وەزارەتی ناوخۆ: بڕیارەکە یاساییە و لە هەموو دونیادا هەیە
بڕیاری کردنەوەی VIP لە هاتوچۆی هەولێر ناڕەزایی هاوڵاتیانی لێدەکەوێتەوە

- 12/6/2018 12:46:00 PM 7624 جار خوێندراوەتەوە

خەندان- خۆزگە عەزیز

کردنەوەی بەشی VIP لەلایەن بەڕێوەبەرایەتی هاتوچۆی هەولێرەوە ناڕەزایی فراوانی هاوڵاتیانی هەرێمی کوردستانی لێکەوتەوە، بەڵام وەزارەتی ناوخۆ کە بڕیارەکەی دەرکردووە دەڵێت، "بڕیارەکە یاساییە و لە هەموو وڵاتانی دونیادا هەیە".

دوێنێ چوارشەممە هاتووچۆی هەولێر رایگەیاند، بڕیاردراوە بە كاركردن بە سیستمی تایبەت (VIP) بۆ جێبه‌جێكردنى مامەڵەی هاوڵاتیان لە بەرامبەر 100 هەزار دینار، بەڵام ئەو بڕیارە لە تۆڕە کۆمەڵایەتییەکان کاردانەوەی گەورەی هاوڵاتیانی بەدوای خۆیدا هێنا و بەتوندی رەخنە لەو بڕیارە گیرا.

فازڵ حاجی، وته‌بێژى هاتوچۆی هەولێر بە خەندان-ی راگەیاند، بەشی VIP لە بەڕێوەبەرایەتیەکەیان کراوەتەوە بۆ جێبه‌جێكردنى مامەڵەی ئەو كەسانەی بۆ تۆماركردن، نوێكردنەوەی مۆڵەت و ساڵنامەی ئۆتۆمبێلەكانیان سەردانیان دەكەن، كه‌ تێیدا سه‌رجه‌م مامه‌ڵه‌كانیان به‌ ئاسانى و له‌ ماوه‌یه‌كى كه‌مدا بۆ ته‌واو ده‌كرێت.

ئاماژەی بەوەشکرد، بڕیارەکە وەزارەتی ناوخۆی حکومەتی هەرێمی کوردستان دەریکردووە، و ئەو کەسانەی دەچنە بەشی VIP  بڕی 100 هەزار دیناریان لێوەردەگیردرێت.

فازڵ حاجی راشیگەیاند، ئەو بڕیارە سوود و زیانیشی هەیە، "زیانەکەی ئەو خراپ تێگەیشتنەی هاوڵاتیانە کە بە جیاوازی تێیگەیشتوون و سوودەکەشی لەوەدایە کە ئەو کەسانەی خزمەتگوزاری خێرایان دەوێت کاری بۆ دەکرێت".

نیاز فەرحان، یەکێک لەو هاوڵاتیانەی شاری هەولێر کە رەخنەی لە سیستەمەکە هەیە بە خەندان-ی راگەیاند، "با ئیتر ڤایرۆسی چینایەتی و نایەکسانی لە نێوان مرۆڤەکان لەناوبەرین، بەڵکو هەموو کەسێ هەست بە بوونی نرخ و بەهای خۆی بکات نەوەک ڕۆژ بەرۆژ تەشەنەی پێ بکەین و ئەم پەتایە بڵاوبکەینەوە".

دەشڵێت، "بەڵام لەبەرئەوەی تۆ پارەت نییە دەبێت تەنازول بکەی و تەحەمولی مەزاجی کارمەندەکانی ئەو بەڕێوەبەرایەتییە بکەیت بە هەرشێوەیەک قسەت لەگەڵ بکەن دەبێ خۆت بێدەنگ بکەیت، و هیچ قسەیەک نەکەیت، ئەگەر لەپێش چاوت نۆرەبڕی کرا و دوو کاتژمێر یان سێ بێ دەبێ چاوەڕێبکەیت".

نیاز فەرحان وتیشی، "نەخۆشی دڵت هەبێت یان زەخت ئەوا کێشەی خۆتە، پارەت هەبوایە تا موعەزەز موکەرەم زوو ئیشەکەتیان بۆ ڕاییدەکردی".

