەى بلبلێ لە دژی ئۆتۆمبێلێکى سەربازیى چەکدارانی سوڵتان موراد چالاکی ئەنجامدراوە و لەو چالاکییەدا دوو چەکدار کوژراون.


Copyright © 2016 Xendan.org all rights reserved

designed and developed by AVESTA GROUP