سەعدى پیرە: عادل عەبدولمەهدى مافی رێگریی کردن لە کاندیدى یەکێتى نییە

- 12/6/2018 4:09:00 PM 8403 جار خوێندراوەتەوە

خەندان- بڕیار جەلال

وتەبێژى یەکێتى نیشتیمانى کوردستان ڕایدەگەیەنێت یەکێتى قبوڵى ناکات پۆستى وەزارەتى داد بدرێتە لایەنێکى ترو بە مافى خۆى دەزانێتـ، ئەوەشمان بە عادل عەبدولمەهدى سەرۆک وەزیرانى عێراق گەیاندووە.

سەعدى ئەحمەد پیرە، وتەبێژى مەکتەبى سیاسی یەکێتى نیشتیمانى کوردستان بە خەندان-ى ڕاگەیاند: " یەکێتى ئاگادارى عادل عەبدولمەهدى سەرۆک وەزیرانى عێراقى کردووە، کە مافى ئەوەى نییە، ڕێگە بگرێت لە پێشکەشکردنى ناوى کاندیدى یەکێتى بۆ وەزارەتى دادو ئەوە قبوڵ ناکەین".

لەحاڵەتى سوربوونى عادل عەبدولمەهدى لەسەر کاندیدەکەى ئێستاى بۆ پۆستى وەزارەتى داد، سەعدى پیرە ئامادەنەبوو زانیارى بدات تەنها وتى: "هەڵوێستى ترمان دەبێت".

ئاماژەى بەوەشکرد، کە یەکێتى نیشتیمانى کوردستان لەگەڵ هەموو لایەنە سیاسییەکانى تر گفتوگۆ لەسەر ئەو بابەتە دەکەین، بەڵام ئەوەى ناوەکان پێشکەش دەکات عادل عەبدولمەهدی-یە، ئەگەر گۆڕانکارى لە ناوى کاندیدەکان کرا ئەوە باشە، ئەگەر نەکرا قسەى ترمان دەبێت".

هەرچەندە هەتا ئێستا هەشت پۆستى وەزارى لە حکومەتەکەى عادل عەبدولمەهدى بە بەتاڵى ماونەتەوە، بەڵام بەهۆى ناکۆکى لایەنە سیاسییەکانى عێراقەوە، لەکۆبوونەوەى ئەمڕۆى پەرلەمانى عێراق نەتوانرا بابەتى دەنگدان بە کاندیدان بخرێتە بەرنامەى کارەوە.

رۆژى ٤/12/2018 پەرلەمانى عێراق کۆبوویەوە بۆ دەنگدان بەو هەشت کاندیدەى کە عادل عەبدولمەهدى پێشکەشى پەرلەمانى کردبوو بۆ پڕکردنەوەى وەزارەتەکانى، بەڵام بەهۆى دروستبوونى گرژى و ئاڵۆزى کۆبوونەوەکە دواخرا بۆ رۆژى پێنجشەممە.

لەناو لایەنە کوردییەکاندا، تەنها پارتى دیموکراتى کوردستان بەشدارى دانیشتنى پەرلەمانى کرد بۆ دەنگدان بە کاندیدەکان و سەرجەم لایەنە سیاسییەکانى تر کە نوێنەرییان لە بەغداد هەیە بایکۆتى دانیشتنەکەیان کرد، بە هۆکارى تێبێنیان لەسەر ئەو کاندیدە کوردەى کەعادل عەبدولمەهدى بۆ پڕکردنەوەى پۆستى وەزارەتى داد پێشکەشى پەرلەمانى کردبوو.



Copyright © 2016 Xendan.org all rights reserved

designed and developed by AVESTA GROUP