هاوڵاتییەکی دیکەی شاری هەولێر دەڵێت، "حکومەتی هەرێم بەم کارەی سەلماندی کە دژی خزمەتکردنی هاوڵاتیانە، ئێستا بۆمان دەرکەوت کە خۆیان قەرەباڵغیان لە دامودەزگاکان دروستکردووە تا شوێنێکی لەوجۆرە بکەنەوە بۆ پارە وەرگرتن لە هەژاران".

ئاماژەی بەوەشکرد، "ساڵێکە ساڵنامەی سەیارەکەم بە سەر چووە ناتوانم بچم تازەی بکەمەوە لە بەر قەرەباڵغی، ئەگەر ئێستا بە پارە دەتوانن ئەم شوێنانە بکەنەوە بۆ بێ پارە ناتوانن دەیان دەزگای وا بکەنەوە تا هاوڵاتیان بە ئاسانی مامەڵەی خۆیان بکەن".

بڕیاری کردنەوەی بەشی VIP تەنها بۆ بەڕێوەبەرایەتی هاتوچۆی هەولێر نییە، بەڵکو پێشتر لە بەڕێوەبەرایەتیەکانی پاسپۆرت لە هەرێمی کوردستان کراوەتەوە و بڕی 250 هەزار دینار لەو کەسانە وەرگیراوە کە لە رێگەی ئەو بەشەوە کارەکانیان بۆ راییکراوە.

سامی جەلال، بریکاری وەزارەتی ناوخۆی هەرێم بەرگری لە بڕیارەکەی وەزارەتەکەی دەکات و دەڵێت، "ئەو بڕیارە بەشی خزمەتگوزاری خێرایە و ئاساییە، لە هەموو وڵاتان ئەو بڕیارە هەیە و لە هەموو پارێزگاکانی عیراقیش و لە بەڕێوەبەرایەتی پاسپۆرت هەیە".

ئاماژەی بەوەشکرد، ئەو سیستەمە بۆ خاوەنپێداویستییە تایبەتییەکان و کەسوکاری شەهیدان بێبەرامبەرە، و لەسەدا 50ی پارەکە بۆ حکومەت دەبێت، بەڵام لەبەرئەوەی کە هەندێک کەس پێشتر سوودمەندبوون لەوەی بەرامبەر رایکردنی کارەکانی هاوڵاتیان پارەیان لێوەرگرتوون، ئەو هەرایە نراوەتەوە، بەڵام ئێستا ناتوانن ئەو پارەیە وەربگرن.


سامی جەلال رونیکردەوە، ئەو بڕیارە ئارەزوومەندانەیە و هەرکەس خۆی بیەوێت دەتوانێت پارە بدات و زووتر کارەکانی بۆ تەواوبکرێت، ئەگەر ئەو بڕیارە لە هەولێر سەرکەوتووبێت ئەوا لەسەرجەم شارەکانی دیکەش جێبەجێدەکرێت.

هاوکات پارێزەر رێبین سەلاح، کە رەخنەی توندی لە بڕیارەکە هەیە و ئەمڕۆش سکاڵای یاسای لەسەر بەڕێوەبەرایەتی هاتووچۆی هەولێر تۆمارکرد و رایگەیاند، "ئەو بڕیارە نایاساییە و پێچەوانەی هەموو ماددە یاساییەکانی ژمارە ٨٦ی ساڵی ٢٠٠٤ ی یاسای هاتووچۆیە و نادەستوورییە".

رێبین سەلاح بە خەندان-ی وت، "بڕیارەکە دەبێتە هۆکاری جیاکاری لە نێوان هاوڵاتیاندا، و ناکرێت بەشێک لە هاوڵاتیان بە ئاسانیی کارەکانیان بۆ رایبکرێت و بەشێکی دیکەشیان بە ماندووبوونێکی زۆر و چاوەڕوانییەکی زۆر کارەکانیان بۆ تەواو بکرێت". 

ئەو پارێزەرە راشیگەیاند، لە دەستووری عیراقیشدا هاتووە، نابێت هیچ جیاکارییەک هەبێت لە نێوان هاوڵاتیاندا، هاوڵاتی پلەیەک و دوو سێ نییە.



Copyright © 2016 Xendan.org all rights reserved

designed and developed by AVESTA GROUP